ဦးသိန်းစိန်၏ မျိုးစောင့်ဥပဒေ ပြဋ္ဌာန်းရေး ဆောင်ရွက်ချက် အပေါ် အမြင် ကျနော်လည်း ဗုဒ္ဓဘာသာဝင်တယောက်ပါ။ လူ့အခွင့်အရေးဘက်ကနေတော့ မပြောချင်ဘူး။ နိုင်ငံရေး အခြေအနေ အရတော့ မလုပ်သင့်သေးဘူးထင်တယ်။ မျိုးစောင့်ခြင်းဥပဒေဆိုတာ မျိုးတော့ စောင့်ပါတယ်။ ဒါပေမယ့် ဘာသာရေး ကိစ္စတွေ ပါလာမှာပေါ့။ကချင်တွေက ခရစ်ယန်တွေ ၊ ချင်းဆိုရင်လည်း ခရစ်ယန်တွေပဲ။ ကရင်ဆိုလည်းခရစ်ယန်ပဲ။ သဘောက တိုင်းရင်းသားတွေ အားလုံးက ရောရောထွေးထွေးနေကြတာ။မျိုးစောင့်ရေးဆိုတော့ ဘယ်မျိုးကို စောင့်မှာလဲ။ နောက်ပိုင်းအန္တရာယ်ရှိလာနိုင်တာတွေ ရှိတယ်။ အမြင်ကျဉ်းကျဉ်းနဲ့ သွားလုပ်လို့ မရဘူး။ကျနော်တို့ နိုင်ငံက အင်အားအရမ်းကြီးတဲ့ နိုင်ငံနှစ်ခုကြားကို ရောက်နေတာ။ဒါကိုကိုင်ရင် ဘယ်လို အကျိုးဆက်တွေ ဖြစ်လာမလဲဆိုတာ တွေးရမယ်ဗျာ။ ဒီဥပဒေတွေ ပြဋ္ဌာန်းဖို့က အချိန်အခါနဲ့တော့ မကိုက်ညီသေးဘူးထင်တယ်။အန္တရာယ်ကင်း ဘေးရှင်းအောင်တော့ လူ့အခွင့်အရေးကိုပဲ ကိုင်ပြီး ပြောရမလိုဖြစ်နေပြီ။ အခုက နောက်ဆုံးကျရင် ဘာသာရေးတွေ ပါလာမယ်။ ဘာသာရေးတွေ ပါလာရင်နိုင်ငံရေးက ပိုရှုပ်လိမ့်မယ်။ ညင်ညင်သာသာနဲ့ ပါးပါးနပ်နပ်ကိုင်တွယ်သင့်တယ်။ ဒီမျိုးစောင့် ဥပဒေကြီးကို သမ္မတကပဲ လုပ်လုပ်၊လွှတ်တော်ကပဲ လုပ်လုပ် စောသေးတယ်လို့ ထင်တာပဲလေ။ ပြောပြန်ရင်လည်း လွန်ရာကျတယ် ထင်ပေမယ့် ကျနော်လည်း ဗုဒ္ဓဘာသာပါပဲ။ ဦးခွန်ထွန်းဦး ဥက္ကဋ္ဌ၊ ရှမ်းအမျိုးသားဒီမိုကရေစီအဖွဲ့ချုပ်