၁၅ သြဂုတ်လ ၂၀၁၆
ကချင်ပြည်နယ်၊ မိုးညှင်းမြို့နယ်အတွင်းရှိ ကျေးရွာများသို့ သြဂုတ်လ ၁၂ ရက်နေ့တွင် KIA အဖွဲ့တစ်ဖွဲ့ ရောက်ရှိလာပြီး ဆင်ပိုင်ရှင်များထံမှ ဆက်ကြေးငွေများအား နှုန်းထားသတ်မှတ်၍ ကောက်ခံသွားခဲ့ကြောင်း ယင်းဒေသခံများထံမှ သိရှိရပါသည်။
“သူတို့အဖွဲ့က ကျွန်တော်တို့ရွာထဲကို ရောက်လာပြီး ဆင်ပိုင်ရှင်တွေကို ခေါ်တွေ့တယ်၊ ပြီးတော့ ဆက်ကြေး ဆိုပြီး ပိုက်ဆံတွေတောင်းသွားတယ်၊ သူတို့အဖွဲ့က တောင်းတဲ့ငွေကို ဒီလကုန်အပြီးပေးရမယ်လို့ ပြောတယ်၊ သူတို့တောင်းတဲ့ငွေကိုမပေးပါက ဆင်တွေကိုသိမ်းမယ်၊ လူကိုလည်း ဖမ်းဆီးမယ်လို့ ခြိမ်းခြောက်သွားတယ်၊ တခြား စီးပွားရေးလုပ်ငန်းရှင်တွေကိုလည်း ဆက်ကြေးငွေတွေ လိုက်လံတောင်းခံနေတယ်”ဟု ချောင်းဝရွာမှ ဆင်ပိုင်ရှင်တစ်ဦးက ပြောပါသည်။
KIA အဖွဲ့တပ်မဟာ (၂) ရင်း (၆) လက်အောက်ခံ လက်ဝါးပန်စခန်းမှ အရာရှိအဆင့်ရှိသူနှင့် တပ်ဖွဲ့ဝင် ၃ ဦး သည် သြဂုတ်လ ၁၂ ရက်နေ့တွင် မိုးညှင်းမြို့နယ်၊ အင်းတော်ကြီးဒေသ၊ ချောင်းဝ၊ မပြင်၊ လုံးစန့်နှင့် မံကင်း ကျေးရွာ များသို့ ရောက်ရှိလာပြီး ကျေးရွာများရှိ ဆင်အကောင်ရေစာရင်းများကောက်ယူ၍ ဆင် ၁ ကောင်လျှင် ဆက်ကြေးငွေ အဖြစ် ၅ သိန်း အား သြဂုတ်လ ၃၁ ရက်နေ့ နောက်ဆုံးထားပေးဆောင်ရန် ပြောကြား ခဲ့ကြောင်းနှင့် အဆိုပါ ကျေးရွာများတွင် ဆင်အကောင်ရေ ၃၀ ခန့်ရှိကြောင်း သိရပါသည်။
KIA အဖွဲ့အနေဖြင့် ကျေးရွာများအတွင်းရှိ ဆင်ပိုင်ရှင်များထံမှ နှုန်းထားသတ်မှတ်၍ ဆက်ကြေးငွေများ ကောက်ခံခြင်းသည် ကချင်ပြည်နယ်နှင့် ကချင်လူမျိုးတို့အတွက် အကျိုးပြုလုပ်ငန်းများဆောင်ရွက်ရာတွင် အသုံးပြုရန်အတွက်မဟုတ်ဘဲ ၎င်းတို့၏ ကိုယ်ကျိုးစီးပွားအတွက် ကောက်ခံလျက်ရှိကြောင်းနှင့် သစ်လုပ်ထုတ် လုပ်ခြင်း၊ ရွှေမှော်များရှိ စက်ဆိုင်းများ၊ ဆန်/ စားသောက်ကုန်များနှင့် စက်သုံးဆီများသယ်ဆောင်ရာတွင် အခ ကြေးငွေများရယူ၍ လုပ်ကိုင်လျက်ရှိကြောင်း မိုးညှင်းမြို့ခံစီးပွားရေးလုပ်ငန်းရှင်တစ်ဦးမှ ဆက်လက်ပြောကြား သွားပါသည်။
ဇော်လူ
No comments:
Post a Comment