ကချင်ပြည်နယ်က မြစ်ကြီးနား-ဆွမ်ပရာဘွမ်-ပူတာအို လမ်းကို ကျပ်သန်းပေါင်း နှစ်သောင်းဝန်းကျင် အကုန်ကျခံသုံးစွဲပြီး ပြင်ဆင်ဖောက်လုပ်သွားမယ်လို့ ပြည်နယ် လမ်းပန်းဆက်သွယ်ရေး၊ လျှပ်စစ်နဲ့ စက်မှုလက်မှုဝန်ကြီး ဦးဝင်းညွှန့်က ပြောလိုက်ပါတယ်။
ဆွမ်ပရာဘွမ်မြို့နယ် လွှတ်တော်ကိုယ်စားလှယ် ဒေါ်ဂျေထုရော်တင်သွင်းတဲ့ မြစ်ကြီးနား-ဆွမ်ပရာဘွမ်-ပူတာအိုလမ်း အမြန်ဆုံး ပြင်ဆင်ရေးဆောင်ရွက်ပေးဖို့ အစိုးရကို တိုက်တွန်းကြောင်းအဆိုကို ဒီကနေ့ ပြည်နယ်လွှတ်တော်မှာ ဆွေးနွေးကြတဲ့အခါ ဝန်ကြီး ဦးဝင်းညွှန့်က ထည့်သွင်းပြောခဲ့တာဖြစ်ပါတယ်။
မြစ်ကြီးနားနဲ့ ပူတာအိုခရိုင်ကို ဆက်သွယ်ထားပြီး ၂၁၈ မိုင်ရှည်လျားတဲ့ အဲ့ဒီလမ်းမကို အိန္ဒိယနိုင်ငံရဲ့ ချေးငွေ ဒေါ်လာ သန်းတစ်ရာ့နှစ်ဆယ်နဲ့ ဖောက်လုပ်ဖို့ အရင်အစိုးရလထက်က သဘောတူထားတယ်လို့ သိရပါတယ်။
ဒါပေမယ့် အိန္ဒိယချေးငွေဟာ လောလောဆယ်မှာ ပြည်နယ်အစိုးရလက်ထဲ မရောက်ရှိသေးတဲ့အတွက် အမှန်တကယ်ရရှိလာရင် ညှိနှိုင်းသုံးစွဲသွားမှာဖြစ်တယ်လို့ ပြည်နယ်ဝန်ကြီး ဦးဝင်းညွှန့်က ရှင်းပြပါတယ်။
မြစ်ကြီးနား-ဆွမ်ပရာဘွမ်-ပူတာအို ကားလမ်းပြုပြင်ဖောက်လုပ်ရေးအတွက် အစိုးရကလည်း စီစဉ်ထားပြီးဖြစ်တာကြောင့် အဲ့ဒီအဆိုကို လွှတ်တော်မှာ မှတ်တမ်းတင်ဖို့ သဘောတူခဲ့ပါတယ်။
ဒီကနေ့ပြုလုပ်တဲ့ လွှတ်တော်အစည်းအဝေးမှာ လုံခြုံရေးနဲ့နယ်စပ်ရေးရာဌာနနဲ့ သက်ဆိုင်တဲ့ မေးခွန်းအပြင် လမ်းပန်းဆက်သွယ်ရေး၊ လျှပ်စစ်နဲ့ စည်ပင်သာယာရေးကဏ္ဍနဲ့ ပတ်သက်တဲ့ ကြယ်ပွင့်ပြ မေးခွန်း ၁ဝ ခုကိုလည်း လွှတ်တော်ကိုယ်စားလှယ်တွေက မေးမြန်းဆွေးနွေးခဲ့ကြပါတယ်။
No comments:
Post a Comment