မြန်မာနိုင်ငံ လူဦးရေ၏ ၁၀ ရာခိုင်နှုန်းခန့်သည် စိတ်ရောဂါခံစားနေရကြောင်း စိတ်ရောဂါကု ဆရာဝန်ကြီးများက ပြောကြားသည်။
‘‘ကမ္ဘာမှာတော့ လူတစ်ရာမှာ ၁၂ ရာခိုင်နှုန်းကနေ ၂၀ ရာခိုင်နှုန်းလောက်အထိက စိတ်ရောဂါဖြစ်တယ်လို့ WHO က စာရင်းလုပ်ထားတယ်။ မြန်မာမှာလည်းမြို့နယ် နှစ်ခုလောက်ကို စစ်တမ်းကောက်တဲ့အခါမှာတော့ စိတ်ရောဂါခံစားနေရတဲ့သူ ၈ ဒသမ ၇ ရာခိုင်နှုန်း လောက်သွားတွေ့တယ်။ အဲဒါက သိသာ၊ အဖြစ်များတဲ့ စိတ်ရောဂါတွေ။ မူးယစ်ဆေးလို သေးသေးကွေးကွေးတွေမပါသေးဘူး။ အဲဒါတွေပါထည့်ပေါင်းရင် ၁၀ ရာ ခိုင်နှုန်းပဲထားဦး။ ၁၀ ရာခိုင်နှုန်းဆိုရင်တောင် လူဦးရေ ငါးသန်းလောက်ရှိနေပြီ’’ဟု မြန်မာနိုင်ငံ ဆရာဝန်အသင်း စိတ်ကျန်းမာရေးပညာအဖွဲ့ဥက္ကဋ္ဌ ပါမောက္ခ ဒေါက်တာဝင်းအောင်မြင့်က ပြောကြားသည်။
ယင်းစစ်တမ်းအရ စိတ်ဖောက်ပြန်၊ စိတ်ကျ၊ စိတ်ကြွ၊ စိတ်ကစဥ့်ကလျား၊ စိုးရိမ်စိတ်လွန်ကဲသော စိတ်ရောဂါ၊ အတက်ရောဂါနှင့် ဆက်စပ်နေသော စိတ်ရောဂါစသည်တို့ကို အများဆုံးတွေ့ရကြောင်း သိရသည်။
ထို့ကြောင့် ကျန်းမာရေးနှင့် အားကစားဝန်ကြီးဌာနနှင့် မြန်မာနိုင်ငံ ဆရာဝန်အသင်းတို့ပူးပေါင်း၍ ပြည်သူလူထုအခြေပြုစိတ်ကျန်းမာရေးစောင့်ရှောက်မှုအစီအစဉ်များ အရှိန်မြှင့်တင်ဆောင်ရွက်မည်ဖြစ်ကြောင်း ပါမောက္ခဒေါက်တာ ၀င်းအောင်မြင့်က ဆက်လက် ပြောကြားသည်။
‘‘အမြန်ဆုံးတော့လုပ်ရမှာပေါ့။ ပြီးတော့ ကျွန်တော်တို့ဆီမှာက လူ့သက်တမ်းရှည်လာတာနဲ့အမျှ အသက်ကြီးတဲ့သူတွေရဲ့ စိတ်ကျန်းမာရေးပြဿနာကလည်း များလာတယ်။ သူငယ်ပြန်တာမျိုးတွေလည်း တော်တော်များတယ်။ အဲဒါတွေကိုလည်းသေသေချာချာ စောင့်ရှောက်မှုစနစ်က မရှိဘူး။ ကိုယ်ဝန်ဆောင်တွေ၊ ကလေးမွေးပြီးတဲ့ မိခင်တွေနဲ့ ကလေးသူငယ်စိတ်ကျန်းမာရေးစောင့်ရှောက်မှုစနစ်တွေလည်း မရှိဘူး။ အရက်ပြဿနာ၊ မူးယစ်ဆေးပြဿနာဆိုလည်း တဖြည်းဖြည်းနဲ့အရမ်းတက် လာတယ်။ အဲဒီလိုမျိုး စိတ်ကျန်း မာရေးပြဿနာတွေနဲ့ လက်ရှိရှိနေတဲ့ ၀န်ဆောင်မှုနဲ့ယှဉ်ပြိုင်ပြီး Nation Health Plan တွေဆွဲလုပ်ရမယ်’’ ဟု ၎င်းကပြောသည်။
ရွာသာကြီးစိတ်ကျန်းမာရေးဆေးရုံကြီးတွင် ၂၀၁၁ က လူနာ ၈,၆၇၂ ဦး၊ ၂၀၁၄ တွင် ၁၃,၈၃၉ ဦးရှိခဲ့ပြီး ၂၀၁၅ တွင် ၁၆,၁၀၁ ဦးအထိရှိခဲ့ကြောင်း ယင်းဆေးရုံမှတ်တမ်းများ၌ ဖော်ပြထားသည်။ မြန်မာနိုင်ငံတွင် လက်ရှိ၌ ရွာသာကြီး စိတ်ကျန်းမာရေးဆေးရုံကြီး၊ မန္တလေးစိတ်ကျန်းမာရေးဆေးရုံကြီးအပြင် ချင်းပြည်နယ်ကလွဲ၍ ကျန်တိုင်းနှင့်ပြည်နယ်များရှိ ဆေးရုံကြီးများ၌ စိတ်ရောဂါကုဌာနပေါင်း ၃၀ ခန့်ရှိကြောင်း သိရှိရသည်။
No comments:
Post a Comment