မန္တလေး အောက်တိုဘာ ၇
အစိုးရသစ် ရက်တစ်ရာ စီမံကိန်းတွင် စာရင်း ကောက်ယူခဲ့သော ရွှေ့ပြောင်း လုပ်သားများကို နေထိုင်သည့် မြို့နယ် အတွင်း အိမ်ထောင်စု စာရင်းကို မန္တလေး ခရိုင်အတွင်းရှိ ပုသိမ်ကြီးမြို့နယ်တွင် အောက်တိုဘာ ၇ ရက်နေ့မှ စတင် ထုတ်ပေးကြောင်း မန္တလေး တိုင်းဒေသကြီး လူဝင်မှု ကြီးကြပ်ရေးနှင့် အမျိုးသား မှတ်ပုံတင်ရေး ဦးစီးဌာနမှ ညွှန်ကြားရေးမှူး ဦးတင်ချယ်က ပြောကြားသည်။
ရွှေ့ပြောင်း လုပ်သားများအနက် အနည်းဆုံး ခြောက်လ နေထိုင်သူများကို မူလစာရင်းရှိ အိမ်ထောင်စု စာရင်းကို ပယ်ဖျက်၍ လက်ရှိ နေထိုင်ရာ စာရင်းပေါက် အိမ်ထောင်စု စာရင်းများကို အခမဲ့ ဆောင်ရွက် ပေးခြင်းလည်း ဖြစ်ကြောင်း ၎င်းက ဆိုသည်။
“အငြင်းပွားဖွယ် မရှိတဲ့ သာမန် ပြောင်းရွှေ့ လုပ်သားတွေကို အိမ်ထောင်စုစာရင်း လုပ်ပေးတာပါ။ မူလ နေထိုင်ရာမှာ စာရင်းပေါက်ပြီး လက်ရှိမှာ စာရင်း မပေါက်သူတွေကို ဦးစားပေး စိစစ်ပြီး လုပ်ပေးတာပါ”ဟု ၎င်းက ပြောဆိုသည်။
မန္တလေးတိုင်းဒေသကြီး အတွင်းသို့ အခြားဒေသမှ ရွှေ့ပြောင်းနေထိုင်သူများ အနေဖြင့် မူလနေထိုင်ရာတွင် အိမ်ထောင်စု ဇယား မရှိပါက သုံးနှစ်ဆက်တိုက် နေထိုင်သူဖြစ်လျှင် အိမ်ထောင်စု ဇယားအသစ် ထုတ်ပေးသွားမည်ဖြစ်ကြောင်း ဦးတင်ချယ်က ပြောကြားသည်။
မန္တလေး တိုင်းဒေသကြီးသည် ရွှေ့ပြောင်း လုပ်သား ဝင်ရောက်မှု များပြားနေ၍ အစိုးရအနေဖြင့် မူဝါဒများ ချမှတ်ရာတွင် ရွှေ့ပြောင်း လုပ်သားများနှင့် ပတ်သက်၍ ထည့်သွင်း ရေးဆွဲရမည်ဖြစ်ကြောင်း ရွှေ့ပြောင်း လုပ်သားများ အရေး ဆောင်ရွက်နေသူများက ပြောဆိုကြသည်။
မန္တလေးတိုင်းဒေသကြီးအတွင်း သာမန် ရွှေ့ပြောင်း နေထိုင်သူ အိမ်ထောင်စု တစ်သောင်းကျော် ရှိပြီး လူဦးရေ သုံးသောင်းကျော် ရှိကြောင်း ယာယီ ရွှေ့ပြောင်း နေထိုင်သူများ အရေအတွက်မှာ အိမ်ထောင်စု တစ်သောင်းကျော် ရှိပြီး လူဦးရေ လေးသောင်းကျော်ရှိကြောင်း လူဝင်မှု ကြီးကြပ်ရေးနှင့် အမျိုးသား မှတ်ပုံတင်ရေး ဦးစီးဌာနမှ သိရှိရသည်။
အိမ်ထောင်စု ဇယား ထုတ်ပေးရာတွင် အခြားဒေသမှ လာရောက်သည့် သာမန် ရွှေ့ပြောင်းနေထိုင်သူများ အနေဖြင့် ရပ်ကွက်အတွင်း အိမ်ငှားဖြင့် နေထိုင်ကြသဖြင့် စိစစ်ရာတွင် လွယ်ကူပြီး ယာယီ ရွှေ့ပြောင်း နေထိုင်သူများမှာမူ ကျူးအဖြစ် နေထိုင်ကြသဖြင့် စိစစ်ရေးအတွက် မလွယ်ကူကြောင်း အဆိုပါ ဌာနထံမှ သိရှိရသည်။
