ရခိုင်ပြည်နယ်သို့ စုံစမ်းစစ်ဆေးရေး ကော်မရှင်ဥက္ကဋ္ဌ ဒုတိယသမ္မတ ဦးမြင့်ဆွေ မကြာမီ သွားရောက်မည်ဖြစ်ပြီး နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ရခိုင်သို့ မလိုအပ်ဘဲ သွားရောက်မည် မဟုတ်ကြောင်း သမ္မတရုံးပြောရေးဆိုခွင့်ရှိသူ ပြောကြား

ရခိုင်ပြည်နယ် စုံစမ်းစစ်ဆေးရေးကော်မရှင် ပထမအကြိမ်ညှိနှိုင်း အစည်းအဝေးကို ဒီဇင်ဘာ ၈ ရက်တွင် နေပြည်တော်ရှိ ပြည်ထောင်စုအစိုးရအဖွဲ့ရုံး အစည်းအဝေးခန်းမ၌ ကျင်းပစဉ်

စုံစမ်းစစ်ဆေးရေးကော်မရှင်ဥက္ကဋ္ဌ ဒုတိယသမ္မတဦးမြင့်ဆွေ ရခိုင်ပြည်နယ်သို့ မကြာမီသွားရောက်မည်ဖြစ်ပြီး နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် ရခိုင်ပြည်နယ်သို့ မလိုအပ်ဘဲ သွားရောက်မည်မဟုတ်ကြောင်း သမ္မတရုံးဝန်ကြီးဌာန ပြောရေးဆိုခွင့်ရှိသူ ဒုတိယညွှန်ကြားရေးမှူးချုပ် ဦးဇော်ဌေးက ဒီဇင်ဘာ ၉ ရက်တွင် The Daily Eleven သတင်းစာကို ပြောကြားသည်။

မြန်မာနိုင်ငံဆိုင်ရာ ကုလသမဂ္ဂ၏ အထူးအကြံပေးပုဂ္ဂိုလ် မစ္စတာဗီဂျေးနမ်ဘီယာ၏ ဒီဇင်ဘာ ၈ ရက်က ထုတ်ပြန်သည့် ကြေညာချက်တွင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အား ရခိုင်ပြည်နယ် သို့သွားရောက်ရန် တောင်းဆိုမှုနှင့်ပတ်သက်၍ သွားရောက်ရန် ရှိ၊ မရှိ မေးမြန်းမှုအပေါ် ဦးဇော်ဌေးက ထိုသို့ တုံ့ပြန် ပြောကြားခြင်းဖြစ်သည်။

“သူ့မှာ အဲဒီလို Mandate မရှိဘူး။ ကျွန်တော်ပြောမယ်။ တိုက်တွန်းတာ နိုင်ငံခေါင်းဆောင်တစ်ယောက်ကို ခင်ဗျားဘာလုပ်လိုက်ပါ။ ညာလုပ်လိုက်ပါ။ ဘယ်သူကပြောလို့ ရမလဲ။ သူက လိုအပ်ရင်သွားမယ်။ မလိုအပ်ရင် မသွားဘူး။ သွားချင်လည်းသွားမယ်။ မသွားချင်လည်း မသွားဘူး။ ဟုတ်တယ်မလား။ ဘယ်လိုလုပ်လိုက်ပါ။ ညာလို လုပ်လိုက်ပါ။ သွားပြောလို့ လုပ်ချင်လည်း လုပ်မယ်။ မလုပ်ချင်လည်း မလုပ်ဘူး။ ဆိုလိုတာက နိုင်ငံခေါင်းဆောင်ဆိုတာ ကိုယ့်နိုင်ငံတွင်း ဖြစ်ပျက်နေတဲ့ဟာတွေ သူ့ဟာသူ ဆုံးဖြတ်လိမ့်မယ်။ အခု ကျွန်တော်တို့ ရခိုင်ပြည်နယ်နဲ့ ပတ်သက်လို့ စုံစမ်းစစ်ဆေးရေးကော်မရှင်ဖွဲ့ထားတယ်။ ဖွဲ့ထားတာနဲ့ပတ်သက်ပြီးတော့ ဒုတိယသမ္မတ ဦးစီးပြီးတော့ ရခိုင်ပြည်နယ်သွားဖို့ရှိတယ်။ အဲဒီအချိန်မှာ ဒီနောက်ထပ်ခေါင်းဆောင်တစ်ယောက်က သွားဖို့လိုသလား။ အခြေအနေအရ လိုအပ်တယ်လို့ ထင်မြင်ယူဆရင်သွားမယ်။ မလိုသေးဘူးထင်ရင် မသွားဘူး။ သွားသင့်ပါတယ်။ သွားပါ။ မသွားပါ လာပြောလို့လည်း ကျွန်တော်တို့လုပ်ချင်မှ လုပ်မယ်” ဟု ဦးဇော်ဌေးက ပြောကြားသည်။

ပထမအကြိမ် ရခိုင်ပြည်နယ် စုံစမ်းစစ်ဆေးရေး ကော်မရှင် ညှိနှိုင်းအစည်းအဝေးကို ဒီဇင်ဘာ ၈ ရက် နံနက် ၉ နာရီတွင် နေပြည်တော်ရှိ ပြည်ထောင်စုအစိုးရအဖွဲ့ရုံး အစည်းအဝေးခန်းမ၌ကျင်းပခဲ့ပြီးနောက် သတင်းထုတ်ပြန်ချက်တစ်ရပ်ထုတ်ပြန်ခဲ့သည်။

အဆိုပါ သတင်းထုတ်ပြန်ချက်တွင် မောင်တောဒေသတွင် တိုက်ခိုက်ခံရခြင်း၏ အကြောင်းရင်းများ၊ သေဆုံးမှု ဒဏ်ရာရရှိမှု ပျက်စီးဆုံးရှုံးမှုများနှင့် အခြားထိခိုက်မှုများ၊ ဒေသတည်ငြိမ်ရေးနှင့် တရားဥပဒေစိုးမိုးရေးဆိုင်ရာ လုပ်ဆောင်မှု အခြေအနေမှတ်တမ်းတင်ခြင်း၊ နယ်မြေရှင်းလင်းရေး လုပ်ငန်းများ လုပ်ဆောင်မှုအပေါ် စွပ်စွဲချက်များ မှန်ကန်မှု ရှိ၊ မရှိ၊ လုံခြုံရေးနှင့်အခြေခံ လူ့အခွင့်အရေးများ အာမခံချက်ပေးနိုင်မှု အနေအထား၊ လူသားချင်း စာနာထောက်ထားမှုဖြင့် ကူညီပံ့ပိုးရေး အခြေအနေ၊ ပဋိပက္ခကာကွယ်တားဆီးရေးနှင့် နောင်အလားတူဖြစ်စဉ်မျိုး မဖြစ်စေရန် ဆောင်ရွက်ရမည့် လုပ်ငန်းများအတွက် အကြံပြုချက်များ ပေးအပ်သွားရေးစသည့် လုပ်ငန်းများအပါအ၀င် ကော်မရှင်က ထမ်းဆောင်ရမည့် တာဝန်များသည် တိုတောင်းသော အချိန်အတွင်းမှာ ကြီးမားကျယ်ပြန့်မှုရှိသည်ကို ကော်မရှင်အဖွဲ့ဝင်များက ကောင်းစွာ သတိပြုခံယူထားကြောင်း ဖော်ပြထားသည်။

ထို့ပြင် ကော်မရှင်အဖွဲ့ဝင်များသည် အထက်ပါ တာဝန်များကိုထမ်းဆောင်သည့်အခါ မိမိနိုင်ငံနှင့် နိုင်ငံတကာစံနှုန်းများနှင့်အညီ မှန်ကန်မျှတစွာနှင့် ပွင့်လင်းမြင်သာစွာ ထမ်းဆောင်သွားမည်ဖြစ်ကြောင်း၊ နောက်နောင်တွင် ယခုကဲ့သို့သော အခြေအနေနှင့် ပဋိပက္ခရှောင်ရှားနိုင်ရန်အတွက် လုပ်ဆောင်သွားရမည့် နည်းလမ်းများ ဖော်ထုတ်ရာတွင် စစ်မှန်သော သတင်းအချက်အလက်များ ရရှိရေးအတွက် သက်ဆိုင်ရာအမျိုးသားအဆင့်နှင့် ဒေသန္တရအဆင့်ရှိ အဖွဲ့အစည်းများနှင့် ထိခိုက်ခံစားရသည့် လူ့အသိုက်အ၀န်းများ အပါအ၀င် လူပုဂ္ဂိုလ်များက ပူးပေါင်းပါဝင် ဆောင်ရွက်ကြရန် ကော်မရှင်အနေဖြင့်အား ထားမျှော်လင့်ကြောင်း၊ ထိုသို့ဆောင်ရွက်ရာတွင် ကော်မရှင်သည် တာဝန်ခံမှုရှိစွာဖြင့် အားသွန်ခွန်စိုက် လုပ်ကိုင်သွားမည်ဖြစ်ကြောင်း သတင်းထုတ်ပြန်ချက်တွင် ပါရှိသည်။

Writer: 

ကျော်ဇင်ဝင်း
Eleven Media