အသက် (၁၈) နှစ်အရွယ်မိန်းကလေးအား ခိုးယူပေါင်းသင်း နှိပ်စက်ခဲ့သူအား ထောင်ဒဏ် ၂ နှစ်ခန့်သာချမှတ်ခြင်းသည် ထိ ရောက်သည့် ပြစ်ဒဏ်ချမှတ်ခြင်း မဟုတ်၍ ပြစ်မှုပုဒ်မ ၃၆၅ တွင် အမြင့်ဆုံးချမှတ်နိုင်သော ပြစ်ဒဏ်ဖြစ်သည့် ထောင်ဒဏ် ခုနစ်နှစ်အထိ ချမှတ်ရန် ယခုလ၌ အယူခံဝင် မည်ဖြစ်ကြောင်း သတင်းရရှိသည်။
အသက် (၁၈) နှစ်အရွယ် မိန်းကလေးအား ခိုးယူကာ အလိုမတူဘဲ သားမယားအဖြစ် ပြုကျင့်ခဲ့သည့် အပြင် ခြေထောက်ကို သံကြိုးဖြင့် ခတ်၍ ချုပ်နှောင်ရိုက်နှက်သည့် အမျိုးသားကို မြောက်ဥက္ကလာပ မြို့နယ်တရားရုံးက အလုပ်နှင့် ထောင်ဒဏ် ၂ နှစ်ကျခံစေရန် စက်တင်ဘာ ၁၅ ရက်က အမိန့်ချမှတ် ခဲ့သည်။
‘‘ခုနစ်နှစ်လောက်ကျရင်တောင် သူစိုးရိမ်တယ်။ တစ်ရပ်ကွက်တည်းဖြစ်နေလို့။ ပြန်ထွက်လာရင် အန္တရာယ်ပေးမလားစိုးရိမ်တယ်။ အခုလိုမျိုး ခဏလေးအပြစ်ပေးပြီး ပြန်ထွက်လာမှာကို ပိုစိုးရိမ်တယ်’’ဟု အခရာအမျိုးသမီးအဖွဲ့မှ မနန်းထွေးက ပြောသည်။
ထို့ပြင် အမျိုးသမီးများအ ကြမ်းဖက်ခံရခြင်းများအတွက် အနိမ့်ဆုံးထောင်ဒဏ်မည်မျှချ မှတ်သင့်ကြောင်း သီးသန့်ဥပဒေ တစ်ရပ်ပြဋ္ဌာန်းထားသင့်ပြီး ယင်း သို့ သီးသန့်ဥပဒေပြဋ္ဌာန်းထားမှ သာ အမျိုးသမီးများအတွက် ကာ ကွယ်တားဆီးမှုတစ်စုံတစ်ရာရရှိ နိုင်မည်ဟု အမျိုးသမီးအရေးလှုပ် ရှားသူများက ပြောသည်။
လက်ရှိတွင် အမျိုးသမီးများ အား အကြမ်းဖက်ခြင်းအတွက် တားဆီးကာကွယ်ပေးသည့် ဥပဒေကြမ်းကို ရေးဆွဲပြီးဖြစ်ကာ အဆိုပါဥပဒေထွက်ပေါ်လာပါက အတိုင်း အတာတစ်ခုအထိ အမျိုးသမီးများအား ကာကွယ်နိုင်မည်ဟု တရား လွှတ်တော်ရှေ့နေ ဒေါ်လှလှရီက သုံးသပ်သည်။
‘‘အနည်းဆုံးဘယ်လောက် ချကိုချရမယ်ဆိုတာမျိုး သတ်မှတ် ထားရင် အမျိုးသမီးတွေအတွက် အတိုင်းအတာတစ်ခုအထိ အကာအကွယ်ပေးနိုင်မယ်လို့ ထင် တယ်။ အဲဒီဥပဒေကိုလည်း ပြည် သူ့လွှတ်တော်ကိစ္စရပ်များနဲ့ စီရင် ချက်များဥပဒေထဲမှာလည်း ပါ ထားပါတယ်။ ဒီဥပဒေသည် ပြဋ္ဌာန်းဖို့လိုနေတဲ့စာရင်းမှာ ပါထားတယ်’’ဟု ဒေါ်လှလှရီက ဆိုသည်။
အဆိုပါအမှုကို ၂၀၁၅ နိုဝင် ဘာ ၂၀ ရက်တွင် စတင်စစ်ဆေး ပြီး တရားလိုပြသက်သေရှစ်ဦး၊ တရားခံပြသက်သေ နှစ်ဦးတို့ကို စစ်ဆေးပြီးနောက် အထက်ပါအ တိုင်း အမိန့်ချခြင်းဖြစ်ကြောင်း မြောက်ဥက္ကလာပမြို့နယ်တရား ရုံးမှ သတင်းရရှိသည်။
၂၀၁၅ စက်တင်ဘာ ၂၃ ရက်က အသက် (၁၈) နှစ်အရွယ် အမျိုးသမီးတစ်ဦးသည် နံနက် ၆ နာရီ ခန့်တွင် အောင်မင်္ဂလာအဝေးပြေးရှိ လက်မှတ်အရောင်းအ၀ယ်ဌာနသို့ အလုပ်လုပ်ရန် နေအိမ်မှ ထွက်သွားခဲ့ရာမှ ညနေအထိ အိမ်ပြန်ရောက်မလာသောကြောင့် မိသားစုက လိုက်လံစုံစမ်းခဲ့သည်။
ထိုသို့စုံစမ်းရာ ၎င်းအမျိုးသမီး ကို အသက် (၃၂)နှစ်အရွယ် ကျော်လင်းထွန်းဆိုသူက တစ်လတိတိ တိုင် ခိုးယူပြီး အလိုမတူဘဲ သား မယားအဖြစ် ပြုကျင့်ခဲ့သည့်အ ပြင် ခြေထောက်ကို သံကြိုးဖြင့်ချည်နှောင်ကာ နေအိမ်ကို သော့ပိတ်၍ လက်သီးဖြင့် ထိုးခြင်း၊ စတီးဓားဖြင့် ဆွဲခြစ်ခြင်း၊ ကြက်မွေးလက်ကိုင်ရိုးဖြင့် ရိုက်နှက်ခြင်းများပြုလုပ်ခဲ့သဖြင့် ဝေဘာဂီနယ်မြေရဲစခန်းက အမှုဖွင့်အရေးယူခဲ့ခြင်း ဖြစ်သည်။
‘‘သူ့နောက်ကို မလိုက်ရင် ဓားနဲ့ ထိုးသတ်မယ်ဆိုပြီး ခြိမ်း ခြောက်တယ်။ သူလာတာက ဆိုင်ကယ်နဲ့ လာတာ။ ပြီးတော့ သူ့သူ ငယ်ချင်းကားနဲ့ သမီးကိုခေါ်သွား တာ’’ဟု တရားလိုအမျိုးသမီးက ပြောသည်။
အမျိုးသမီးငယ်နှင့် တရားခံ တို့သည် ယခင်က ချစ်သူများဖြစ် သော်လည်း အခင်းမဖြစ်ပွားမီ ကာလတွင် အမျိုးသမီးဘက်က နောက်ဆုတ်သွားခဲ့ပြီး ယခုကဲ့သို့ ခိုးယူပေါင်းသင်း၍ နေအိမ်အတွင်း တစ်လတိတိချုပ်နှောင်ရိုက်နှက်ခံရခြင်းဖြစ်ကြောင်း သတင်းရရှိသည်။7day
No comments:
Post a Comment