Posted: September 24, 2016
မုံရွာမြို့ရှိ သတင်းထောက် ကိုအောင်နေမျိုး ဖွင့်လှစ်ထားသည့် FOTO စားသောက်ဆိုင်သို့ ရပ်ကွက်အုပ်ချုပ်ရေးမှူး၏ သား ပါဝင်သည့်လူတစ်စုမှ ၀င်ရောက်ဖျက်ဆီးခြင်းများ ပြုလုပ်သွားကြောင်း ကိုအောင်နေမျိုးက The Ladies News သို့ပြောသည်။
မုံရွာမြို့၊ နတ်လူထိပ်ပန်ရပ်ကွက်၊ ဗိုလ်ချုပ်လမ်း၊ ဘိုးဘွားရိပ်သာအဝိုင်းအနီးတွင် ဖွင့်လှစ်ထားသည့် သတင်းထောက် ကိုအောင်နေမျိုး၏ FOTO စားသောက်ဆိုင်သို့ စက်တင်ဘာ ၂၃ ရက် ည ၁၀နာရီခန့်က ရပ်ကွက်အုပ်ချုပ်ရေးမှူး၏ သား ပါဝင်သည့် လူတစ်စုမှ ဆိုင်တွင် စားသုံးသူများအား နှောင့်ယှက်ခြင်းနှင့် ဆိုင်ရှိ ပစ္စည်းများကို ဖျက်ဆီးခြင်းများ ပြုလုပ်သွားကြောင်း သိရသည်။
ကိုအောင်နေမျိုးက “သူတို့ ၆ ယောက်လောက် လာတယ်။ ၆ ယောက်လာပြီး သောက်နေကြတယ်။ သောက်နေကြပြီး တစ်ယောက်ထဲသမားကို ရန်ရှာတယ်။ နောက် ဘေးမှာသောက်နေသူတွေပါ ၀ိုင်းရန်ရှာတယ်။ အဲ့ဒီချိန် ကျွန်တော်မရှိဘူး။ ကျွန်တော်မြို့ထဲကဆိုင်ကို ရောက်နေတယ်။ FOTO 2 မှာ ရောက်နေတယ်။ ကလေးတွေ ဖုန်းဆက်တဲ့ အချိန် သူတို့က ပြန်သွားကြတယ်။ နောက် တုတ်တွေ ဓားတွေနဲ့ လူအယောက်(၂၀)လောက် လူအုပ်စုဖွဲ့ပြီး ပြန်လာတယ်။ ကျွန်တော်ကို ရန်ရှာတာပေါ့။ ဖျက်မယ်ပြုမယ် ရိုက်မယ်ပြုမယ်ဆိုပြီး ကြိမ်းမောင်းတယ်” ဟု ပြောသည်။
ယင်းသို့ ရန်ရှာခြင်းများ ပြုလုပ်နေစဉ် ကိုအောင်နေမျိုး၏ မိသားစုဝင်များ ရောက်ရှိလာပြီး ဖြန်ဖြေပေးသည့်အခါမှ ပြန်သွားကြကြောင်းဆိုသည်။ အဆိုပါကိစ္စနှင့်ပတ်သက်ပြီး ကိုအောင်နေမျိုးအနေဖြင့် စက်တင်ဘာ ၂၄ ရက် နေ့လယ်ပိုင်းတွင် မုံရွာမြို့ရဲစခန်းတွင် အမှုဖွင့်တိုင်ကြားထားကြောင်း သိရသည်။
ထိုကဲ့သို့ရန်ရှာသည့်အတွက် ကိုအောင်နေမျိုးနှင့် ဆိုင်ဝန်ထမ်းများအနေဖြင့် ထိခိုက်ဒဏ်ရာမရရှိသော်လည်း ဆိုင်တွင်လာသောက်ပြီး နှောင့်ယှက်ခံရသည့် လူငယ်အချိ်ု့မှာ ဒဏ်ရာအနည်းငယ် ရရှိကြောင်းနှင့် ဆိုင်မှ ပစ္စည်းများကို ဖျက်ဆီးခြင်းများရှိကြောင်း ယင်းကဆိုသည်။
ကိုအောင်နေမျိုးက “ဒါကြီးက လုံးဝမင်းမဲ့စရိုက်ဆန်ဆန် လုပ်တာ။ နောက် ရဲတွေရောက်လာပြီး ရပ်ကွက်ထဲလိုက်စုံစမ်းလိုက်တော့ ဥက္ကဋ္ဌသား ဖြစ်နေတယ်။ ရပ်ကွက်ထဲက အုပ်ချူပ်ရေးမှူး ဦးသန်းဝေရဲ့ သားဖြစ်နေတယ်။ အခု သက်သက်ကြီး ကို ဖြစ်နေတယ်။ သူနဲ့လည်း ရန်ငြိုးရန်စဖြစ်ဖို့ နေနေသာသာ စကားလည်း မပြောဖူးဘူး။ တစ်ခါမှလည်း မပတ်သက်ဖူးဘူး။ ဆိုင်မှာလည်း တစ်ခါမှ လာမသောင်းကျန်းဖူးဘူး။ ရန်ငြိုးရန်စ မရှိဘဲဆိုင်ကို ဘာလို့ အစိမ်းသက်သက် လာသောင်းကျန်းသွားလည်းပေါ့”ဟု ပြောသည်။
ကိုအောင်နေမျိုးမှာ သူ၏ ဖေ့စ်ဘုတ်တွင် တပ်မတော်အား မဖွယ်မရာဖြစ်စေသည့် ဓာတ်ပုံဖြန့်ဝေသည်ဆိုပြီး သမ္မတ ဦးသိန်းစိန် လက်ထက်က ခေတ္တထိန်းသိမ်းခြင်းခံခဲ့ရဖူးသူ ဖြစ်ကြောင်းလည်း သိရသည်။
စိုင်းဟန်
The Ladies News
No comments:
Post a Comment