မော်ချီးသတ္တုတွင်းမှာ အိမ်ခြေ ၅၀၀ ပြောင်းရွှေ့ရမည်

မော်ချီးသတ္တုတွင်းမှာ အိမ်ခြေ ၅၀၀ ပြောင်းရွှေ့ရမည်
Monday, June 6, 2016

ကယားပြည်နယ် ဖားဆောင်းမြို့နယ် မော်ချီးသတ္တုတွင်းတွေမှာ နေထိုင်တဲ့ တောင်ပေါ်ရပ်ကွက်၊ ၁၃ ကုန်းရပ်ကွက်နဲ့ ၁၆ ကုန်းရပ်ကွက်တွေမှာ နောက်ထပ် မြေပြိုကျမှုတွေ ဖြစ်နိုင်တယ်ဆိုပြီး အိမ်ခြေ ၅၀၀ လောက် ကို ပြည်နယ်အစိုးရက ပြောင်းရွှေ့ပေးဖို့ စီစဉ်နေပါတယ်။

ဘူမိဗေဒပညာရှင်တွေရဲ့ လေ့လာတွေ့ရှိချက်အရ ပြောင်းရွှေ့ဖို့ ဆုံးဖြတ်လိုက်တာဖြစ်ပြီး အစားထိုးပေးမယ့် မြေနေရာကို သတ်မှတ်ထားပြီးဖြစ်တယ်လို့ ကယားပြည်နယ် စီမံကိန်းနဲ့ ဘဏ္ဍာရေးဝန်ကြီး ဦးမော်မော်က ပြောပါတယ်။

အိမ်ထောင်စုတွေကို ဘယ်တော့ ပြောင်းရွှေ့မလဲဆိုတာကိုတော့ အစိုးရက မပြောနိုင်သေးဘူးလို့ ပြောပါတယ်။

မော်ချီးသတ္တုတွင်းဒေသမှာ ပြီးခဲ့တဲ့နှစ် အောက်တိုဘာလက မိုးကြီးပြီး မြေပြိုခဲ့တာကြောင့် လူ ၃၀ လောက် သေဆုံးခဲ့ပါတယ်။

မြေပြိုကျမှုဖြစ်ပြီးနောက်ပိုင်း တောင်ပေါ်ရပ်ကွက်၊ ၁၃ ကုန်းရပ်ကွက် နဲ့ ၁၆ ကုန်းရပ်ကွက်က ကျောင်းသုံးကျောင်းကို ပိတ်ထားခဲ့တာဖြစ်ပြီး လက်ရှိ ကျောင်းသားဦးရေ ၆၀၀ လောက် ကျောင်းတက်ဖို့ အခက်အခဲဖြစ်နေပါတယ်။

မော်ချီးခဲသတ္တုတွင်းမှာ ရဲထွဋ်ကျော်နဲ့ မြန်မာ့ဦးပိုင်ကုမ္ပဏီလီမိတက်က သတ္တုတူးဖော်နေတာဖြစ်ပြီး အိမ်ထောင်စုတွေမှာ အလုပ်သမားတွေနဲ့ ဒေသခံတွေလည်း ပါဝင်ပါတယ်။

RFA

Photo: Nay Thwae/ RFA ( မော်ချီးသတ္တုတွင်းဒေသက အိမ်ခြေတွေကိုတွေ့ရစဉ် )