လုပ်ဖော်ကိုင်ဖက်ကောင်းဆိုတာ ..............................

ဘယ်လုပ်ငန်းခွင်မျိုးမဆို ပျော်ရွှင်ချမ်းမြေ့စရာ ကောင်းတဲ့ လုပ်ငန်းခွင်တစ်ခုကို အလုပ်သမားတွေ၊ ဝန်ထမ်းတွေ၊ အမှုထမ်းတွေ အားလုံး တောင့်တကြတာချည်းပါပဲ။ ကပ်စေးနှဲပြီး ပေးကမ်းရမှာ နှမြောတွန့်တိုတဲ့ လုပ်ငန်းရှင်လက်အောက်တွင်ဖြစ်စေ၊ ဝန်ထမ်းတွေအပေါ် ညီအစ်ကို မောင်နှမသဖွယ် သဘောထားပြီး ပေးကမ်းရက်ရောတတ်တဲ့ လုပ်ငန်းရှင်လက်အောက်တွင်ဖြစ်စေ လုပ်ဖော်ကိုင်ဖက်ကောင်းတွေ ရှိခြင်း မရှိခြင်းကသာ အလုပ်မှာ ပျော်သလား၊ မပျော်ဘူးလား ဆိုတဲ့ကိစ္စကို ယေဘုယျ ဆုံးဖြတ်ပေးနိုင်တာပါ။

လစာနည်းလို့၊ ခံစားခွင့် မရှိလို့၊ ကိုယ့်ဝါသနာနဲ့ ကိုက်ညီမှု မရှိလို့စတဲ့ အကြောင်းပြချက်တွေနဲ့ အလုပ်ပြောင်းကြတာထက် လုပ်ဖော်ကိုင်ဖက်တွေနဲ့ အဆင်မပြေလို့၊ အထူးသဖြင့် အနီးကပ် စီနီယာတွေနဲ့ အဆင်မပြေလို့ အလုပ်ပြောင်းကြရတဲ့ ဝန်ထမ်းဦးရေက ပိုများတယ် ဆိုတာကို အလုပ်အကိုင်နဲ့ ပတ်သက်တဲ့ စစ်တမ်းတွေမှာ မကြာခဏ တွေ့ရသလို အဲဒီအချက်ကပဲ လုပ်ငန်းထင်သလောက် အောင်မြင်ပေါက်မြောက် မဖြစ်ရတဲ့ အကြောင်းတွေထဲမှာ ရှေ့ဆုံးကပါနေ တတ်တာကိုလည်း တွေ့ရပါတယ်။

တကယ်တမ်းတော့ မန်နေဂျာနဲ့ ဝန်ထမ်း၊ စီနီယာနဲ့ ဂျူနီယာ စတဲ့အခေါ် အဝေါ်တွေ ဘယ်လိုပဲခေါ်ခေါ် လုပ်ဖော်ကိုင်ဖက်ဆိုတာ မိသားစုတစ်စုထဲက မိသားစုတွေလိုပါပဲ။ နိုင်ငံရေးပါတီ တစ်ခုမှာပဲဖြစ်ဖြစ်၊ အစိုးရဝန်ကြီးဌာနမှာပဲ ဖြစ်ဖြစ်၊ ကုမ္ပဏီ ဒါမှမဟုတ် စက်ရုံတစ်ခုထဲမှာပဲဖြစ်ဖြစ် အလုပ် လုပ်ကြပြီဆိုရင် လုပ်ဖော်ကိုင်ဖက်တွေဆိုတာ မိသားစုဝင်တွေထက် မပိုလျှင်သော်လည်း မိသားစု ဝင်တွေလို အမြဲတစေ ထိတွေ့ဆက်ဆံနေကြရတဲ့သူတွေပါပဲ။ တချို့တွေဆိုရင် ညီအစ်ကို မောင်နှမ အရင်းအချာနဲ့တောင် နေ့စဉ်နေ့တိုင်း မတွေ့ဖြစ်ကြဘူး မဟုတ်လား။

အဲဒါကြောင့် လုပ်ဖော်ကိုင်ဖက်တွေကို မိသားစုဝင် အရင်းအချာလို သဘောထားနိုင်လေ ပျော်ရွှင်စရာ ကောင်းတဲ့ အလုပ်ခွင်တစ်ခုကို ဖန်တီးနိုင်ရုံ သာမက ကိုယ့်ရဲ့လုပ်ငန်းခွင်ပါ အောင်မြင်ဖြစ်ထွန်းမှုတွေရလေ ဆိုတဲ့အချက်ကို အထူးပဲ သတိပြုသင့်ပါတယ်။ ရမယ့်အခွင့်အရေးလေးတွေကို ကိုယ့်ရဲ့ လုပ်ဖော်ကိုင်ဖက်တွေအတွက် အမြဲ စဉ်းစားပေးတာတို့၊ အုပ်စုလိုက်၊ နှစ်ဦးတည်းအလိုက် လက်ဖက်ရည်ဆိုင် ထိုင်တဲ့အချိန်မှာ သူတို့ရဲ့ လုပ်ငန်းခွင် အခက်အခဲလေးတွေနဲ့ ပုဂ္ဂိုလ်ရေး ပြဿနာလေးတွေကို နားထောင်ပေးတာတို့ စတာတွေဟာ လုပ်ဖော် ကိုင်ဖက်တွေနဲ့ ဝန်ထမ်းတွေကို လစာဆိုတာထက် ကြီးမားတဲ့ ခွန်အားပေးစွမ်းနိုင်ပါတယ်။

မိသားစုတစ်စုမှာ မိဘကောင်းတွေဆိုတာ သားသမီးတွေရဲ့ လုပ်ဆောင်ချက် ကောင်းလေးတွေကို အမြဲတစေ ဖော်ထုတ်ချီးမွမ်းပြီး စဉ်းစဉ်းစားစား ချင့်ချင့်ချိန်ချိန်နဲ့ ကိုယ့်မိသားစု အရေးကိစ္စကို ပြန်ပြီး ဝေဖန်ဆန်းစစ်တတ်အောင် သင်ပေးတတ်ကြသူတွေပါ။ အဲဒီလိုပဲ လုပ်ဖော်ကိုင်ဖက်ကောင်းဆိုတာလည်း ကိုယ့်အဖွဲ့အစည်း၊ ကိုယ့် Team ထဲက ဝန်ထမ်းတွေရဲ့ ကြိုးစားမှုတွေ၊ အောင်မြင်ဖြစ်ထွန်းအောင် စွမ်းဆောင်နိုင်မှုတွေကို အားတက်စေမယ့် စကားတွေနဲ့ ချီးမွမ်း အသိအမှတ်ပြုပြီး ကိုယ့်အဖွဲ့အစည်းရဲ့အပေါ် လက်ရှိ အခြေအနေထက် ပိုကောင်းတဲ့ အကြံဉာဏ်တွေ ထွက်လာအောင် ဖန်တီးပေးနိုင်ရပါမယ်။ မိသားစုထဲမှာ ဘယ်သူမှ တသီးတခြား ဖြစ်အောင် မထားတတ်ကြပါဘူး။ တစ်လှေတည်းစီး တစ်ခရီးတည်းသွားနေကြရတဲ့ လုပ်ငန်းခွင်ထဲမှာလည်း လုပ်ဖော်ကိုင်ဖက်တွေ တစ်ယောက်နဲ့တစ်ယောက် ခပ်စိမ်းစိမ်းကြီး နေကြမယ်ဆိုရင်၊ ခေတ်စကားအရ ပညာပြကြမယ်ဆိုရင် လုပ်ငန်းတစ်ခုလုံး အနုတ်လက္ခဏာ ပြတဲ့ဘက်ရောက်ပြီး နောက်ဆုံးမှာ ကိုယ်ထိုင်နေတဲ့ သစ်ကိုင်းကို ကိုယ်ချိုင်ချပစ်တဲ့ကိန်းပဲ ဆိုက်မယ်ဆိုတာ သတိပြုသင့်ပါတယ်။

သည်နေ့ခေတ် အထူးပင် ရေပန်းစားနေတဲ့ စကားလုံးဖြစ်တဲ့ ပဒေသာစုံ ယဉ်ကျေးမှုဆိုတာကို အသာထားပြီး မိသားစုတစ်စုကိုပဲ စဉ်းစားကြည့်ပါ။ မိဘဖြစ်သူ အဖေနဲ့ အမေလည်း အကျင့်စရိုက်ချင်း တူချင်မှ တူသလို၊ သားသမီးတွေ ဆိုတာလည်း အကျင့်စရိုက် အမြဲမတူတတ်ပါဘူး။ ဒါပေမဲ့လည်း တစ်ဦးနဲ့တစ်ဦး နားလည်မှု၊ အသိအမှတ်ပြု လက်ခံမှု စတာတွေနဲ့ ရှေ့ဆက်ကြရတာပဲ မဟုတ်လား။ လုပ်ငန်းခွင်တစ်ခုထဲမှာ အကျင့်စရိုက်မတူတဲ့ လုပ်ဖော်ကိုင်ဖက်တွေရှိ လာတိုင်း စိတ်ညစ်စရာ မဟုတ်ပါဘူး။ တစ်ယောက်ချင်းစီရဲ့ မတူညီတဲ့ အကျင့်စရိုက်တွေကို နားလည်လက်ခံပြီး အဲဒီလို မတူတဲ့အကျင့်စရိုက်က ကိုယ့်လုပ်ငန်းခွင် တိုးတက်မှု ရရှိအောင် ဘယ်လို ဖန်တီးပေးနိုင်မလဲ ဆိုတာကိုပဲ စဉ်းစားရမှာပါ။

တကယ်တော့ လူဆိုတာ မျှော်လင့်ချက်၊ တောင့်တချက် စတဲ့ လိုအင်ဆန္ဒတွေနဲ့ အသက် ဆက်နေကြသူတွေချည်းပါပဲ။ ငယ်ငယ်ကတည်းက မိသားစုတွေထဲမှာ မိဘတွေက သားသမီးတွေကို ဘယ်လိုက်ပို့မယ်၊ ဘာဝယ်ပေးမယ်ဆိုပြီး စာကျက်ခိုင်းတာ၊ အိမ်အလုပ် ကူလုပ်ခိုင်းတာမျိုးတွေနဲ့ ကြိုးစားချင်စိတ်၊ ဝိုင်းဝန်း အလုပ်လုပ်ပေးချင်စိတ် ပေါက်လာအောင် မက်လုံး ပေးတတ်ကြတယ် မဟုတ်လား။ အဲဒီလိုပါပဲ။ လုပ်ဖော်ကိုင်ဖက်ကောင်းတွေ၊ မန်နေဂျာကောင်းတွေ၊ စီနီယာကောင်းတွေ ဆိုတာလည်း ကိုယ့်အဖွဲ့အစည်းထဲက တခြား လုပ်ဖော်ကိုင်ဖက်တွေ အလုပ်ကြိုးစားချင်စိတ်တွေ၊ တီထွင်ဆန်းသစ်မှုတွေ လုပ်ချင်လာအောင် စစ်မှန်တဲ့ မျှော်လင့်ချက်ကောင်းတွေ ပေးနိုင်ကြရပါမယ်။ အခွင့်အရေး ကောင်းမှန် သမျှ ငါအရင်ရ၊ ငါအရင်ယူလို့ သဘောထားမျိုးထားမယ်ဆိုရင်၊ မျှော်လင့်ချက် တွေပေးပြီး တကယ်ဖန်တီးမပေးဘဲထားမယ်ဆိုရင် ရေရှည်လုပ်ငန်းခွင်မှာ အပြန် အလှန်ယုံကြည်မှုဆိုတာ ကွယ်ပျောက်ဖို့ပဲ ရှိမှာပါ။ လိုရင်းပြောရမယ်ဆိုရင် လုပ်ဖော်ကိုင်ဖက် ကောင်းဆိုတာ မိတ်ဆွေကောင်းလည်း ဖြစ်သလို မိသားစုဝင် ကောင်းသဖွယ်လည်းဖြစ်ပြီး ငါ၊ သူတစ်ပါး နှစ်ဖြာသော အကျိုးကို သာမက လုပ်ငန်းအောင်မြင်ဖြစ်ထွန်းမှု ဆိုတဲ့အကျိုးကိုပါ သယ်ပိုးနိုင်တဲ့သူတွေလည်း ဖြစ်တယ်ဆိုတာကို ပြောလိုတာပါ။

အယ်ဒီတာ (၁၈-၁၁-၂၀၁၇)
..........................
Editorial, The Voice Daily, Vol-5/No-189 (#voiceeditorial)