ကျွန်တော့်အနေနဲ့ငယ်စဉ်ကတည်းက ဘုရားထီးတင်၊ ကျောင်းကန်အလှူစတဲ့ပွဲတွေမှာ လူကြီးများနဲ့အတူသံဃာတော်တွေဆီမှာ အကြိမ်ပေါင်းများစွာ သီလယူတရားနာခဲ့ဘူးပါတယ်..
ဒါပေမယ့် လူကြီးများမပါဘဲ ကိုယ်တစ်ယောက်တည်းသီးသန့်ကြီးတော့ သြကာသကန်တော့ချိုးကိုအစပြု၊ ငါးပါးသီလယူတာအလယ်၊ တရားနာပြီးရေစက်ချတာအဆုံး သံဃာတော်များထံမှာ (ထိုကဲ့သို့အစီအစဉ်တကျ)တစ်ခါမှမကန်တော့ဘူးခဲ့ပါ။
May လကုန်နဲ့ June လတစ်လလုံးနီးပါးခရီးထွက်ဖြစ်နေပြီး ပြန်ရောက်တော့မွေးနေ့အလှူအဖြစ် ထီး၊ဖိနပ်၊သင်္ကန်းစတာတွေကို သံဃာတော်တွေကိုထပ်မံလှူဒါန်းလိုကြောင်း ဘုန်းဘုန်းအရှင်ဆေကိန္ဒထံလျှောက်တင်တော့ ဘုန်းဘုန်းက စွယ်တော်မြတ်စေတီတော်ဝန်းထဲမှာရှိတဲ့ သာသနာ့တက္ကသိုလ်မှာလာလှူဖို့မိန့်ပါတယ်။
ကျွန်တော်ထင်ခဲ့တာက သာမန်လိုပဲ တက္ကသိုလ်မှာသတင်းသုံးနေတဲ့ သံဃာတော်များကို (တစ်ခန်းဝင်တစ်ခန်းထွက်) လှူဖွယ်ပစ္စည်းများလိုက်ကပ်ပြီးပြန်ရမယ်လို့ထင်ခဲ့ပေမယ့် ဘုန်းဘုန်းအရှင်ဆေကိန္ဒက ဘုရားခန်းကြီးတစ်ခုမှာ သံဃာတော်များနှင့်တကွ ဘုန်းဘုန်းကိုယ်တိုင်ဦးဆောင်နေရာယူကာ လှူဖွယ်ပစ္စည်းများကိုလက်ခံပေးခဲ့ပါတယ်။ (ကျွန်တော့်အတွက်ပိုပြီးထူးခြားစေတာက ဘုန်းဘုန်းကအစောကပြောခဲ့သလို သြကာသကန်တော့ချိုးအစပြုကာ ဗုဒ္ဓဘာသာအလှူတစ်ခုမှာကျင့်သုံးလေ့ရှိတဲ့ အစီအစဉ်အတိုင်း ကျွန်တော့်ကိုစနစ်တကျလှူဒါန်းကန်တော့စေခဲ့ခြင်းပဲဖြစ်ပါတယ်)
စစခြင်းအခန်းထဲမှာ သံဃာတော်များနေရာယူပြီးလို့ ဘာစလုပ်ရမှန်းမသိဘဲ အူကြောင်ကြောင်ဖြစ်နေတဲ့ကျွန်တော့်ကို ဘုန်းဘုန်းက 'သား...သြကာသရရင်ဆို' လို့ပြောတော့ ကျွန်တော်ကလည်းဌာန်ကရိုဏ်းကျကျ သြကာသကိုရွတ်ဆိုကန်တော့ပါတယ်။
ပြီးတော့ဘုန်းဘုန်းက 'နမောတဿ ဘဂဝါတော အရဟတော သမ္မာသမ္ဗုဒ္ဓဿ' လို့တိုင်ပေးတော့ ကျွန်တော်ကသုံးခါထပ်ပြီးရွတ်ဆိုပါတယ်...
ငါးပါးသီလတောင်းခန်းဖြစ်တဲ့ 'အဟံဘန္တေ...'အပြီးနဲ့ ငါးပါးသီလယူအပြီးမှာလည်း 'အာမဘန္တေပါအရှင်ဘုရား'လို့ မှန်ကန်စွာရွတ်ဆိုနိုင်တဲ့အတွက်လည်း ကိုယ့်ဟာကိုယ်ကြိတ်ပြီးတော့ဂုဏ်ယူလိုက်ပါသေးတယ်။ ပြောတော့သာအလွယ်.. တကယ်တမ်းကန်တော့ရတော့ ကန်တော့ချိုးမှားရွတ်မိမှာအားနာတာရယ်နဲ့ သံဃာတော်များကို အစီအစဉ်အပြည့်အစုံကြီး တစ်ယောက်တည်းမကန်တော့ဘူးတာရယ်ကြောင့် စိုးရိမ်စိတ်ဝင်မိခဲ့ပါတယ်..
(ဘိုကျောင်းက ကျွန်တော့်သူငယ်ချင်းတွေခေါ်လာရင် ဒီကောင်တွေအူစကူဖြစ်ပြီး ဘယ်နေရာမှာ ဘာစရွတ်ရမှန်းမသိဘဲဖြစ်နေမှာ မြင်ယောင်နေပါသေးတယ်)
ပြီးတော့သံဃာတော်များက ပရိတ်ကြီးများရွတ်ဖတ်ကာ ဘုန်းဘုန်းအရှင်ဆေကိန္ဒက ကျွန်တော့်ကိုတရားဟောပေးပါတယ်။ တရားဟောပြီးတော့ လှူဖွယ်ပစ္စည်းများဆက်ကပ်လှူဒါန်း၊ရေစက်ချအမျှဝေကာ သံဃာတော်များပြန်ကြွသွားခဲ့ပါတယ်။ နောက်မှသိရတာက ဘုန်းဘုန်းကိုကျွန်တော်က 'မွေးနေ့အလှူ'လို့ပြောထားခဲ့မိလို့ စနစ်တကျလေးဖြစ်အောင် စီစဉ်ထားပေးခဲ့ခြင်းဖြစ်ပြီး ကျွန်တော်တစ်ယောက်တည်းလာတာတွေ့တော့ ဘုန်းဘုန်းလည်းအံ့သြသွားခဲ့ပါတယ်။
ကျွန်တော့်အတွက်ကတော့ ဗုဒ္ဓဘာသာအလှူတစ်ခုကို (တစ်ယောက်တည်း)အစီအစဉ်တကျ လှူခဲ့ရတာဟာ ပထမဦးဆုံးအတွေ့အကြုံဖြစ်ပြီး ကျန်တဲ့ဗုဒ္ဓဘာသာဝင်လူငယ်များလည်းပဲ ဗုဒ္ဓဘာသာထုံးတမ်းစဉ်လာကို လေ့လာသိရှိထားစေလိုတာကြောင့် ဒီ Post လေးကိုရေးတင်ပေးလိုက်ပါတယ်။
No comments:
Post a Comment