ကေအိုင်အေထိန်းချုပ်နယ်မြေအတွင်းရှိ ကျေးရွာ ၁၆ ရွာ ပေါင်းထားသော
အင်ခေါင်းပါစစ်ဘေးရှောင်စခန်းမှ ကလေးငယ်များ
ကချင်ပြည်နယ်သို့ ရောက်ရှိနေသည့် မြန်မာနိုင်ငံဆိုင်ရာ အမေရိကန်သံအမတ် စကော့မာစီရယ်သည် ကချင်ပြည်နယ်အတွင်းရှိ စစ်ဘေးရှောင် ဒုက္ခသည်များကို အကူအညီပေးရန် စဉ်းစားသွားမည်ဟု ပြောကြားခဲ့ကြောင်း ကချင်ပြည်နယ် အမျိုးသမီးများကွန်ရက်ထံမှ သိရ သည်။
စက်တင်ဘာလ ၂၆ ရက်နေ့က မြစ်ကြီးနားမြို့ကို ရောက်ရှိခဲ့သည့် သံအမတ်ကြီးသည် ကချင်ပြည်နယ်ရှိ အစိုးရအဖွဲ့ဝင်များ၊ အရပ်ဘက် လူမှုအဖွဲ့အစည်းများနှင့် မိုင်းနား KBC စစ်ဘေး ဒုက္ခသည်စခန်းသို့ သွားရောက် လေ့လာခဲ့ကြောင်း ယင်းကွန်ရက်ထံမှ သိရသည်။
အမေရိကန် သံအမတ်ကြီးသည် ကချင်ပြည်နယ်တွင်း တွေ့ရှိခဲ့သော အခြေအနေများ၊ ဒေသခံများနှင့် စစ်ဘေးဒုက္ခ သည်များ၏ အခက်အခဲများကို အမေရိကန် အစိုးရအဖွဲ့ အပါအ၀င် တာဝန်ရှိသူများကို တင်ပြပြီး အခက်အခဲ ပြဿနာများကို ကူညီပေးနိုင်ရန် စဉ်းစားပေးသွားမည်ဟု ပြောကြားခဲ့ကြောင်း ၎င်းတို့ကဆိုသည်။
မြန်မာနိုင်ငံဆိုင်ရာ အမေရိကန်သံအမတ်သည် စက်တင်ဘာလ ၂၆ ရက်နေ့ ညနေပိုင်းတွင် ကချင်ပြည်နယ်ရှိ အရပ် ဘက် လူမှုအဖွဲ့အစည်းများနှင့် တွေ့ဆုံခဲ့ပြီး လူ့အခွင့်အရေး ကိစ္စများ၊ အမျိုးသမီး ကဏ္ဍများ၊ သဘာဝ သယံဇာတကိစ္စများနှင့် ငြိမ်းချမ်းရေး ဖော်ဆောင်မှု လုပ်ငန်းစဉ်များအကြောင်းကို ဆွေးနွေးခဲ့ကြောင်း ကချင်ပြည်နယ် အမျိုးသမီးများကွန်ရက် တည်ထောင်သူ ဒေါ်နန်းပူက ပြောသည်။
"ကျွန်မကတော့ အစိုးရရဲ့ ငြိမ်းချမ်းရေး လုပ်ငန်းစဉ်တွေမှာ အမျိုးသမီးများ ပါဝင်လာနိုင်ဖို့ အစိုးရကို တိုက်တွန်း ပြောကြားပေးဖို့ရယ်၊ IDP စခန်းတွေမှာရှိတဲ့ အမျိုးသမီး ဒုက္ခသည်တွေရဲ့ အခက်အခဲတွေကို တင်ပြခဲ့တယ်၊ သူ့အနေနဲ့ကတော့ အကောင်းဆုံး ကူညီပေးဖို့ စဉ်းစား သွားမယ်လို့ ပြောသွားပါတယ်" ဟု ၎င်းက ဆိုသည်။
ထို့ပြင် မြန်မာနိုင်ငံအတွင်းရှိ ဆန်ရှင် ကိစ္စရပ်များ၊ ဗီဇာပိတ်ဆို့မှုများ၊ စီးပွားရေး ရင်းနှီးမြှုပ်နှံမှုများ ပြုလုပ်ရာတွင် ဒေသခံများ၏ သဘောဆန္ဒများကို ရယူကာ ဆောင်ရွက်သွားမည်ဟု ပြောကြားခဲ့ကြောင်း ၎င်းကဆိုသည်။
"ကျွန်မတို့အနေနဲ့က မြစ်ဆုံစီမံကိန်းနဲ့ အခြားသော ပြည်ပ ရင်းနှီးမြှုပ်နှံမှုတွေက ငြိမ်းချမ်းရေး ဖော်ဆောင်နေချိန် မှာ ပဋိပက္ခကို ပိုပြီးတော့ ကြီးမားစေတဲ့အတွက် ရင်းနှီးမြှုပ်နှံမှုတွေ ရပ်တန့်ပေးဖို့ လိုချင်ကြောင်း ပြောခဲ့တဲ့အခါမှာ သူ့အနေနဲ့ကလည်း ထောက်ခံတယ်၊ မြစ်ဆုံစီမံ ကိန်းနဲ့ ပတ်သက်လို့လည်း လုံးဝရပ်ဆိုင်းပေးဖို့ တိုက်တွန်း တောင်းဆိုခဲ့ပါတယ်"ဟု ၎င်းက ရှင်းပြသည်။
သုံးရက်တာ ကြာမြင့်မည့် သံအမတ်ကြီး၏ ကချင်ပြည်နယ်ခရီးစဉ်အတွင်း ကချင်ပြည်နယ် အစိုးရအဖွဲ့၊ ဒေသခံ ဘာသာရေး အသင်းအဖွဲ့ အသီးသီးမှ ခေါင်းဆောင်များ၊ အရပ်ဘက် လူမှုအဖွဲ့အစည်းများ၊ ဒေသခံ ပြည်သူများနှင့် တွေ့ဆုံပြီး ကချင်ပြည်နယ်အတွင်း အမေရိကန် ပြည်ထောင်စုဘက်မှ အကူအညီ ပေးနိုင်ရေးနှင့် အနာဂတ်တွင် မည်သို့ ပူးပေါင်း ဆောင်ရွက်သွားကြမည်များကို ဆွေးနွေးသွားမည်ဖြစ်ကြောင်း ရန်ကုန်အခြေစိုက် အမေရိကန်သံရုံးက သတင်းထုတ်ပြန်ထားသည်။
မြန်မာနိုင်ငံဆိုင်ရာ အမေရိကန်သံအမတ်ကြီး စကော့မာစီရယ်၏ ယခုခရီးစဉ်သည် ကချင်ပြည်နယ်ကို ပထမဆုံးအကြိမ် ခရီးစဉ်လည်းဖြစ်သည်။
No comments:
Post a Comment