ရန်ကုန်၊ စက်တင်ဘာ ၂ဝ
ငလျင်ဒဏ်ကြောင့် ထိခိုက် ပျက်စီးသွားသော စေတီများ ပြုပြင်ရန် အစိုးရ အဖွဲ့၌ ငွေကြေး လုံလောက်စွာ ရှိကြောင်း သာသနာရေးနှင့် ယဉ်ကျေးမှု ပြည်ထောင်စု ဝန်ကြီး သူရဦးအောင်ကိုက ပြောသည်။
ရန်ကုန်တိုင်း၊ သံဃနာယကအဖွဲ့ (ဂိုဏ်းပေါင်းစုံ) သံဃနာယက အစည်းအဝေးပွဲကို တိုင်းသံဃ နာယကရုံး၌ စက်တင်ဘာလ ၂ဝ ရက်နေ့ နေ့လယ် ၁၂ နာရီမှ စတင် ကျင်းပခဲ့သည်။ အဆိုပါ အစည်းအဝေးပွဲတွင် ပြည်ထောင်စု ဝန်ကြီးသူရ ဦးအောင်ကိုက ပြောဆိုခဲ့ခြင်း ဖြစ်သည်။
စေတီပုထိုးများ ပြုပြင်ရန် ပြည်တွင်း ပြည်ပ အလှူရှင်များက လှူဒါန်းငွေ ကျပ်သိန်းပေါင်း နှစ်သောင်းကျော် ရရှိထားပြီး ဖြစ်ပြီး ပြုပြင်ရာတွင် ပြည်တွင်း ပြည်ပ ပညာရှင်များနှင့် ပူးပေါင်း ဆောင်ရွက်သွားမည် ဖြစ်ကြောင်း သာသနာရေးနှင့် ယဉ်ကျေးမှု ဝန်ကြီးဌာနမှ သိရသည်။
“စေတီပုထိုးတွေ ပြုပြင်ဖို့ အစိုးရ အဖွဲ့မှာ ငွေကြေး လုံလောက်စွာ ရှိပါတယ်။ ပြုပြင်တဲ့အခါ ပညာရှင်တွေနဲ့ ပူးပေါင်းပြီး ဆောင်ရွက်သွားမှာ ဖြစ်တယ်”ဟု သူရ ဦးအောင်ကိုက ပြောသည်။
အလားတူ ငလျင်ဒဏ်ကြောင့် ထိခိုက် ပျက်စီးသော စေတီများ ပြုပြင်ရန် ရန်ကုန်တိုင်းသံဃနာယကအဖွဲ့ ဆရာတော်များက ကျပ်သိန်းပေါင်း နှစ်သောင်း ကျော်ခန့် အစိုးရအဖွဲ့ထံ ပေးလှူခဲ့ကြောင်း တိုင်းသံဃနာယက အဖွဲ့ထံမှ သိရသည်။
သြဂုတ်လ ၂၄ ရက်နေ့က ချောက်မြို့နှင့် ၁၂ မိုင်ခန့် အကွာ၌ ပြင်းအား ရစ်ခ်ျတာစကေး ၆ ဒသမ၈ အဆင့်ရှိ ငလျင် လှုပ်ခတ်ခဲ့၍ ပုဂံယဉ်ကျေးမှု ဒေသနှင့် မကွေးတိုင်းဒေသကြီး၊ မန္တလေး တိုင်းဒေသကြီးနှင့် ရခိုင်ပြည်နယ်တို့မှ ရှေးဟောင်း စေတီ ၄ဝဝ ကျော် ထိခိုက် ပျက်စီးခဲ့သည်။
No comments:
Post a Comment