ပြည်ထောင်စုဝန်ကြီး လေးဦး ရခိုင်ပြည်နယ်ကို ကွင်းဆင်းစစ်ဆေး --------------------------------

ပြည်ထောင်စုဝန်ကြီး လေးဦး ရခိုင်ပြည်နယ်ကို ကွင်းဆင်းစစ်ဆေး
--------------------------------

ရန်ကုန်၊ ဇွန် ၁

နိုင်ငံတော်သမ္မတရုံးက ရခိုင်ပြည်နယ် တည်ငြိမ်အေးချမ်းရေးနှင့် ဖွံ့ဖြိုးတိုးတက်မှု အကောင်အထည် ဖော်ရေး ဗဟို ကော်မတီ ဖွဲ့စည်းပြီးနောက် ယင်းကော်မတီက လုပ်ငန်းများ စတင် အကောင်အထည် ဖော်နိုင်ရေးအတွက် ပြည်ထောင်စုဝန်ကြီး လေးဦး ကွင်းဆင်း စစ်ဆေးရန် ရောက်ရှိနေကြောင်း ပြည်နယ်အစိုးရအဖွဲ့မှ စည်ပင်ဝန်ကြီး ဦးမင်းအောင်က ပြောသည်။

ဒေသ တည်ငြိမ်အေးချမ်းရေးနှင့် ဖွံ့ဖြိုးရေးကိစ္စရပ်များ ဆောင်ရွက်ရန်အတွက် ရခိုင်ပြည်နယ်အတွင်းသို့ ရောက်ရှိလာသော ပြည်ထောင်စုအဆင့် ဝန်ကြီးလေးဦးမှာ နယ်စပ်ရေးရာ ဝန်ကြီးဌာန၊ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန၊ ပညာရေးဝန်ကြီးဌာနနှင့် ကျန်းမာရေး ဝန်ကြီးဌာနတို့မှဖြစ်ကြောင်း ပြည်နယ်အစိုးရအဖွဲ့ထံမှ သိရသည်။

အဆိုပါ ပြည်ထောင်စုအဆင့် ဝန်ကြီးများသည် ဇွန်လ ၁ ရက်နေ့တွင် ရခိုင်ပြည်နယ် ဝန်ကြီးချုပ် ဦးညီပုနှင့်အတူ မြေပုံ၊ စစ်တွေ၊ ကျောက်ဖြူနှင့် သံတွဲမြို့များသို့ သွားရောက်ကာ ဒေသအခြေအနေများကို ကြည့်ရှု စစ်ဆေးလျက်ရှိကြောင်း ဦးမင်းအောင်ကဆိုသည်။

“အခုလက်ရှိကတော့ မြေပုံဘက်ကို သွားနေတယ်၊ အဲဒီလို သွားရောက်ကြည့်ရှုတဲ့အခါမှာ လိုအပ်ချက်တွေကို တင်ပြကြမယ်၊ တင်ပြပြီးကျလာတဲ့ ဘတ်ဂျက်နဲ့ တည်ငြိမ်ရေးနှင့် ဖွံ့ဖြိုးရေးလုပ်ငန်းတွေကို ဆောင်ရွက်သွားမှာပါ”ဟု ၎င်းကရှင်းပြသည်။

ရခိုင်ပြည်နယ် တည်ငြိမ်အေးချမ်းရေးနှင့် ဖွံ့ဖြိုးတိုးတက်မှု အကောင်အထည် ဖော်ရေး ဗဟို ကော်မတီကို ဖွဲ့စည်းထားပြီး ယင်းကော်မတီ၏ အောက်တွင် လုပ်ငန်းကော်မတီ လေးခုကို ထည့်သွင်း ဖွဲ့စည်းကြောင်း နိုင်ငံတော် သမ္မတရုံးက မေလ ၃ဝ ရက်နေ့တွင် ကြေညာချက် ထုတ်ပြန်ထားသည်။

အဆိုပါ ကော်မတီ လေးရပ်တွင် ပြည်ထဲရေးဝန်ကြီးဌာန၊ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန၊ လူမှုဝန်ထမ်း ကယ်ဆယ်ရေးနှင့် ပြန်လည်နေရာ ချထားရေး ဝန်ကြီးဌာနနှင့် နိုင်ငံတော် အတိုင်ပင်ခံရုံး ဝန်ကြီးဌာနတို့မှ ပြည်ထောင်စုဝန်ကြီး လေးဦးက ဥက္ကဋ္ဌများအဖြစ် တာဝန်ယူ ဆောင်ရွက်သွားမည်ဖြစ်ကြောင်း နိုင်ငံတော်သမ္မတရုံး၏ ကြေညာချက်တွင် ဖော်ပြထားသည်။