မန္တလေးမြို့ မီးဘေးသင့်မင်္ဂလာဈေး၏ မြေညီထပ်ဆိုင်ခန်းများကို ဆိုင်ပိုင်ရှင်များ စိတ်ကြိုက် ပုံစံအတိုင်း တည်ဆောက်ပေးမည်

။

မန္တလေးတိုင်းဒေသကြီး၊ မန္တလေးမြို့ရှိ မီးဘေးသင့်မင်္ဂလာဈေး၏မြေညီထပ်ဆိုင်ခန်းများကို ဆိုင်ခန်းရှင်များ ကြိုက်နှစ်သက်သည့် ဒီဇိုင်းပုံစံအတိုင်းတည်ဆောက်ပေးမည်ဖြစ်ကြောင်း မန္တလေးမြို့တော်ဝန် ဦးရဲလွင်မှ ဇွန်(၂၉)ရက်၊ မန္တလေး မြို့တော်စည်ပင်သာယာရေးကော်မတီ အစည်းအဝေးခန်းမ၌ ပြောကြားလိုက်သည်။

“မင်္ဂလာဈေး အသစ်တည်ဆောက်ရာမှာ မြေညီထပ်ကို ဆိုင်ခန်းရှင်များ ဆန္ဒအတိုင်းတည်ဆောက်ပေးမှာ  ဖြစ်တယ်။ ကျန်အထပ်တွေကိုတော့ အဆင့်မြင့်တည်ဆောက်သွားဖို့ စီစဉ်ထားပါတယ်။”ဟု မြို့တော်ဝန် ဦးရဲလွင်က ပြောသည်။

မန္တလေးမြို့ လမ်း ၃၀-၃၁လမ်းကြား၊ ၇၂-၇၃ လမ်းကြားရှိ မီးဘေးသင့်ခဲ့သည့်မင်္ဂလာဈေးအား ပုဂ္ဂလိက လုပ်ငန်းဖြင့် အကျိုးတူပူးပေါင်း၍ အသစ်ပြန်လည်တည်ဆောက်သွားမည်ဖြစ်ပြီး မီးလောင်ကျွမ်းထားသော
မင်္ဂလာဈေးအဆောက်အအုံများကို ဖျက်သိမ်းရန် တင်ဒါခေါ်ယူခဲ့ပြီး ဇူလိုင်(၁)ရက်မှစတင်ကာ ဖျက်သိမ်းရေးလုပ်ငန်းများ လုပ်ဆောင်သွားမည်ဖြစ်သည်။

အဆိုပါဈေးသစ်ကို ယခင်ဈေးထက် ပိုမိုကြံ့ခိုင်စွာတည်ဆောက်သွားမည်ဖြစ်ပြီး မီးဘေးအန္တရာယ်အတွက် နိုင်ငံတကာ အဆင့်မီ မီးငြိမ်းသတ်စနစ်များ၊ အရေးပေါ်ကယ်ဆယ်ရေးစနစ်များကိုလည်း ထည့်သွင်း တပ်ဆင်သွားမည် ဖြစ်ကြောင်း သိရသည်။

“မင်္ဂလာဈေးအောက်ထပ်ရှိ  စီမံကိန်းမြန်မြန်လုပ်ပြီးဈေးကိုမြန်မြန်ပြီးစေချင်တယ်။အပြင်မှာက ဆိုင်ခန်းငှားခ တွေက တအားဈေးကြီးတော့ ပြန်ဖွင့်ဖို့ခက်ခဲနေတယ်” ဟု မိတ္တူကူးစက်နှင့် ဆက်စပ်ပစ္စည်းအရောင်းအ၀ယ် လုပ်ကိုင်သူ တစ်ဦးက ပြောသည်။

ဈေးတည်ဆောက်ရာတွင် ဆိုင်ခန်းပိုင်ရှင်များသာမက ပျံကျဆိုင်များကိုလည်းစာရင်းများကောက်ခံ၍ ဆိုင်ခန်းများ ပေးအပ်သွားရန်စီစဉ်ထားပြီး စာရင်းပေးသွင်းထားသော ပျံကျဆိုင်ခန်းအရေအတွက် အတိုင်း ချထားပေးရန်လည်း စီစဉ်ပေးသွားမည်ဖြစ်သည်။