ကန့်ဘလူနှင့် ကောလင်း မြို့နယ်များအတွင်း ရေကြီးရေလျှံ ဖြစ်ပေါ်ခဲ့မှုများအား ကယ်ဆယ်ရေးနှင့် ပြန်လည် ထူထောင်ရေးလုပ်ငန်းများ ဆောင်ရွက်ပေး

ကန့်ဘလူနှင့် ကောလင်း မြို့နယ်များအတွင်း ရေကြီးရေလျှံ ဖြစ်ပေါ်ခဲ့မှုများအား ကယ်ဆယ်ရေးနှင့် ပြန်လည် ထူထောင်ရေးလုပ်ငန်းများ ဆောင်ရွက်ပေး နေပြည်တော် ၊ ဇူလိုင် - ၂၁ စစ်ကိုင်းတိုင်းဒေသကြီး၊ ကန့်ဘလူနှင့် ကောလင်းမြို့နယ်များအတွင်း ဇူလိုင် ၁၆ ရက် ညနေပိုင်းမှစ၍ အဆက်မပြတ် မိုးရွာသွန်းခဲ့မှုကြောင့် ချောင်းများ ရေလျှံခြင်း ၊ ကန့်ဘလူမြို့နယ်၊ အင်းမကျေးရွာ အနီးရှိ မင်းမြင်ဆည်ရေ မြင့် တက်ပြီး ရေပိုလွှဲမှရေများ လွှင့်ထုတ်ပစ်ရခြင်းတို့ကြောင့် ရေကြီးရေလျှံမှုများ ဖြစ်ပေါ်ခဲ့သည်။ အဆိုပါ ရေကြီးရေလျှံမှုများ ဖြစ်ပွားရာနေရာများသို့ စစ်ကိုင်းတိုင်းဒေသကြီး အစိုးရအဖွဲ့ ၀န်ကြီးချုပ် ဦးသာအေး နှင့် အနောက်မြောက်တိုင်း စစ်ဌာနချုပ် တိုင်းမှူး ဗိုလ်ချုပ် မင်းနောင် တို့က အချိန်နှင့်တစ်ပြေးညီ သွားရောက်၍ အနီးကပ် ကြည့်ရှု စစ်ဆေးပြီး တပ်မတော်သားများ၊ မီးသတ်တပ်ဖွဲ့ဝင်များ ၊ ကြက်ခြေနီ တပ်ဖွဲ့ဝင်များဖြင့် လိုအပ်သည့် ကယ်ဆယ်ရေး လုပ်ငန်းများကို ဆောင်ရွက်ပေးသည်။ ထို့အပြင် တပ်မတော် ရဟတ်ယာဉ် များဖြင့် အသက်ကယ်လှေများ ၊ စားသောက်ဖွယ်ရာများနှင့် ကယ်ဆယ်ရေး ပစ္စည်းများကို အလျင်အမြန် သယ်ယူ ပို့ဆောင်ပေးကြသည်။ ထို့နောက် ဇူလိုင် ၂၀ ရက်တွင် နိုင်ငံတော်သမ္မတ ဦးသိန်းစိန် နှင့် တပ်မတော် ကာကွယ်ရေး ဦးစီးချုပ် ဗိုလ်ချုပ်မှူးကြီး မင်းအောင်လှိုင်တို့သည် တာဝန်ရှိသူများ လိုက်ပါလျက် ကန့်ဘလူနှင့် ကောလင်းမြို့နယ် များရှိ ရေကြီးရေလျှံမှု ဖြစ်ပွားသည့် နေရာများသို့ သွားရောက်ပြီး ဒေသခံပြည်သူများအား တွေ့ဆုံအားပေးစကား ပြောကြားခြင်း ၊ ထောက်ပံ့ ပစ္စည်းများ ပေးအပ်ခြင်း၊ မင်းမြင်ရေလှောင်တမံ ကြံ့ခိုင်ရေးအတွက် ဆောင်ရွက်သွားရန်များ လမ်းညွှန်မှာကြားခြင်း ၊ ကယ်ဆယ်ရေးလုပ်ငန်းများ ဆောင်ရွက်ပေးလျက်ရှိသော တပ်မတော်သားများအား အားပေးစကား ပြောကြားခြင်းများ ဆောင်ရွက်ကြသည်။ ယင်းနောက် နိုင်ငံတော်သမ္မတ ၊ တပ်မတော် ကာကွယ်ရေး ဦးစီးချုပ် နှင့် စစ်ကိုင်းတိုင်း ဒေသကြီး ၀န်ကြီးချုပ်တို့ ညှိနှိုင်း၍ ရေဘေးသင့် ဒေသများတွင် အနောက်မြောက်တိုင်း စစ်ဌာနချုပ် တိုင်းမှူးဦးစီးအခြေပြု တပ်မတော် ရဟတ်ယာဉ်များ ၊ ဖိုက်ဘာစက်လှေများ၊ တပ်မတော်သားများဖြင့် ကယ်ဆယ်ရေးလုပ်ငန်းများ၊ ပြန်လည်တည်ဆောက်ရေး လုပ်ငန်းများ အချိန်နှင့် တစ်ပြေးညီ ဆောင်ရွက်ပေးလျက် ရှိကြောင်း သတင်းရရှိသည်။