Friday, January 29, 2016

လယ်ယာမြေပေါ်တွင် ခွင့်ပြုချက်မဲ့ အခြားလုပ်ငန်းလုပ်သူများထံမှ ဒဏ်ကြေး ကျပ်သိန်း ခုနစ်ထောင်ကျော်ရရှိဟုဆို

လယ်ယာမြေပေါ်တွင် ခွင့်ပြုချက်မဲ့ အခြားလုပ်ငန်းလုပ်သူများထံမှ ဒဏ်ကြေး ကျပ်သိန်း
ခုနစ်ထောင်ကျော်ရရှိဟုဆို
-----------------------------------------------------
မန္တလေး၊ ဇန်နဝါရီ -၂၈

မန္တလေးတိုင်းဒေသကြီးအတွင်းရှိ စိုက်ပျိုးမြေများပေါ်တွင် စိုက်ပျိုးရေး မဆောင်ရွက်သည့်အပြင် ခွင့်ပြုချက်မရှိဘဲ အခြားနည်းအသုံးပြုသူ ၂၅၂ဦးထံမှ ဒဏ်ကြေး ကျပ်သိန်း
ခုနစ်ထောင်ကျော် လက်ရှိအစိုးရသက်တမ်းအတွင်း ရရှိကြောင်း မန္တလေးတိုင်းဒေသကြီး လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာန တာဝန်ရှိသူတစ်ဦးက ပြောကြား
သည်။

အဆိုပါဒဏ်ကြေးများကို တိုင်းဒေသကြီးအစိုးရအဖွဲ့ရန်ပုံငွေအဖြစ်ထားရှိပြီး လယ်ယာမြေဥပဒေအရ အရေးယူရာတွင် လုပ်ငန်းရှင် ၂၅၂ ဦးထံမှ ဧက ၆၂၉ ကျော်အတွက်
ဒဏ်ကြေး ကျပ်သိန်းခုနစ်ထောင်ကျော်ရရှိခြင်းဖြစ်ကြောင်း ၄င်းက ဆိုသည်။

လယ်ယာမြေများပေါ်တွင် အဆောက်အဦဆောက်ခြင်း၊ လမ်းဖောက်ထားခြင်းနှင့် အခြားလုပ်ငန်းများ လုပ်ကိုင်နေမှုများကို သက်ဆိုင်ရာမြို့နယ် လယ်ယာမြေ စီမံခန့်ခွဲရေးအဖွဲ့က စိစစ်ချက်အရ အရေးယူထားခြင်းဖြစ်ကြောင်း ၄င်းက ရှင်းပြသည်။

လယ်ယာမြေများပေါ်တွင် အခြားလုပ်ငန်းလုပ်ကိုင်လိုပါက အသုံးပြုခွင့်လျှောက်ထားရန် လိုအပ်ပြီး ယာမြေဖြစ်ပါက တိုင်းဒေသကြီးအစိုးရက ခွင့်ပြုချက်ပေးနိုင်ပြီး လယ်မြေဖြစ်ပါက လယ်ယာမြေလျှောက်ထားရကြောင်း အဆိုပါဌာနထံမှသိရသည်။

လယ်ယာမြေများပေါ်တွင် မွေးမြူရေးလုပ်ငန်း လုပ်ကိုင်နေသူများအနေနှင့် ဥပဒေနှင့်အညီ ဒဏ်ကြေး တစ်ဧကလျှင် ဒဏ်ငွေကျပ် ၁ဝသိန်းပေးဆောင်ကာ လယ်ယာမြေ အခြားနည်းအသုံးပြုခွင့်ချထားပေးမှုရှိသော်လည်း ကြန့်ကြာမှုများ ရှိနေကြောင်း မန္တလေးတိုင်း
ဒေသကြီးအတွင်းရှိ မွေးမြူရေးလုပ်ငန်းရှင်များက ဆိုသည်။

လယ်ယာမြေများပေါ်တွင် လူနေရန်အတွက် အကွက်ရိုက်ရောင်းချနေမှုများ ရှိနေသည့်
အပြင် မန္တလေးမြို့အနီးတစ်ဝိုက်ရှိ လယ်ယာမြေများပေါ်တွင် နေအိမ်များဆောက်လုပ်ကာ ကျေးရွာများချဲ့ထွင်လာသဖြင့် စိုက်ပျိုးမြေများ ဆုံးရှုံးလျက်ရှိကြောင်း မန္တလေးမြို့အခြေစိုက် အိမ်ခြံမြေအကျိုးဆောင်များက ပြောကြားသည်။

လယ်ယာမြေများပေါ်တွင် အခြားနည်းအသုံးပြုခွင့် လျှောက်ထားရာတွင် စက်သုံးဆီအရောင်းဆိုင်များ၊ ဟိုတယ်များဆောင်ရွက်ရန် လျှောက်ထားမှုရှိကြောင်း မန္တလေးတိုင်းဒေသကြီး လယ်ယာမြေစီမံခန့်ခွဲရေးနှင့် စာရင်းအင်းဦးစီးဌာနထံမှ သိရသည်။


No comments: