ကြံ့ခိုင်ရေးနေရာ ဖယ်ပေးရန်မရှိဟု ရထားဝန်ကြီးဟောင်း ဦးသန်းဌေးပြော
===================================
၂၉..၁၀..၁၅
-
ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ (ကြံ့ခိုင်ရေး) အနေဖြင့် နိုင်ငံနှင့်လူမျိုးအတွက် အလုပ်မ လုပ်နိုင်သော သူများအတွက် နေရာ ဖယ်ပေးမည် မဟုတ်ကြောင်းရထားပို့ဆောင်ရေးဝန်ကြီးဟောင်းလည်းဖြစ်၊ ကြံ့ခိုင်ရေးပါတီ၏ ဗဟိုအလုပ်အမှုဆောင်လည်းဖြစ်သူ ဦးသန်းဌေးက ပြောဆိုလိုက်သည်။
-
ပဲခူးတိုင်းဒေသကြီး၊ သာယာဝတီခရိုင် ဘောလုံးအားကစားကွင်းတွင် ယနေ့ ကျင်းပပြုလုပ်သောကြံ့ခိုင်ရေး ပါတီ၏ လူထုတွေ့ဆုံပွဲတွင် ၎င်းက အထက်ပါအတိုင်းပြောဆိုလိုက်ခြင်းဖြစ်ပြီး ကြံ့ခိုင်ရေးပါတီထက် အလုပ်ပို၍ မလုပ်နိုင်သော ပါတီများကို နေရာဖယ်ပေးမည်မဟုတ်ကြောင်း၊ အပြောင်းအလဲ ဆိုင်းဘုတ်ထောင်ထားသူများကို နေရာဖယ်ပေးရန် မရှိဟု ဦးသန်းဌေးက ပြောဆိုခဲ့သည်။
-
“အပြောင်းအလဲအတွက် ဆိုင်းဘုတ်ကြီး တပ်ပြီး ဦးသန်းဌေး ခင်ဗျားဖယ်ပေးဆိုရင် လာလေ ပြိုင်မယ်။ ကိုယ့်ထက် ပိုသာ ရင် လက် ခုပ်တီးပေးမယ်။ အဲ့ဒီလောက်မှမလုပ်နိုင်ဘဲ နဲ့ငါတို့ကိုလာပြီးဟောက်စား မလုပ် နဲ့တသက်လုံးမဖယ်ဘူး။ ပါတီ ကိုကြည့်ပါ၊လူကိုမကြည့်ပါနဲ့ဆိုတာ အလကား။ အဲ့ဒီလူမှာ အစွမ်းအစ မရှိရင် ၊ ကြံရည်ဖန်ရည်မရှိရင် စေတနာမရှိရင်၊ လုပ်အားမရှိရင် ၊ ထကြွလုံ့လ မရှိရင် ဘာမှဖြစ် မလာဘူး။ ဟိုဆိုင်းဘုတ်ကြီးက ဘာမှမကယ်နိုင်ဘူး” ဟု ဦးသန်းဌေးက ပြောသည်။
-
မိမိကိုယ်ကိုကိုယ် တိုင်းပြည်နှင့်လူထုက အထင်ကြီးသော ခေါင်းဆောင်
အဖြစ် မှတ်ယူနေသူများကိုလည်း မရွေးချယ်ကြရန် လိုကြောင်း၊ ထိုသို့
သော သူမျိုးကို ရွေးချယ်ပါက မိမိ၏ သေတွင်း မိမိတူးသကဲ့သို့ ဖြစ်နေမည်ဖြစ်ကြောင်း၊ မြန်မာနိုင်ငံတွင် သွေးထွက်သံယိုမရှိဘဲ ဒီမိုကရေစီအပြောင်းအလဲ ဖော်ဆောင်နိုင်ခြင်းမှာ သမ္မတဦးသိန်းစိန်၏ ဆောင်ရွက်ချက်ကြောင့် ဖြစ်ကြောင်း ၎င်းက ဆက်လက် ပြောဆိုသည်။
-
“တိုင်းပြည် နဲ့လူထုကအထင်ကြီးတဲ့ခေါင်းဆောင်တစ်ယောက် လိုသိပ်ထင်လာရင် အဲ့ဒီလူကိုခင်ဗျား တို့ မရွေးလိုက်ပါနဲ့။ ကိုယ့် သေတွင်းကိုယ် တူးချင်လို့ရွေးချင်လည်းရွေးလိုက်ကြတဲ့။ ကျနော်ပြောတာမဟုတ်ဘူး။ အဲ့ဒီ ဆိုင်းဘုတ်ကြီးထဲက ဦးထုပ်ကြီးနဲ့ ဗိုလ်ချုပ် အောင်ဆန်း ပြောထားတာ” ဟု ဦးသန်းဌေးက ဆက်လက်ပြောကြားသည်။
-
ကြံ့ခိုင်ရေးပါတီသည် မြန်မာလူမျိုး ကမ္ဘာ့မြေပုံမှ မပျောက်စေရန် လုပ်ဆောင်နေကြောင်း၊ မျိုးစောင့်ဥပဒေသည် ကြံ့ခိုင်ရေးပါတီ၏ ကြိုးပမ်းဆောင်ရွက်ချက်ဖြစ်ကြောင်း၊ မျိုးစောင့်ဥပဒေသည် ဘာသာရေးကို နိုင်ငံရေးကို အသုံးချနေသည်ဟု ပြောဆိုနေသူများသည် အောက်တန်းကျသူများဖြစ်ကြောင်း ဦးသန်းဌေးက ဆိုသည်။
-
“ကျနော်တို့ကာလမှာ ကျနော်တို့အစိုးရ လက်ထက်မှာ မြန်မာနိုင်ငံအတွက် အပြောင်းအလဲများစွာအနက် ဟောဒီလူမျိုး တွေ ကမ္ဘာ့မြေပုံထဲက မြန်မာနိုင်ငံမပျောက်အောင် လုပ်ခဲ့တဲ့လုပ်ကွက်တစ်ခု ရှိတယ်။အားလုံးသိပါတယ်။ မျိုးစောင့်ဥပဒေ။ ဟုတ်တယ်နော်။ ကျနော်တို့ ဥပဒေထုတ်ပြီးမှမကာကွယ်ရင်မရတော့ဘူး။ အဲ့ဒါဘာသာရေးနဲ့ဘာမှ မဆိုင်ဘူး။ အဲ့ဒါကို ဒီနေ့ကျနော်တို့ကို ဘာသာရေးကိုခုတုံးလုပ်တယ်။ အင်မတန် အောက်တန်းကျတဲ့ အလုပ်ဖြစ်တယ်။ အဲသလိုပြောနေတဲ့ လူတွေရှိတယ်။ အဲ့သလိုပြောနေတဲ့လူတွေကသာ အောက်တန်းကျတဲ့ လူတွေဖြစ်တယ်ဆိုတာ မှတ်ထားပါ ” ဟု ပြောကြားခဲ့သည်။
-
ရထားပို့ဆောင်ရေးဝန်ကြီးဟောင်း ဦးသန်းဌေးသည် ကြံ့ခိုင်ရေးပါတီ ကိုယ်စားပြု၍ မြန်အောင်မြို့နယ် ပြည်သူ့လွှတ်တော်
ကိုယ်စားလှယ်လောင်းအဖြစ် ၀င်ရောက်ယှဉ်ပြိုင်မည်ဖြစ်သည်။
-
ကြံ့ခိုင်ရေးပါတီ မဲဆွယ်စည်းရုံးရေးပြုလုပ်သော အားကစားကွင်းသည် အားကစားဝန်ကြီးဌာနပိုင် ခရိုင်အားကစားဖြစ်ပြီး ပါတီနိုင်ငံရေးအတွက် ယင်းကွင်းအသုံးပြုခွင့်မပေးဟု ၀န်ကြီးဌာနက ကြေညာချက် ထုတ်ပြန်ထားသော်လည်း ကြံ့ခိုင်ရေး ပါတီကိုမူ အသုံးပြုခွင့်ပေး
ခဲ့သည့်အပေါ် အမျိုးသားဒီမိုကရေစီအဖွဲ့ချုပ်(NLD) သာယာဝတီမြို့နယ်
က ကန့်ကွက်သွား မည်ဟု သိရှိရသည်။
========
ဧရာဝတီ
No comments:
Post a Comment