Kachin Daily News
23 hrs ·
KIA အဖွဲ့မှ ရှမ်းနီရိုးရာစာပေနှင့်ယဉ်ကျေးမှုအဖွဲ့ဝင်များအား ပစ်မှတ်ထားလိုက်လံမှုကြောင့် ထွက်ပြေးတိမ်းရှောင်
23-10-2015
ကချင်ပြည်နယ်၊ မိုးညှင်းမြို့နယ်တွင် KIA အဖွဲ့မှ ရှမ်းနီရိုးရာစာပေနှင့်ယဉ်ကျေးမှုအဖွဲ့ဝင်များအား လိုက်လံပစ်ခတ် သတ်ဖြတ်နေကြောင်း ယင်းဒေသခံများထံမှ သိရသည်။
မိုးညှင်းမြို့နယ်၊ နန့်မွန်းကျေးရွာရှိ ရှမ်းနီရိုးရာစာပေနှင့်ယဉ်ကျေးမှုအဖွဲ့တာဝန်ခံ ဦးစိုင်းဖုန်းကျော်အား ပစ်ခတ် သတ်ဖြတ်ရန်အတွက် ၎င်း၏နေအိမ်သို့ အောက်တိုဘာလ ၂၂ ရက်နေ့တွင် KIA အဖွဲ့တစ်ဖွဲ့ ရောက်ရှိ လာကြောင်း နန့်မွန်းကျေးရွာသား တစ်ဦးက ပြောပြသည်။
“ဒီရွာမှာ ကျွန်တော်က ရှမ်းနီရိုးရာစာပေနဲ့ ယဉ်ကျေးမှုအဖွဲ့တာဝန်ခံ လုပ်နေတာပါ၊ ပြီးခဲ့တဲ့တစ်ပတ်လောက်က ဖားကန့်ဘက်မှာ ကျွန်တော်တို့ အဖွဲ့ဝင် ၂ ယောက်ကို KIA အဖွဲ့က အကြောင်းမဲ့ ပစ်သတ်ခဲ့တယ်လေ၊ အဲဒီနာရေး ကိစ္စကို ဆောင်ရွက်ခဲ့ပြီးပြန်ရောက်တော့ ဒီကောင်တွေက ကျွန်တော့်အိမ်ကိုရောက်လာတယ်၊ အိမ်တံခါးကို ခေါက်ပြီးနိုးတယ်၊ ကျွန်တော်လည်း အသတ်ခံရမှာကြောက်လို့ တံခါးဖွင့်မပေးဘဲ ခေါင်းရင်း ပြူတင်းပေါက်ကနေ ခုန်ဆင်းပြီး ထွက်ပြေးခဲ့တာပါ၊ တောအတွင်းမှာပဲ ပုန်းနေခဲ့ရတယ်၊ ကျွန်တော်တို့အဖွဲ့တွေက ရပ်ရွာကောင်းကျိုးအတွက် ဆောင်ရွက်နေတော့ ရွာသူ/ရွာသားတွေကလည်း လေးစားကြပါတယ်၊ အဲဒါကို ဒီကောင်တွေက အကြောင်းမဲ့သက်သက် လိုက်သတ်နေတာ ”ဟု နန့်မွန်းကျေးရွာမှ ဦးစိုင်းဖုန်းကျော်က ပြောပါသည်။
KIA အဖွဲ့သည် ရှမ်းနီရိုးရာစာပေနှင့်ယဉ်ကျေးမှုအဖွဲ့၏ လှုပ်ရှားဆောင်ရွက်သည့် အဖွဲ့ဝင်များအား ပစ်မှတ်ထား၍ တိုက်ခိုက်မှုများကြောင့် ဖားကန့်ဒေသမှ အဖွဲ့ဝင် ၂ ဦး သေဆုံးခဲ့ပြီး ဦးစိုင်းဖုန်းကျော်နှင့် ဦးဇော်ဝင်းသိန်းတို့မှာ ထွက်ပြေး တိမ်းရှောင်နေကြကြောင်း သိရသည်။
နော်ဂျာ
No comments:
Post a Comment