ဘက်ထရီ ချွတ်ယွင်းချက် ဖြစ်ပွားခဲ့သဖြင့် အသစ်ပြန်လည် လဲလှယ်ပေးထားသည့် Samsung Galaxy Note 7 ဖုန်းတစ်လုံး လေယာဉ်ပေါ်တွင် မီးလောင်မှု ဖြစ်ပွားခဲ့ကြောင်း သိရှိရသည်။
အမေရိကန်ရှိ Southwest လေကြောင်းလိုင်းက အောက်တိုဘာ ၅ ရက်တွင် ကန်တက်ကီမှ ဘာလ်တီမောသို့ ပျံသန်းမည့် လေယာဉ်တစ်စီး ပြေးလမ်းပေါ်မှ မထွက်ခွာမီ ယခုအခြေအနေနှင့် ကြုံခဲ့ခြင်းဖြစ်ကြောင်း အတည်ပြုခဲ့သည်။ ဖုန်းမှ မီးခိုးများ အူထွက်လာသောကြောင့် လေယာဉ်ပေါ်မှ ခရီးသည်များကို ဘေးလွတ်ရာ ရွှေ့ပြောင်းပေးခဲ့ရသည်။
Samsung ကုမ္ပဏီ၏ နောက်ဆုံးထုတ် အဆင့်မြင့် စမတ်ဖုန်းများသည် ဘက်ထရီ ချွတ်ယွင်းချက်ကြောင့် ပေါက်ကွဲမီးလောင်နိုင်ကြောင်း သတိပေးချက်များ အတည်ပြု ထုတ်ပြန်ထားရပြီး တောင်ကိုရီးယား နည်းပညာ ကုမ္ပဏီကြီးက စိတ်ချရသည်ဆိုသော ဖုန်းအသစ်များနှင့် လဲလှယ်ပေးနေသည်။ သို့သော် ယခုဖြစ်ရပ်မှာ အသစ်လဲထားသည့် ဖုန်းတစ်လုံးကပါ မီးလောင်ခဲ့ခြင်းဟု သိရသည်။ Samsungက ထိုကိစ္စကို စုံစမ်းသွားမည်ဟု အတည်ပြုထားသည်။
Galaxy Note 7များကို စက်တင်ဘာလတွင် အလုံးအရင်းဖြင့် ပြန်လည်ခေါ်ယူ လဲလှယ်ပေးခဲ့ရပြီး Samsungက ပြဿနာ အရင်းအမြစ်ကို ဖြေရှင်းနိုင်ခဲ့ပြီဟု ကြေညာခဲ့သည်။ “အခုကိစ္စနဲ့ ပတ်သက်လို့တော့ Southwest လေကြောင်းလိုင်း တာဝန်ရှိသူတွေနဲ့ ဆက်သွယ်ပြီး စုံစမ်းဖော်ထုတ်သွားပါမယ်။ မီးလောင်မှု ဖြစ်ပွားခဲ့တဲ့ဖုန်းကို တောင်းယူပြီး အကြောင်းရင်းကို စစ်ဆေးရှာဖွေသွားပါမယ်”ဟု ကုမ္ပဏီက သတင်းထုတ်ပြန်သည်။ စစ်ဆေးမှုများ အပြီးတွင် နောက်ထပ် သတင်းအချက်အလက် အသစ်များကို ဆက်လက် ကြေညာသွားမည်ဟုလည်း Samsungက ဆိုသည်။
ဖုန်းပိုင်ရှင်ဖြစ်သူ ယော်ဒန် ဂိုလ်ဆန်က မိမိ၏ဖုန်းကို စက်တင်ဘာ ၂၁ ရက်က ပြန်လည် လဲလှယ်ထားခြင်းဖြစ်ကြောင်း ပြောကြားခဲ့သည်။ အမေရိကန် ပြည်ထောင်စု လေကြောင်းပျံသန်းမှု စီမံကွပ်ကဲရေး ဌာနက ခရီးသည်များ အနေဖြင့် Galaxy Note 7 ဖုန်းများကို ယူဆောင်လာပါက လေယာဉ်ပေါ်တွင် ဖုန်းပိတ်ထားရန်၊ အားသွင်းခြင်း မပြုကြရန် ညွှန်ကြားထားသည်။ အချို့သော လေကြောင်းလိုင်းများကမူ ယင်းစမတ်ဖုန်းများကို လေယာဉ်ပေါ် ယူဆောင်ရန်ပင် ခွင့်မပြုဘဲ တားမြစ်ထားကြောင်း သိရှိရသည်။
Ref: The Verge
No comments:
Post a Comment