မည်သည့်ပါတီမဆို အနိုင်ရပါက အာဏာကို ငြိမ်းချမ်းစွာ လွှဲပြောင်းမည်ဟု သမ္မတဦးသိန်းစိန် ပြောကြား
Published on Mon, 10/26/2015 - 20:42
Photo: CBS NEWS
ဒေါ်အောင်ဆန်းစုကြည် (သို့မဟုတ်) အခြားပါတီတစ်ခုခုမှ ရွေးကောက်ပွဲတွင် အနိုင်ရပါက အာဏာကို ငြိမ်းချမ်းစွာ လွှဲပြောင်းမည်ဟု အမေရိကန် အခြေစိုက် CBS News ရုပ်သံသတင်းဌာနမှ အောက်တိုဘာ ၂၅ ရက်တွင် ထုတ်လွှင့်သည့် ရုပ်သံအစီအစဉ်၌ သမ္မတဦးသိန်းစိန်က ပြောကြားသည်။ ၁၉၉၀ ရွေးကောက်ပွဲတွင် အတိုက်အခံပါတီမှ အနိုင်ရခဲ့သော်လည်း အာဏာလွှဲ မပေးခဲ့ကြောင်းနှင့် ၂၀၁၅ ရွေးကောက်ပွဲတွင် အလားတူဖြစ်ရပ် မဖြစ်ပွားစေရန် အာမခံနိုင်သလား မေးမြန်းရာတွင် သမ္မတဦးသိန်းစိန်က “အဲဒီလိုမျိုး (မဖြစ်ဘူးလို့) ယုံကြည်ပါတယ်။
၁၉၉၀ ကလို အခြေအနေမျိုးဖြစ်ဖို့ အခွင့်အရေး လုံးဝမရှိပါဘူး။ ဒီနှစ် ရွေးကောက်ပွဲက လွတ်လပ်ပြီး တရားမျှတမယ်လို့ အခိုင်အမာ ယုံကြည်ပါတယ်” ဟု ဖြေကြားခဲ့သည်။ ထို့အပြင် ဆက်လက်၍ အတိုက်အခံ ခေါင်းဆောင် ဒေါ်အောင်ဆန်းစုကြည်နှင့် ဆက်ဆံရေးကို မေးမြန်းရာတွင် “ကျွန်တော်တို့ကြားမှာ ပြဿနာ ကြီးကြီးမားမား မရှိပါဘူး။ ကျွန်တော်တို့ဟာ လုပ်ဖော်ကိုင်ဖက်တွေ မဟုတ်ရင်တောင် ရန်သူတွေတော့ မဟုတ်ပါဘူး။ ဒေါ်အောင်ဆန်းစုကြည် ပဲဖြစ်ဖြစ် တခြား ပါတီတစ်ခုခု ပဲဖြစ်ဖြစ် အနိုင်ရတယ်ဆိုရင် အာဏာကို ငြိမ်းငြိမ်းချမ်းချမ်း လွှဲပြောင်းမှာပါ” ဟု သမ္မတ ဦးသိန်းစိန်က ပြောကြားသည်။
အဆိုပါ အစီအစဉ်တွင် ဒေါ်အောင်ဆန်းစုကြည်ကို ရွေးကောက်ပွဲ လွတ်လပ်ပြီး တရားမျှတမှု ရှိရန် ယုံကြည်သလား မေးမြန်းရာတွင် ဒေါ်အောင်ဆန်းစုကြည်က “ကျွန်မတို့အနေနဲ့ ခုချိန်မှာ (ရွေးကောက်ပွဲ လွတ်လပ်ပြီး တရားမျှတမှု ရှိ မရှိ) ယုံကြည်ဖို့ လိုအပ်တယ်လို့ မထင်ပါဘူး။ ခုချိန်မှာ လိုအပ်တာက တတ်နိုင်သလောက် ရွေးကောက်ပွဲကို လွတ်လပ်ပြီး တရားမျှတအောင် ကြိုးစား လုပ်ဆောင်ဖို့ပါ။ ဒီတော့ ခုချိန်ဟာ စိန်ခေါ်မှုတွေ ရှိနေတဲ့ အချိန်ပါ။ စိန်ခေါ်မှုဆိုတာ အခွင့်အရေးလည်း ဖြစ်ပါတယ်” ဟု ပြန်လည် ဖြေကြားခဲ့သည်။
ဆက်လက်၍ ဒေါ်အောင်ဆန်းစုကြည်က မြန်မာနိုင်ငံသည် လက်ရှိတွင် တပ်မတော် ခေါင်းဆောင်များ ရှုမြင်သည့် ‘စည်းကမ်း ပြည့်ဝသော ဒီမိုကရေစီ’ လမ်းကြောင်းပေါ်သို့ ရောက်ရှိနေကြောင်းနှင့် အဆိုပါ စနစ်သည် ၎င်းရှုမြင်သည့် ဒီမိုကရေစီပုံစံနှင့် ထပ်တူကျခြင်း မရှိကြောင်း ပြောကြားခဲ့သည်။ ထို့အပြင် ဒေါ်အောင်ဆန်းစုကြည်အပေါ် အရှင်ဝီရသူ၏ အမြင်ကို မေးမြန်းရာတွင် အရှင်ဝီရသူက “အမျိုးသားရေးနဲ့ နိုင်ငံ့လုံခြုံရေးနဲ့ သက်ဆိုင်လာရင်တော့ အသုံးမတည့်ပါဘူး” ဟု မိန့်ကြားသည်။
အမေရိကန် အခြေစိုက် CBS News ရုပ်သံဌာနမှ အောက်တိုဘာ ၂၅ ရက်က မြန်မာ့နိုင်ငံရေးနှင့် ပတ်သက်၍ The New Burma ခေါင်းစဉ်ဖြင့် ထုတ်လွှင့်ခဲ့ခြင်းဖြစ်ပြီး သမ္မတဦးသိန်းစိန်၊ ဒေါ်အောင်ဆန်းစုကြည်တို့နှင့် တွေ့ဆုံ မေးမြန်းမှုများ ပါဝင်သည်။ အောက်တိုဘာ၂၄ ရက်က ရန်ကုန်တိုင်းဒေသကြီး ကော့မှူးမြို့နယ် မဲဆွယ်စည်းရုံးရေး ခရီးစဉ်တွင် ဒေါ်အောင်ဆန်းစုကြည်အား ဒေသခံတစ်ဦးက အစိုးရအနေဖြင့် နောက်ကြောင်း ပြန်လှည့်သည့် လုပ်ရပ်မျိုး လုပ်ဆောင်ပါက ပြည်သူများ မည်ကဲ့သို့ ပါဝင်ရမည်ဆိုသည်ကို သိလိုကြောင်း မေးမြန်းရာ ဒေါ်အောင်ဆန်းစုကြည်က ပြည်သူများ အနေဖြင့် မျက်နှာကို အရှေ့သို့မူပြီး ဆက်လက်သွားရမည်ဟု ပြောကြားသည်။
ဒေါ်အောင်ဆန်းစုကြည်က “နောက်ကြောင်းပြန် မလှည့်ချင်အောင်လည်း ကျွန်မတို့ ပြည်သူတွေက အားလုံးဝိုင်းပြီးတော့ လုပ်ပေးရမယ်။ ဒီအစိုးရကို ကျွန်မပြောချင်တာက ဘာမှမကြောက်ပါနဲ့။ ဒီမိုကရေစီစနစ်မှာ ရှုံးတဲ့အခါ ရှုံးတယ်။ နိုင်တဲ့အခါ နိုင်တယ်။ ရှုံးတဲ့သူကလည်း ဘ၀ပျက်သွားတာ မဟုတ်ပါဘူး။ နိုင်တဲ့သူကလည်း ထာဝရ အာဏာရတာ မဟုတ်ပါဘူး။ဒီမိုကရေစီ စနစ်ကို နားမလည်လို့သာ ဒီလောက်တောင်မှ ရှုံးရမှာ ကြောက်နေတာ ဖြစ်ပါတယ်လို့ ကျွန်မပြောချင်ပါတယ်” ဟု ပြောကြားသည်။
No comments:
Post a Comment