မဟာချိုင်မှာသာတဲ့လ

ထိုင်းနိုင်ငံမဟာချိုင်မြို့တွင် မိုးသည်းထန်နေသည့်ကြားက စောင့်မျှော်နေသော မြန်မာလုပ်သားများအား လက်ပြနှုတ်ဆက်နေသည့် ဒေါ်အောင်ဆန်းစုကြည်ကို ဇွန်လ၂၃ရက်ကတွေ့ရစဉ်။ (ဓာတ်ပုံ-Getty Image)

အာဏာရှင် အစိုးရအဆက်ဆက်၏ လျစ်လျူရှုခံရသော ထိုင်းရောက်မြန်မာလုပ်သားများသည် ပထမဆုံးအကြိမ် ပြည်သူ့အစိုးရ၏ စောင့်ရှောက်မှုကို စတင်ခံစားလာရပြီဖြစ်သည်။

ပြည်သူ့အစိုးရ စတင်တာဝန်ယူပြီး ၈၄ ရက်အကြာတွင် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ရွှေ့ပြောင်းမြန်မာလုပ်သား လေးသန်းခန့်ရှိသော ထိုင်းနိုင်ငံသို့ သွားရောက်ကာ မြန်မာလုပ်သားများအား အကာအကွယ်ပေးရန် စာချုပ်သုံးခုကို ချုပ်ဆိုခဲ့သည်။ ထို့အပြင် ထိုင်းနိုင်ငံအတွင်းသို့ ရောက်ရှိနေသော မြန်မာလုပ်သားများအား တာဝန်ယူကြောင်းနှင့် လျစ်လျူရှုထားမည်မဟုတ်ကြောင်း ထိုင်းဝန်ကြီးချုပ်ကို နံဘေးတွင်ထား၍ ပြတ်ပြတ်သားသားပြောကြားခဲ့သည်။

‘‘ဒီမှာ ရောက်နေတဲ့ ကျွန်မတို့ ပြည်သူတွေအတွက် မြန်မာနိုင်ငံမှာ တာဝန်ရှိတယ်ဆိုတာ အသိအမှတ်ပြုပါတယ်။ ကျွန်မတို့ နိုင်ငံသားတွေ လုပ်ကိုင်ကြတာတွေအတွက် ကျွန်မတုိ့မှာ တာဝန်မရှိဘူးလို့ ဘယ်တော့မှပြောမှာ မဟုတ်ပါဘူး။ ကျွန်မတို့ သူတို့ကို ဘယ်တော့မှ မစွန့်လွှတ်ပါဘူး။ သူတို့ကို ဘယ်တော့မှ လျစ်လျူရှုထားမှာ မဟုတ်ပါဘူး။ သူတို့နဲ့ပတ်သက်ပြီး ကျွန်မတို့မှာတာဝန် ရှိပါတယ်။ အဲဒီလို တာဝန်ယူရတဲ့အပေါ်မှာလည်း ကျွန်မတို့က ဂုဏ်ယူပါတယ်’’ဟု ဒေါ်အောင်ဆန်းစုကြည်က ထိုင်းနိုင်ငံဝန်ကြီးချုပ် ပရာယွတ်ချန်အိုချာနှင့် ပူးတွဲပြုလုပ်သည့် သတင်းစာရှင်းလင်းပွဲ၌ ပြောကြားသည်။

ဒေါ်အောင်ဆန်းစုကြည်၏ သုံးရက်တာ ထိုင်းခရီးစဉ်တွင် မြန်မာလုပ်သားများ ခံစားနေရသည့် ဒုက္ခများနှင့် မြန်မာလုပ်သားများအပေါ် ထိုင်းအစိုးရ၏ဆက်ဆံပုံများကို သိရှိခွင့်ရခဲ့သည်။

ထိုင်းနိုင်ငံသို့လာရောက်ပြီး ဒေါ်အောင်ဆန်းစုကြည်၏ လုပ်ကိုင်ဆောင်ရွက်ခဲ့မှုများနှင့် အကာအကွယ်ပေးမှုများကြောင့် မြန်မာလုပ်သားများသည် အခွင့်အရေးများ ပိုမိုရရှိလာမည်ဟု ထိုင်းနိုင်ငံသားများက သုံးသပ်သည်။ ထိုင်းရောက် မြန်မာလုပ်သားများကလည်း အလားတူ မျှော်လင့်နေကြသည်။

ထိုင်းနိုင်ငံရောက် မြန်မာလုပ်သားများသည် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်၏ ထိုင်းနိုင်ငံခရီးစဉ် လာရောက်မှုကြောင့် မြန်မာလုပ်သားများသည် ထိုင်းနိုင်ငံသားများနည်း တူတန်းတူအခွင့်အရေးများ မကြာမီ ရရှိခံစားရတော့မည်ဟု အလုပ်သမားအရေးဆောင်ရွက်သူများက သုံးသပ်ပြောကြားသည်။

‘‘အမေစုနဲ့ မတွေ့လိုက်ရပေမယ့် အမေစုက ကျွန်တော်တို့အတွက် အကောင်းဆုံးလုပ်ပေးခဲ့ပါတယ်။ အမေစုနဲ့ တွေ့ချင်လို့ ကျွန်တော်တို့ လာစောင့်တယ်။ ဒါပေမဲ့ မတွေ့လိုက်ရဘူး။ တွေ့ရမယ်ဆိုတော့လည်း မိုးကဖျက်တယ်။ ဒါပေမဲ့ ကျွန်တော်တို့ ပြောချင်တာတွေ အမေစု အကုန်လုံးသိသွားလို့ ကျေနပ်ပါတယ်’’ဟု မဟာချိုင်မြို့ရှိ အအေးခန်းစက်ရုံတွင် လုပ်ကိုင်နေသော အသက် ၃၀ အရွယ် ကိုကျော်မြင့်က ပြောသည်။

‘‘ကျွန်တော်တို့ ဒီမှာလာလုပ်နေတာ ၁၀ နှစ်ပြည့်တော့မယ်။ ပြောရရင် ဒီမှာဖိနှိပ်ခံနေရတာ ၁၀ နှစ်ပြည့်တော့မယ်။ ဘယ်လူကြီးမှ ကျွန်တော်တို့ဆီလာပြီး ကျွန်တော်တို့အရေးတွေ တောင်းဆိုပေးတာ မရှိဘူး။ အခု အမေစုက ကျွန်တော်တို့အတွက်လာတယ်။ မျက်ရည်ကျရတယ်။ သူကျွန်တော်တို့အတွက် လာပြီးလုပ်ပေးတာ။ ကျွန်တော်တို့မှာ အားကိုးစရာ အမေစုတစ်ယောက်ပဲ ရှိတယ်’’ ဟု မဟာချိုင်မြို့ ထလေထိုင်းဈေးရှိ ဒေါ်အောင်ဆန်းစုကြည် ဟောပြောပွဲသို့ လာရောက်သူ ကိုစိုးမင်းသူက ပြောသည်။

ဇွန်၂၃ရက်က ထိုင်းနိုင်ငံ မဟာချိုင်မြို့ ထလေထိုင်းခန်းမတွင် ဒေါ်အောင်ဆန်းစုကြည်က မြန်မာလုပ်သားများအား စကားပြောကြားနေစဉ်။ (ဓာတ်ပုံ-ဂျေမောင်မောင်(အမရပူရ))

‘‘ဒေါ်အောင်ဆန်းစုကြည်က အောင်ဆန်းသွေးပါတယ်။ တော်ရုံအမျိုးသမီးတွေ မလုပ်နိုင်တာမျိုးတွေ သူလုပ်ပြနိုင်တယ်။ ဒါကြောင့်မို့လည်း ကမ္ဘာကသိတာ။ ဒေါ်အောင်ဆန်းစုကြည်က မန်ဒဲလား၊ မဟတ္တမဂန္ဒီ၊ အောင်ဆန်း၊ ဟိုချီမင်း၊ လီကွမ်ယုတို့လို ကမ္ဘာ့အဆင့် ခေါင်းဆောင်ကောင်းပါ။ သူဒီကိုလာတာ မင်းတို့မြန်မာတွေ တန်ဖိုးတက်အောင်လာတာ’’ဟု ထိုင်းလူမျိုး တက္ကစီယာဉ်မောင်းတစ်ဦးက ပြောသည်။

‘‘ကျွန်မအသက် (၂၆)နှစ်အတွင်းမှာ ထိုင်းနိုင်ငံရေးသမားတွေ မဲဆွယ်လာတိုင်း လူထုထောက်ခံမှုက ဒေါ်အောင်ဆန်းစုကြည် ရသလိုမျိုး၊ မိုးရေထဲကနေ အော်ဟစ်တာ၊ အားပေးတာမျိုး မမြင်ဖူးပါဘူး။ ထိုင်းရဲဆို အသေကြောက်တဲ့လူတွေ မနေ့က သူတို့အမေအားကိုးနဲ့ တစ်နေကုန် ထိုင်းရဲတစ်ထောင်ကျော်ကို အာခံနေကြတယ်’’ ဟု ထိုင်းနိုင်ငံ အရောင်းအ၀ယ်အေဂျင်စီတစ်ခု၌ အလုပ်လုပ်ကိုင်နေသည့် ထိုင်းလူမျိုး နန်စောင်ကစ်သရီးယားက ပြောသည်။

စစ်အာဏာရှင်စနစ်ကို မုန်းတီးသော ထိုင်းလူမျိုးများက ဒေါ်အောင်ဆန်းစုကြည်ကို လေးစားကြောင်း၊ ခေါင်းဆောင်ကောင်းပီသကြောင်းနှင့် မြန်မာနိုင်ငံသည် အချိန်တိုအတွင်း တိုးတက်လာနိုင်ကြောင်း မှတ်ချက်ပြုပြောကြားကြသည်။

‘‘ကျွန်တော်ထင်တာကတော့ မြန်မာအလုပ်သမားတွေ ထိုင်းနေရာအနှံ့မှာ အလုပ်လုပ်နေကြပြီး အများစုဟာ အခက်အခဲမျိုးစုံနဲ့ နေ့တိုင်းရင်ဆိုင်နေကြရတာတွေ့ရတယ်။ 7/ Eleven ဈေးဆိုင်မှာတောင် ဈေးမ၀ယ်တတ်သူတွေ၊ လမ်းမသွားတတ်ကြတာ၊ ကားမစီး တတ်ကြတာ၊ တာဝန်ရှိသူ မေးမြန်းတာကို မဖြေတတ်တာ နေ့စဉ်လိုလို မြင်နေရပါတယ်။ သူတို့ကို ကူညီချင်ပေမယ့် ကျွန်တော်မှ မြန်မာစကားမတတ်တာ။ အခု ဒေါ်အောင်ဆန်းစုကြည်က မြန်မာအလုပ်သမားတွေကို ထိုင်းနိုင်ငံနဲ့ ပတ်သက်တဲ့ ဘာသာစကား၊ လုပ်ငန်းခွင်ဆိုင်ရာ ကျွမ်းကျင်မှု သင်တန်းတွေပေးဖို့ လက်ရှိအာဏာပိုင်တွေနဲ့ ဆွေးနွေးနေတယ် ကြားမိလို့ အထူးဝမ်းသာမိပါတယ်’’ဟု ထိုင်းမှ ဗိုလ်မှူးကြီးဟောင်း ဖွန်စေ့နန်ဆရီက ပြောသည်။

ဇွန်လ ၂၄ ရက်တွင် အလုပ်သမား၊ လူမှုရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးသိန်းဆွေနှင့် ထိုင်းနိုင်ငံအလုပ်သမားဝန်ကြီး ဗိုလ်ချုပ်ကြီး Sirichai Distakul တို့သည် ဒေါ်အောင်ဆန်းစုကြည်နှင့် ထိုင်းနိုင်ငံဝန်ကြီးချုပ်တို့ ရှေ့မှောက်၌ နှစ်နိုင်ငံအကြား အလုပ်သမားအရေးဆိုင်ရာ ပူးပေါင်းဆောင်ရွက်ခြင်း နားလည်မှုစာချွန်လွှာ၊ အလုပ်သမားအလုပ်ခန့်ထားရေးဆိုင်ရာ သဘောတူစာချုပ်နှင့် နယ်စပ်ဖြတ်ကျော်မှုဆိုင်ရာ သဘောတူညီချက်စာချုပ် စသည့်စာချုပ်သုံးခုကို ထိုင်းနိုင်ငံ အစိုးရအိမ်တော်၌ လက်မှတ်ရေးထိုးချုပ်ဆိုခဲ့သည်။

အလုပ်သမားရေးရာ ပူးပေါင်းဆောင်ရွက်ရေးဆိုင်ရာ နားလည်မှုစာချွန်လွှာသည် နှစ်နိုင်ငံအကြား အလုပ်သမားများ ပေးပို့ခြင်းနှင့် လက်ခံခြင်းလုပ်ငန်းစဉ်များတွင် ပွင့်လင်းမြင်သာ၍ ထိရောက်မှုရှိစေရန်နှင့် အလုပ်သမားများ တရားမ၀င်စုဆောင်းခြင်းနှင့် လူကုန်ကူးခံရခြင်းများမှ ကာကွယ်ရေးအတွက် နှစ်နိုင်ငံအကြား သတင်းအချက်အလက်များ တိုးမြှင့်ဖလှယ်နိုင်ရန် ရည်ရွယ်ပါသည်။

ဇွန်၂၅ရက်က ထိုင်းနိုင်ငံဆိုင်ရာ မြန်မာသံရုံးသို့ရောက်ရှိလာသည့် ဒေါ်အောင်ဆန်းစုကြည်။ (ဓာတ်ပုံ-ဂျေမောင်မောင်(အမရပူရ))

အဆိုပါ သဘောတူညီချက်ကို လက်မှတ်ရေးထိုးခြင်းဖြင့် အလုပ်လုပ်ကိုင်မည့် အလုပ်သမားများသည် သွားရောက်လုပ်ကိုင်မည့် နိုင်ငံ၏ ဥပဒေ၊ နည်းဥပဒေ၊ မူဝါဒများနှင့်အညီ လုပ်ငန်းခွင်၌ တရားမျှတစွာ ပြုမူဆောင်ရွက်နိုင်သည့် အခွင့်အရေးများရရှိလာမည် ဖြစ်သည်။

အလုပ်သမားများ အလုပ်ခန့်ထားရေးဆိုင်ရာ သဘောတူစာချုပ်သည် အလုပ်သမားများအား စာချုပ်ချုပ်ဆို ခန့်ထားမှု လွယ်ကူချောမွေ့စေရေး ခိုင်မာသည့် လုပ်ငန်းမူဘောင်တစ်ရပ် ရေးဆွဲဖော်ထုတ်ရန် ရည်ရွယ်ပါသည်။ အဆိုပါ စာချုပ်ကို လက်မှတ်ရေးထိုးခြင်းဖြင့် လက်ခံသည့် နိုင်ငံ၏ နယ်မြေအတွင်း ၀င်ရောက်လာသော အလုပ်သမားများသည် တန်းတူညီမျှ မှုအပေါ် အခြေခံ၍ လက်ခံသည့် နိုင်ငံ၏ တည်ဆဲအလုပ်အကိုင်စာ ချုပ်များ၊ အလုပ်သမားဥပဒေများ၊ နည်းဥပဒေများနှင့်အညီ အကာအ ကွယ်များရရှိခြင်းတို့အပြင် အခွင့် အရေးနှင့် အကျိုးခံစားခွင့်များလည်း ရရှိ်လာမည်ဖြစ်ပါသည်။

နယ်စပ်ဖြတ်သန်းသွားလာရေးဆိုင်ရာ သဘောတူစာချုပ်သည် မြန်မာ-ထိုင်းနှစ်နိုင်ငံအကြား ၁၉၉၇ မေလ ၁၆ ရက်တွင် လက်မှတ်ရေးထိုးထားသည့် မြန်မာ-ထိုင်းနယ်စပ်ဖြတ်သန်း သွားလာရေးဆိုင်ရာ သဘောတူစာချုပ်ကို နှစ်နိုင်ငံနယ်စပ်တစ်လျှောက် ပြောင်းလဲလာသော အခြေအနေများနှင့် နယ်စပ်ဒေသရှိ အလုပ်သမားများ၏ အကျိုးစီးပွားကို ပိုမိုကာကွယ်စောင့်ရှောက်နိုင်ရန်ရည်ရွယ်၍ ပြင်ဆင်/ဖြည့်စွက်ထားသည့် စာချုပ်ဖြစ်ကြောင်း နိုင်ငံခြားရေးဝန်ကြီးဌာနက သတင်းထုတ်ပြန်သည်။

‘‘အလုပ်သမားတွေရဲ့ အလုပ်အကိုင်၊ နေရာထိုင်ခင်းနဲ့ကျွမ်းကျင်မှုတွေကို အလုပ်ရှင်တွေက လုပ်ပေးရမယ်။ မြန်မာအလုပ်သမားတွေအနေနဲ့ ထိုင်းနိုင်ငံအလုပ်သမားတွေနဲ့တန်းတူ အခွင့်အရေးရမယ်ဆိုတဲ့ အချက်တွေ အလုပ်သမားဆိုင်ရာ စာချုပ်တွေထဲ မှာပါဝင်တယ်။ စာချုပ်မှာပါဝင်တဲ့အချက်တွေကို နိုင်ငံနှစ်ခုစလုံးက အလုပ်ရှင်၊ အလုပ်သမားတွေ လိုက်နာရမယ်။ နယ်စပ်ဖြတ်ကျော် စာချုပ်မှာလည်း ထိုင်း-မြန်မာ နိုင်ငံသားတွေကို ကာကွယ်စောင့်ရှောက်မှု ပေးဖို့ပဲ’’ဟု အလုပ်သမားညွှန်ကြားမှုဦးစီးဌာန ညွှန်ကြားရေးမှူးချုပ် ဦးမျိုးအောင်က ပြောသည်။

ဇွန်၂၅ရက်က မြန်မာသံရုံးတွင် ထိုင်းနိုင်ငံရောက် ဆရာ၊ဆရာမများနှင့်တွေ့ဆုံနေစဉ်။ ((ဓာတ်ပုံ-ဂျေမောင်မောင်(အမရပူရ))

‘‘စာချုပ်သုံးခုက အရင်ကထက်ပိုပြီး ထိရောက်တဲ့ လုပ်ဆောင်မှုတွေဖြစ်လာမယ်၊ အကာကွယ်ပေးမှုတွေဖြစ်လာမယ်ပေါ့။ အထူးသဖြင့် နယ်စပ်မှာလုပ်တဲ့ အလုပ်သမားတွေအတွက် ကာကွယ်မှုတွေ၊ တရားဝင်စနစ်တွေ ပေါ်လာလိမ့်မယ်။ ပြီးတော့ ကျွမ်းကျင်မှုဆိုင်ရာ သင်တန်းတွေ ဖြစ်လာလိမ့်မယ်’’ဟု ထိုင်းရောက်မြန်မာလုပ်သားများအတွက် ချုပ်ဆိုထားသော စာချုပ်သုံးခုနှင့်ပတ်သက်၍ မဟာချိုင်အခြေစိုက် ရွှေ့ပြောင်းအလုပ်သမားအခွင့်အရေး ကွန်ရက်(MWRN)ဥက္ကဋ္ဌ ဦးစိန်ဌေးက ပြောသည်။

မြန်မာလုပ်သားများအား ထိုင်းနိုင်ငံသားများနည်းတူ တန်းတူအခွင့်အရေးများရရှိရန် ဒေါ်အောင်ဆန်းစုကြည်၏ တောင်းဆိုမှုများကြောင့် ထိုင်းနိုင်ငံသား အချို့က ကန့်ကွက်ပြောကြားမှုများ ပြုလုပ်လာသည်အထိ ဖြစ်ပေါ်ခဲ့သည်။

‘‘တစ်နေ့ ဘတ် ၃၀၀ ကနေ အခု ၃၆၀ အထိ တိုးတောင်းနေကြတယ်။ ထိုင်းနိုင်ငံသားတွေနဲ့ တန်းတူအခွင့်အရေးပေးရမယ်ဆိုတာ လက်မခံပါဘူး’’ဟု ထိုင်းရောက်မြန်မာလုပ်သားများ အခွင့်အရေး တောင်းဆိုနေမှုများနှင့်ပတ်သက်၍ ထိုင်းနိုင်ငံသား ဖွန်ချိုင်းက ပြောသည်။

ထို့အပြင် ထိုင်းလူမှုကွန်ရက်စာမျက်နှာများပေါ်တွင်လည်း ထိုင်းနိုင်ငံသားများနည်းတူ အခွင့်အရေးများ တောင်းဆိုမှုနှင့် ပတ်သက်၍ ဝေဖန်မှုများ ထွက်ပေါ်လာသည်။

‘‘တန်းတူညီမျှရရှိရေးအတွက် ကျွန်မတို့ ဥပဒေဘောင်အတွင်းက ညှိပါမယ်။ အဲဒီအတွက်လည်း ကျွန်မတို့က သံရုံးကနေပြီး ကွင်းဆင်းပြီးတော့ လုပ်ပါမယ်။ ကျွန်မတို့ နိုင်ငံသူ၊ နိုင်ငံသားတွေအတွက် ရသင့်ရထိုက်တဲ့အခွင့်အရေးတွေကို တိုးမြှင့်ပေးဖို့လည်း ကျွန်မ စီစဉ်နေပါတယ်’’ဟု ဒေါ်အောင်ဆန်းစုကြည်က ပြောသည်။

ဒေါ်အောင်ဆန်းစုကြည်နှင့် ဆရာ၊ဆရာမများ၏ မိသားစုဝင်များ။ (ဓာတ်ပုံ-ဂျေမောင်မောင်(အမရပူရ))

ထို့အပြင် ထိုင်းနိုင်ငံရောက် မြန်မာလုပ်သားများအရေး ကူညီဆောင်ရွက်နေသော အဖွဲ့အစည်းများကိုလည်း မိမိနိုင်ငံသားများ၏ အရေးဆောင်ရွက်ပေးရာတွင် ခေါင်းပုံဖြတ်လုပ်အားခတောင်းခံပါက ဥပဒေအရ အရေးယူမည်ဟု ဒေါ်အောင်ဆန်းစုကြည်က သတိပေး ပြောကြားခဲ့သည်။

ထိုင်းရောက် မြန်မာလုပ်သားများ ခံစားနေရသော ဒုက္ခများကို ဒေါ်အောင်ဆန်းစုကြည် သိရှိသွား၍ ယခုခရီးစဉ်လာရောက်မှုအပေါ်ကျေနပ်မှုရှိကြောင်း ထိုင်းရောက် မြန်မာလုပ်သားများက ပြောကြားသည်။

‘‘ကျွန်တော်တို့ အားကိုးနေတဲ့ အမေစုက ကျွန်တော်တို့အတွက် လာလုပ်ပေးတာ အရမ်းကျေးဇူးတင်ပါတယ်။ ကျွန်တော်တို့ ဒုက္ခတွေကို ကူညီနိုင်တာလည်း သူတစ်ယောက်ပဲ ရှိတယ်လို့ ထင်တယ်။ ဖြစ်နိုင်မယ်ဆိုရင် အမေစုကို တစ်နှစ်တစ်ခါတော့ လာစေချင်တယ်’’ဟု မဟာချိုင်မြို့တွင် ရေလုပ်သားအဖြစ် လုပ်ကိုင်နေသော ကိုရန်နိုင်က ပြောသည်။

ဒေါ်အောင်ဆန်းစုကြည်သည် ထလေထိုင်းခန်းမအတွင်း ရွှေ့ပြောင်းမြန်မာလုပ်သားအချို့ နှင့် တွေ့ဆုံရာ လုပ်သားအချို့၏ တင်ပြပြောကြားမှုများကို နားထောင်ခွင့်ရခဲ့သည်။ ထို့အပြင် ခရီးစဉ်နောက်ဆုံးနေ့တွင် ထလေထိုင်းခန်းမအတွင်း ၀င်ခွင့်မရခဲ့သော ထိုင်းရောက် မြန်မာလုပ်သားများအား ကူညီပေးနေသော မြန်မာအဖွဲ့အစည်း ၁၃ ဖွဲ့နှင့် တွေ့ဆုံ၍ မြန်မာလုပ်သားများ၏ လက်ရှိအခြေအနေများကို ပွင့်ပွင့်လင်းလင်း ဆွေးနွေးခဲ့သည်။

ရွှေ့ပြောင်းလုပ်သားများအရေးအကြောင်း ရေးသားထားသည့် အဖွဲ့အစည်း ၁၃ ဖွဲ့က ပေးသော အိတ်ပိတ်ပေးစာများကိုလည်း ဒေါ်အောင်ဆန်းစုကြည် ရရှိခဲ့သည်။ ပရာယွတ်သည် ၀န်ကြီးချုပ်ရာထူးရယူပြီးနောက်ပိုင်း ၎င်း၏ ပထမဆုံး မြန်မာနိုင်ငံခရီးစဉ်အဖြစ် ၂၀၁၄  အောက်တိုဘာက နှစ်ရက်ကြာ လာရောက်ခဲ့ဖူးပြီး အဆိုပါ ခရီးစဉ်အတွင်း မြန်မာရွှေ့ပြောင်း အလုပ်သမားများအရေး ဆွေးနွေးခဲ့ဖူးသည်။

အာဏာသိမ်းစစ်အစိုးရအုပ်ချုပ်နေသော ထိုင်းနိုင်ငံတွင် မြန်မာနိုင်ငံသားအလုပ်သမားများ၏ အခွင့်အရေးများသည် လက်ရှိအချိန်အထိ ချိုးဖောက်ခံနေရဆဲဖြစ်ပြီး စာချုပ်ပေါ်တွင် သဘောတူလက်မှတ်ရေးထိုးထားမှုများသည်လည်း လက်တွေ့ဘ၀၌ သက် ရောက်မှုနည်းကြောင်း အလုပ်သမားအရေး ကူညီဆောင်ရွက်နေသူများနှင့် အလုပ်သမားများက ပြောသည်။

သို့သော် ပြည်သူ့အစိုးရလက်ထက်တွင် ကမ္ဘာသိခေါင်းဆောင် ဒေါ်အောင်ဆန်းစုကြည်၏ ရှေ့မှောက်၌ ရေးထိုးထားသည့် စာချုပ်ပါ ကတိက၀တ်များသည် သက်ဝင်ထိရောက်မှုရှိမည်ဟု မြန်မာလုပ်သားများသာမက ထိုင်းနိုင်ငံသားများကပါ ရှုမြင်သုံးသပ်နေကြသည်။

‘‘ပတ်စ်ပို့တွေရအောင်လုပ်ပေးမယ်လို့ ပြောသွားတယ်။ ပတ်စ်ပို့နဲ့ နေရတော့မယ်ဆိုရင် ထိုင်းမှာ ဘယ်သွားသွား အဆင်ပြေတော့မယ်။ ကျွန်တော်တို့ မကြာခင် ပတ်စ်ပို့ရတော့မယ်။ အမေစုက ကျွန်တော်တို့အတွက် လာမယ်လို့ကြားကတည်းက ထိုင်းမှာ ကျွန်တော်တို့ မျက်နှာရတယ်။ အမေစုလို လူတစ်ယောက်က ကျွန်တော်တို့အတွက် လာတယ်ဆိုပြီး ကျွန်တော်တို့ ဂုဏ်ယူစွာနဲ့ ပြောလို့ရတယ်’’ဟု မဟာချိုင်မြို့ ငါးသေတ္တာစက်ရုံတစ်ခု၌ လုပ်ကိုင်နေသူ ကိုမြတ်သူက ပြောသည်။

ဇွန်၂၃ရက်က မဟာချိုင်မြို့တွင် ဒေါ်အောင်ဆန်းစုကြည်ကို ကြိုဆိုနေကြသူများ။ (ဓာတ်ပုံ-ဂျေမောင်မောင်(အမရပူရ))