KIA ဖမ်းဆီးသွားသော ဒေသခံ(၃)ဦး ငွေသိန်း ၃၀ ပေးမှ ပြန်လွတ်လာ
ဒီဇင်ဘာလ ၂ရက်၊ ၂၀၁၄ ကချင်ပြည်နယ်၊ မိုးညှင်းမြို့၊ အောင်သပြေရပ်ကွက်အနီးတွင် ဖမ်းဆီးခံရသော ဒေသခံ ၃ ဦးသည် နိုဝင်ဘာ ၃၀ ရက်နေ့၌ ကချင်လွတ်မြောက်ရေးတပ်မတော်(KIA)အဖွဲ့ထံမှ ပြန်လည်လွတ်မြောက်လာခဲ့ကြောင်း ယင်းဒေသခံများထံမှ သိရသည်။ အဆိုပါဖြစ်စဉ်မှာ နိုဝင်ဘာ ၂၈ ရက်နေ့ နေ့လည် ၂ နာရီခွဲချိန်ခန့်တွင် အောင်သပြေရပ်ကွက် အရှေ့ဘက် ၂ မိုင်ခန့် အကွာ နေရာတွင် KIA အဖွဲ့မှ ဒေသခံ ၃ ဦးအား လာရောက်ဖမ်းဆီးခေါ်ဆောင်သွားခြင်းဖြစ်ကြောင်း သိရသည်။ “ ဟိုတစ်နေ့ကတော့ သုံးယောက်လုံး ပြန်လွှတ်လာတာ မြင်တယ်၊ အဲဒီအထဲမှာ မြေတိုင်းစာရေးတစ်ယောက်လည်း ပါတယ်လို့ အသံကြားတယ်၊ ငွေဘယ်လောက် ပေးလိုက်ရသလဲတော့ မသိဘူး ” ဟု မြို့ခံတစ်ဦးက ပြောသည်။ KIA အဖွဲ့မှ ဖမ်းဆီးခေါ်ဆောင်သွားသော ဒေသခံ ၃ ဦးမှာ ဦးစိုးထွန်း (၃၆)နှစ်၊ ဦးအောင်စိုးထွန်း(၂၇)နှစ်၊ မြေတိုင်း စာရေးအဆင့်(၄)၊ မိုးညှင်းခရိုင်မြေစာရင်းရုံး၊ ဦးကျော်ဝင်း(၅၈)နှစ်တို့ ဖြစ်ကြောင်း သိရသည်။ “ တစ်ယောက်ကို ငွေ ၁၀ သိန်းနှုန်းနဲ့ သိန်း ၃၀ ပေးလိုက်ရတာပေါ့၊ ငွေပေးလို့သာ ပြန်လွှတ်တာ၊ ငွေမပေးနိုင်ရင် KIA တပ်ထဲ ၀င်ရမှာလေ၊ ဒီဒေသမှာ KIA အဖွဲ့ရဲ့ ဥပဒေမဲ့လုပ်ရပ်တွေကို တားဆီးမယ့် ဌာနဆိုင်ရာအဖွဲ့အစည်းမျိုး ဒါမှမဟုတ် တပ်မတော်စစ်ကြောင်းတွေ ရှိသင့်တယ်လို့ ထင်တယ် ” ဟု ဆွေမျိုးတော်စပ်သူတစ်ဦးက ပြောကြား သွားသည်။ အဆိုပါ ဒေသခံ ၃ ဦးသည် ဖမ်းဆီးခံထားရသော ဒေသအခေါ် လခြမ်းတောင်မှ နိုဝင်ဘာ ၃၀ ရက် နေ့လည် ၁၂ နာရီခွဲချိန်ခန့်တွင် ၎င်းတို့၏ နေအိမ်အသီးသီးသို့ ပြန်လည်ရောက်ရှိလာခဲ့ကြောင်း သိရှိရပါသည်။ ဇော်မိုင်
No comments:
Post a Comment