Posted: October 4, 2016
ရှမ်းပြည်နယ်(တောင်ပိုင်း) မိုင်းကိုင်မြို့နယ်တွင် ဖြစ်ပွားခဲ့သော တိုက်ပွဲကြောင့် အောက်တိုဘာလ ၃ ရက်နေ့အထိ ဒုက္ခသည်ဦးရေ နှစ်ထောင်ကျော်တို့သည် မိုင်းကိုင်မြို့နယ်အတွင်း ဒုံလောင်းမြို့နယ်ခွဲရှိ ဘုန်းကြီးကျောင်းများသို့ သွားရောက် နေထိုင်နေရသည်ဟု မိုင်းကိုင်မြို့နယ် ပြည်သူ့လွှတ်တော် ကိုယ်စားလှယ် ဦးစိုင်းဆိုင်မိန်းက The Ladies သို့ ပြောသည်။
မိုင်းကိုင်မြို့နယ်ရှိ အာစီအက်စ်အက်စ်မှ ထူထောင်ထားသည့် လူငယ်ဆေးဖြတ်စခန်းများအား လူသစ် စုဆောင်းသည်ဆိုသည့် အကြောင်းပြချက်ဖြင့် အစိုးရတပ်မှ ၀င်ရောက်စီးနင်းရာမှ စခန်းလုံခြုံရေးက ပြန်လည်ခုခံသဖြင့် တိုက်ပွဲဖြစ်ပွားခြင်း ဖြစ်သည်ဟု ဆိုသည်။
“အရင်ကတော့ ငြိမ်းငြိမ်းချမ်းချမ်းပါပဲ။ အခုမှဖြစ်တာ။ ဒုက္ခသည်တွေအတွက် အစားအသောက် နေရာထိုင်ခင်းနဲ့ လူအများကြီးက တစ်နေရာတည်းမှာ နေရတာဆိုတော့ ကျန်းမာရေး စောင့်ရှောက်မှုတွေ လိုအပ်တယ်” ဟု ဦးစိုင်းဆိုင်မိန်းက ပြောသည်။
RCSS / SSA ရှမ်းပြည်ပြန်လည်ထူထောင်ရေး ကောင်စီမှာ အစိုးရနှင့် နိုင်ငံလုံးဆိုင်ရာ အပစ်ခတ်ရပ်စဲရေး လက်မှတ် ရေးထိုးထားသည့် အဖွဲ့လည်းဖြစ်ပြီး မိုင်းကိုင် မြို့နယ်၊ တုံလောကျေးရွာအနီးတွင် တိုက်ပွဲများ ဖြစ်ပွားခဲ့ခြင်း ဖြစ်သည်ဟု သိရပြီး စစ်ဘေးရှောင်များမှာ တုံလောကျေးရွာ ဘုန်းတော်ကြီးကျောင်းတွင် ခိုလှုံနေရသည်။
RCSS/SSA မှ ဗိုလ်မှူးကြီးစိုင်းလ က “ကျွန်တော်တို့ ပေါ်လစီအရ ဒေသခံတွေ ကြုံတွေ့နေရတဲ့ မူးယစ်ဆေးဝါး အန္တရာယ် တားဆီးကာကွယ်ရေး မူဝါဒကြောင့်ပါပဲ။ အဲ့ဒီမူဝါဒအတွက် ဒေသခံပြည်သူလူထုနဲ့ လက်တွဲပြီးတော့ လူငယ်တွေ အတွက် စာရိတ္တပြုပြင်ရေး စခန်းတွေ လုပ်ပါတယ်။ သူတို့ မူးယစ်ဆေးဝါးဖြတ်တဲ့ စခန်းတွေကို လုပ်ပေးပါတယ်။ အဲ့ဒီမှာသူတို့က အထင်မှား အမြင်မှား ဖြစ်ပြီးတော့ ကျွန်တော်တို့ လူသစ်စုဆောင်းတဲ့ နေရာ၊ လေ့ကျင့်တဲ့ နေရာဆိုပြီးတော့ ၀င်တိုက်ချေမှုန်းတဲ့ အတွက်ကြောင့် ပြန်လည်ခုခံရာက အခုလို တိုက်ပွဲတွေဖြစ်ရခြင်း ဖြစ်ပါတယ်” ဟု အောက်တိုဘာလ ၃ ရက်နေ့က The Ladies သို့ ပြောကြားခဲ့သည်။
မူးယစ်ဆေးဝါး ကင်းစင်ပပျောက်ရေး တိုးချဲ့လုပ်ဆောင်ရန် အတွက် ဒေသခံရဟန်းရှင်လူများ တောင်းဆိုချက်အရ သျှမ်းပြည် ပြန်လည်ထူထောင်ရေး ကောင်စီ RCSS/SSA အဖွဲ့က ဇူလိုင်လဆန်းမှ စတင်ပြီး မူးယစ်တိုက်ဖျက်ရေး လုပ်ငန်းများကို တိုးမြှင့်ဆောင်ရွက်ခဲ့ခြင်း ဖြစ်သည်။ ယင်းအတွက် မူးယစ်ဆေးဝါးသုံးစွဲခြင်း၊ သယ်ဆောင် ရောင်းချခြင်း၊ သိုလှောင်ထားခြင်းများ စစ်ဆေးတွေ့ရှိပါက ဖမ်းဆီးအရေးယူ သွားမည်ဖြစ်ကြောင်း ထုတ်ပြန်ထားကြောင်း သိရပြီး နမ့်လန်ဒေသရှိ မူးယစ်လက်ဝယ်တွေ့ရှိသူများအား ဖမ်းဆီးမှုတွင် တပ်မတော်သား တစ်ဦး ပါဝင်ခဲ့ကြောင်း နမ့်လမ်ဒေသတွင် သတင်းများ ထွက်ပေါ်နေသည်ဟု ဆိုသည်။
ဝသန်
The Ladies News
No comments:
Post a Comment