တိုင်းရင်းသား စည်းလုံးညီညွှတ်ရေးကို အလေးထားပါက ရှမ်းပြည်နယ်ဝန်ကြီးချုပ်နေရာတွင် SNLD ကို တာဝန်ပေးသင့်ဟု ဦးခွန်ထွန်းဦး ပြောကြား

တိုင်းရင်းသား စည်းလုံးညီညွှတ်ရေးကို အလေးထားပါက ရှမ်းပြည်နယ်ဝန်ကြီးချုပ်နေရာတွင် SNLD ကို တာဝန်ပေးသင့်ဟု ဦးခွန်ထွန်းဦး ပြောကြား -------------------------------------------------------- ရန်ကုန်၊ မတ်(၁၂) အထွေထွေရွေးကောက်ပွဲတွင် အနိုင်ရရှိခဲ့ပြီး ပြည်ထောင်စုအစိုးရ ဖွဲ့စည်းနိုင်ရေး ကြိုးပမ်းနေသော အမျိုးသား ဒီမိုကရေစီအဖွဲ့ချုပ် (NLD) ပါတီသည် တိုင်းရင်းသား စည်းလုံးညီညွတ်ရေးကို အလေးထားပါက ရှမ်းပြည်နယ် ဝန်ကြီးချုပ်နေရာတွင် ရှမ်းတိုင်းရင်းသားများ ဒီမိုကရေစီအဖွဲ့ချုပ် SNLD ပါတီကို တာဝန်ပေးသင့်ကြောင်း ယင်းပါတီ ဥက္ကဋ္ဌ ဦးခွန်ထွန်းဦးက ပြောကြားသည်။ “ပြည်နယ်အစိုးရဖွဲ့တဲ့အခါ SNLD ပါတီအနေနဲ့ သက်ဆိုင်ရာ တိုင်းရင်းသားပါတီနဲ့ တွေ့ဆုံဆွေးနွေးပြီးမှ ဆုံးဖြတ်သင့်တယ်။ အခုထိတော့ ကျွန်တော်တို့ဘက်က တွေ့ဆုံဖို့မျှော်လင့်တယ်။ သမ္မတက ပြည်နယ်ဝန်ကြီးချုပ်တွေကို ခန့်အပ်နိုင်တယ်လေ။NLD ပါတီအနေနဲ့ ကျနော်တို့ တောင်းဆိုချင်တဲ့ ရှမ်းပြည်နယ် ဝန်ကြီးချုပ်နေရာကို ကျွန်တော်တို့ပါတီကို ပေးသင့်တယ်”ဟု SNLD ပါတီ ဥက္ကဋ္ဌ ဦးခွန်ထွန်းဦးက ပြောသည်။ SNLD ပါတီသည် ရှမ်းပြည်နယ် လွှတ်တော်အတွင်း ဒုတိယအများဆုံး အနိုင်ရရှိခဲ့ပြီး ယင်းလွှတ်တော်တွင် SNLD လွှတ်တော်ကိုယ်စားလှယ် ၂၄ ဦးပါဝင်သည်။ ယင်းကိစ္စရပ်နှင့် ပတ်သက်ပြီး မွန်အမျိုးသားပါတီ ဥက္ကဋ္ဌ ဦးနိုင်ငွေသိမ်းက “ SNLDပါတီကတော့ ရခိုင်ပြည်နယ် ဝန်ကြီးချုပ်ကို သူတို့ပါတီက ခန့်အပ်မယ်လို့ အတည်ပြုပြီးပြီ။ သို့သော်လည်းပဲ ရှမ်းပြည်နယ် ဝန်ကြီးချုပ်ကို SNLD ပါတီကို ပေးမယ်လို့ ယုံကြည်တယ်။ သို့သော်လည်းပဲ တိုင်းရင်းသားပါတီတွေနဲ့တွေ့ဆုံပြီး ဝန်ကြီးချုပ်ခန့် အပ်မှုတွေကို ဆောင်ရွက်သင့်တယ်”ဟု ဆိုသည်။ သို့သော်လည်း အမျိုးသားဒီမိုကရေစီအဖွဲ့ချုပ် NLD ပါတီကမူ တိုင်းဒေသကြီးနှင့် ပြည်နယ်ဝန်ကြီးချုပ် နေရာများတွင် ပါတီဝင်များကိုသာ ခန့်အပ်မည်ဖြစ်ကြောင်း ယင်းပါတီ ဗဟိုအလုပ်အမှုဆောင် ဦးဝင်းထိန်က ထုတ်ဖော်ပြောဆိုထားသည်။ ထို့အပြင် ရခိုင်ပြည်နယ် ဝန်ကြီးချုပ်အဖြစ် NLD ပါတီမှ ပြည်နယ် ဥက္ကဋ္ဌ ဦးညီပုကို ခန့်အပ်မည်ဟု အတည်ပြု ထားသော်လည်း ရှမ်းပြည်နယ် ဝန်ကြီးချုပ်နေရာတွင်မူ ပါတီကိုယ်စားလှယ် (သို့မဟုတ်) SNLD ပါတီမှ ကိုယ်စား လှယ်တစ်ဦးကို လျာထားကြောင်း သတင်းများထွက်ပေါ်လျက် ရှိသည်။ ထို့အပြင် ပြည်ထောင်စုအစိုးရအဖွဲ့တွင် ပါဝင်ရန်အတွက် NLD ပါတီက ကမ်းလှမ်းမှုများရှိသော်လည်း SNLD ပါတီ ကမူ ပြည်နယ်အစိုးရ ဖွဲ့စည်းရေးတွင်သာ ဦးစားပေး ပါဝင်လိုကြောင်း ထုတ်ဖော်ပြောဆိုထားသည်။