ဩဂုတ် ၁၅ ရက်က နိုင်ငံတောင်ပိုင်းရှိ နာရာသီဝတ် ဒေသတွင် ဗုံးပေါက်ကွဲမှု နှစ်ခု ဖြစ်ပွားခဲ့ကြောင်း ဒေသခံ ရဲတပ်ဖွဲ့က အတည်ပြုခဲ့သည်။ ထိုင်းနိုင်ငံရှိ ကမ္ဘာလှည့် ခရီးသွားများ စည်ကားရာ ဒေသများတွင် ဗုံးများ အတွဲလိုက် ဆက်တိုက် ပေါက်ကွဲမှုကြောင့် လူလေးဦး သေဆုံးကာ အများအပြား ဒဏ်ရာရခဲ့သည့် ဖြစ်ရပ်အပြီး တစ်ပတ်မပြည့်မီ ယခုတိုက်ခိုက်မှု ထပ်မံ ပေါ်ပေါက်လာခြင်း ဖြစ်သည်။
The Nation၏ ဖော်ပြချက်အရ နာရာသီဝတ်ရှိ ဘာချိုရပ်ကွက်တွင် မော်တော်ဆိုင်ကယ် လေးစီးဖြင့် စီးနင်းလိုက်ပါလာသည့် စစ်သား ၈ ဦးကို ရည်ရွယ်ကာ ဗုံးနှစ်လုံး ဖောက်ခွဲခဲ့ခြင်းဟု သိရသည်။
ယခုဖြစ်ရပ် မတိုင်မီကလည်း ယာဟာ မြူနီစီပယ် ဧရိယာတွင် အသေးစား ပေါက်ကွဲမှုလေးများ ဆက်တိုက် ဖြစ်ပွားခဲ့ရာ ဈေးဆိုင်လေးခုတွင် အနည်းငယ် ထိခိုက်ပျက်စီးခဲ့သည်။ အခြား ဖောက်ခွဲရေး ပစ္စည်းတစ်ခုကို အာဏာပိုင်များက ရှာတွေ့ပြီး စနက်တံဖြုတ် ဖယ်ရှားနိုင်ခဲ့သည်။ ယာဟာမှ ပေါက်ကွဲမှုများသည် ဒေသတွင်း တည်ငြိမ်မှုကို ပျက်ပြားစေပြီး လူအများ ထိတ်လန့်စေရန်သာ အဓိက ရည်ရွယ်ထားဟန် ရှိကြောင်း ဒေသဆိုင်ရာ အုပ်ချုပ်ရေး အဖွဲ့က မှတ်ချက်ပေးခဲ့သည်။
လတ်တလောတွင် ထိုင်းရဲတပ်ဖွဲ့သည် ပြီးခဲ့သည့် သီတင်းပတ်က ကမ္ဘာလှည့် ခရီးသွားများ စည်ကားရာ ဒေသများကို ဦးတည် တိုက်ခိုက်ခဲ့သည့် ဆက်တိုက် ဗုံးကွဲမှုများနှင့် ပတ်သက်၍ စုံစမ်းနေဆဲ ဖြစ်သည်။ မည်သည့် အဖွဲ့အစည်းကမျှ ယင်းအတွက် တာဝန်ခံမှု မရှိသော်လည်း တိုက်ခိုက်မှု နည်းစနစ်များအရ ၂၀၀၄ ခုနှစ်ကတည်းက ထိုင်းနိုင်ငံ တောင်ပိုင်းတွင် လှုပ်ရှားနေသည့် မွတ်ဆလင် ခွဲထွက်ရေး သူပုန်များ၏ လက်ချက်ဟု ရဲတပ်ဖွဲ့က ယူဆထားကြောင်း သိရှိရသည်။
No comments:
Post a Comment