တပ်မတော်အရာရှိကြီးများ ချမ်းသာနေသည့်ကိစ္စ ပြောကြားသဖြင့် သူရဦးရွှေမန်း သတိပေး

တပ်မတော်အရာရှိကြီးများ ချမ်းသာနေသည့်ကိစ္စ ပြောကြားသဖြင့် သူရဦးရွှေမန်း သတိပေး
Saturday, January 16, 2016

တပ်မတော်အရာရှိကြီးများ၏ လူမှုစီးပွားဘဝများ ပြည့်စုံနေသော်လည်း အောက်ခြေ တပ်မတော်သားတို့၏ဘဝမှာ ဆင်းရဲချို့တဲ့နေရသည်ဟု ပြောကြားဆွေးနွေးသည့် အမျိုးသားဒီမိုကရေစီအဖွဲ့ချုပ်မှ ပြည်သူ့လွှတ်တော်ကိုယ်စားလှယ် ဒေါက်တာအောင်မိုးညိုကို ပြည်ထောင်စုလွှတ်တော်နာယက သူရဦးရွှေမန်းက နောက်ဆုံးအနေဖြင့် သတိပေးကြောင်း ပြောကြားသည်။
“ဒီမှာ…ဘယ်အဖွဲ့အစည်း သို့မဟုတ်ရင် သိက္ခာကျစေတဲ့ အသုံးအနှုန်းတွေ မသုံးပါနဲ့။ နောက်ဆုံးအကြိမ် သတိပေးတာပါ” ဟု သူရဦးရွှေမန်းက ဆိုသည်။
ဇန်နဝါရီလ ၁၅ရက်နေ့က ကျင်းပသော ပြည်ထောင်စုလွှတ်တော်အစည်းအဝေးတွင် ၂၀၁၆- ၂၀၁၇ ဘဏ္ဍာ နှစ် အမျိုးသား စီမံကိန်းဥပဒေကြမ်း၏မူနှင့် အခြေခံသဘော အပါအဝင် စီမံကိန်းလုပ်ငန်းများအပေါ် အမျိုးသားဒီမိုကရေစီအဖွဲ့ချုပ်ပါတီ၏ ပွင့်ဖြူမဲဆန္ဒနယ် ပြည်သူ့လွှတ်တော်ကိုယ်စားလှယ် ဒေါက်တာအောင်မိုးညို
ဆွေးနွေးပြောကြားနေစဉ် ၎င်း က ကြားဖြတ်သတိပေးလိုက်ခြင်းဖြစ်သည်။
အဖွဲ့အစည်းတစ်ခု၏သိက္ခာကို ထိပါးစေသည့်အသုံးအနှုန်းကို ထည့်သွင်းမပြောရန် ၎င်းက ထပ်လောင်းပြောကြားသည်။
“အထည်ချုပ်စက်ရုံလည်း မြန်မာ့စီးပွားရေးဦးပိုင်၊ လက်ပံတောင်းတောင်စီမံကိန်းလည်း
မြန်မာ့စီးပွားရေးဦးပိုင်၊ ကြယ်ငါးပွင့် ပင်လယ်ကူးသင်္ဘောလိုင်းလည်း ဦးပိုင်စသည်ဖြင့် ဦးပိုင် ပိုင်တာတွေ များသော်လည်း အောက်ခြေတပ်မတော်သားများရဲ့ လူမှုစီးပွားဘဝကို ဘယ်လောက် အထောက်အကူပြုနေသလဲ ကျွန်တော်မသိပါဘူး။ ကျွန်တော့မဲဆန္ဒနယ်က တပ်မှာတော့ မသေရုံတစ်မယ် စားနေရပြီး အရှက်လုံရုံ ဝတ်ဆင်နေကြရပါတယ်။ ထင်းခွေစားတဲ့လူနဲ့၊ တောကြိုအုံကြား ကင်ပွန်းချဉ်ရွက် ခူးရောင်းတဲ့ သူနဲ့ ဒီလို မဖြစ်သင့်ပါဘူး” ဟု ဒေါက်တာအောင်မိုးညို က ပြောဆိုဆွေးနွေးသည်။
၂၀၁၆- ၂၀၁၇ ဘဏ္ဍာနှစ် အမျိုးသားစီမံကိန်းဥပဒေကြမ်း၏ စီမံကိန်းလုပ်ငန်းများတွင် တပ်မတော်အနေနှင့် လယ်ယာမြေသိမ်းဆည်းခံပြည်သူများ နစ်နာမှုမရှိရန် လျော်ကြေး
ပေး၍ အလေးထားဖြေရှင်းမည်ဟု ဖော်ပြထားသော်လည်း မကွေးတိုင်းဒေသကြီးတွင် သိမ်းဆည်းမြေ တစ်ဧကလျှင် ကျပ် ၆၀၀၀နှုန်းဖြင့်သာ ပေးလျော်သည့်အခြေနေအချို့ ရှိကြောင်း ဒေါက်တာအောင်မိုးညိုက ဆက်လက်ပြောဆိုသည်။
၂၀၁၆- ၂၀၁၇ ဘဏ္ဍာနှစ် အမျိုးသားစီမံကိန်းဥပဒေကြမ်း၏မူနှင့်အခြေခံသဘော
အပါအဝင် စီမံကိန်းလုပ်ငန်းများနှင့်ပတ်သက်၍ ဒေါက်တာအောင်မိုးညိုအပါအဝင် လွှတ်တော်ကိုယ်စားလှယ် ၂၃ဦးက တစ်ဦးလျှင် ခြောက်မိနစ်နှုန်းဖြင့် ဆွေးနွေးခဲ့ရပြီး ဇန်နဝါရီ ၁၈ရက်နေ့တွင် အစိုးရဘက်မှ ပြန်လည်ရှင်းလင်းဆွေးနွေးကာ အတည်ပြု ဆုံးဖြတ်မည်ဖြစ်ကြောင်း ပြည်ထောင်စုလွှတ်တော်နာယကသူရဦးရွှေမန်းက ကြေညာခဲ့သည်။

The Voice Weekly