ရန်ကုန်၊ အောက်တိုဘာ ၇
နေ့စဉ် လူနေမှုဘဝတွင် အမျိုးသမီးများ ရင်ဆိုင်နေရသည့် လိင်ပိုင်းဆိုင်ရာ နှောက်ယှက်/ ကျူးလွန်မှုများ၊ အကြမ်းဖက်မှုများ အပါအဝင် ရန်ကုန်မြို့တော်၏ လုံခြုံမှု မရှိသည့် အခြေအနေများကို ရန်ကုန်တိုင်းဒေသကြီး အုပ်ချုပ်ရေးမှူးနှင့် အရပ်ဘက် အဖွဲ့အစည်း ခေါင်းဆောင်အချို့ ဆွေးနွေးရန် စီစဉ်ထားသည်။
ရန်ကုန်တိုင်းဒေသကြီး အစိုးရအဖွဲ့၏ အတွင်းရေးမှူးလည်း ဖြစ်သူ တိုင်းအုပ်ချုပ်ရေးမှူး ဦးမျိုးအောင်ဌေးနှင့် အရပ်ဘက် အဖွဲ့အစည်း လေးခုမှ ခေါင်းဆောင်များ၏ ဆွေးနွေးပွဲကို အောက်တိုဘာလ ၁၁ ရက်နေ့တွင် ရန်ကုန်မြို့ Action Aid ရုံးတွင် ပြုလုပ်မည် ဖြစ်သည်။
ဘေးကင်း လုံခြုံသော မြို့တော် ဖန်တီးရေး ဖိုရမ်ဟု အမည် ပေးထားသော အဆိုပါ ဆွေးနွေးပွဲကို နံနက် ၁ဝ နာရီ ၃ဝ မိနစ်မှ နေ့လည် ၂ နာရီအထိ ကျင်းပမည်ဖြစ်ပြီး အမျိုးသမီးများဘဝ မလုံခြုံမှု အခြေအနေများကို ရန်ကုန်လူထု သတိပြုမိစေရန် ဖိုရမ် ကျင်းပခြင်းဖြစ်ကြောင်း Action Aid ထံမှ သိရသည်။
အဆိုပါဖိုရမ်သို့ ရန်ကုန်တိုင်းဒေသကြီး ဝန်ကြီးချုပ် ဦးဖြိုးမင်းသိန်းနှင့် မြန်မာနိုင်ငံဆိုင်ရာ ဗြိတိသျှ သံအမတ်ကြီး အင်ဒရူးပက်ထရစ်တို့လည်း တက်ရောက်မည်ဖြစ်ကြောင်း ဆွေးနွေးပွဲ အစီအစဉ်များအရ သိရသည်။
ဘေးကင်း လုံခြုံသော မြို့တော် ဖန်တီးရေး ဖိုရမ် ကျင်းပရန်အတွက် ဒလ၊ ဒေါပုံ၊ သာကေတ၊ လှိုင်သာယာ၊ မင်္ဂလာဒုံ၊ အင်းစိန်နှင့် တောင်ဒဂုံမြို့နယ်များမှ လူထုများနှင့် စကားဝိုင်း ပြုလုပ်၍ စီစဉ်ခြင်းဖြစ်ကြောင်း Action Aid ထံမှ သိရသည်။
ရန်ကုန်လုံခြုံရေးကိစ္စ တိုင်းထွေ/အုပ် ပါဝင် ဆွေးနွေးမည့် ဖိုရမ်သို့ လှိုင်သာယာ၊ အင်းစိန်၊ မင်္ဂလာဒုံ မြို့နယ်များမှ အထည်ချုပ် လုပ်ငန်း လုပ်ကိုင်သူ အမျိုးသမီးများလည်း ပါဝင် တက်ရောက်မည်ဖြစ်ကြောင်း ထပ်မံ သိရှိရသည်။
No comments:
Post a Comment