ပုဂံရှေးဟောင်းယဉ်ကျေးမှု နယ်မြေရှိ ငလျင်ဒဏ်သင့်ဘုရားများကို ပြန်လည်ပြုပြင်ရန် အနည်းဆုံး အချိန်ငါးနှစ်ခန့် ကြာမြင့်မည် ဖြစ်ကြောင်း မန္တလေးတိုင်းဒေသကြီး ဝန်ကြီးချုပ် ဒေါက်တာဇော်မြင့်မောင်က ပြောကြားသည်။
ပုဂံဒေသဘုရားများ ပြုပြင်နိုင်ရန် မန္တလေး ကုန်စည်ဒိုင် အသင်းဝင်များနှင့် ဒေသခံများ စုပေါင်းလှူဒါန်းသည့် အလှူငွေများ ပေးအပ်ခြင်းကို အောက်တိုဘာလ ၈ ရက်နေ့က အဆိုပါ ကုန်စည်ဒိုင်အသင်းရုံး၌ ပြုလုပ်ခဲ့ရာ ယင်းအခမ်းအနား၌ ဝန်ကြီးချုပ်က အထက်ပါအတိုင်း ပြောကြားခြင်း ဖြစ်သည်။
“ပျက်စီးခဲ့တဲ့ ၃၈၉ ဆူထဲက အဆူသုံးရာလောက်က သာမန်ပျက်စီးမှုလောက်ပဲ ရှိခဲ့ပေမယ့် ကျန် ၈၉ ဆူက ပျက်စီးမှု ကြီးမားခဲ့လို့ အချိန်တိုအတွင်း ပြီးနိုင်ဖို့ မလွယ်ဘူး။ နိုင်ငံတကာ ပညာရှင်တွေနဲ့ တိုင်ပင်ပြီး ရှေးမူမပျက် ပြင်နိုင်ဖို့ဆိုရင် အနည်းဆုံး ငါးနှစ်လောက်တော့ ကြာမြင့်နိုင်တယ်” ဟု ပုဂံ-ညောင်ဦး ဒေသရှိ ရှေးဟောင်းဘုရား၊ စေတီပုထိုးများနှင့် သာသနိက အဆောက်အအုံများ ပြုပြင်ထိန်းသိမ်းရေး ဦးစီးကော်မတီ အဖွဲ့ဝင်လည်းဖြစ်သူ ဒေါက်တာဇော်မြင့်မောင်က ပြောဆိုသည်။
ယခုနှစ် သြဂုတ်လ ၂၄ ရက် ညနေပိုင်းက ပြင်းထန်စွာ လှုပ်ခတ်ခဲ့သော ငလျင်ဒဏ်ကြောင့် ပုဂံရှေးဟောင်းနယ်မြေရှိ ဘုရားပေါင်း ၃၈၉ ဆူ ထိခိုက်ပျက်စီးမှု ရှိခဲ့ရာ ယင်းအနက် ၈၉ ဆူမှာ ဆိုးရွားစွာ ပျက်စီးခဲ့ကြောင်း မန္တလေးတိုင်းဒေသကြီး အစိုးရအဖွဲ့က ထုတ်ပြန်ထားသည်။
ရှေးဟောင်းပုဂံဘုရားများ ပြန်လည်ပြုပြင်ရန် ထိုင်း၊ အိန္ဒိယ၊ တရုတ်နှင့် ပြင်သစ်နိုင်ငံတို့မှ ပညာရှင်များ လာရောက်လေ့လာလျက် ရှိပြီး နိုင်ငံတကာ ပညာရှင်များနှင့် ပူးပေါင်း၍ ပြုပြင်ရေး လုပ်ငန်းများ ဆောင်ရွက်နေပြီဖြစ်ကြောင်း ရှေးဟောင်းသုတေသနနှင့် အမျိုးသားပြတိုက် ဦးစီးဌာန ညွှန်ကြားရေးမှူးချုပ် ရုံးထံမှလည်း သိရသည်။
ပုဂံ-ညောင်ဦးဒေသရှိ ရှေးဟောင်း ဘုရား၊ စေတီပုထိုးများနှင့် သာသနိက အဆောက်အအုံများ ပြုပြင်ထိန်းသိမ်းရန် လက်ရှိအချိန်၌ အလှူငွေ ကျပ် ၃ ဒသမ ၃ ဘီလီယံ ရရှိထားပြီး ဖြစ်ရာ ယင်းငွေများအနက် ကျပ်သန်းခုနစ်ရာခန့် အသုံးပြု ဆောင်ရွက်ခဲ့ပြီး ဖြစ်ကြောင်း မန္တလေးတိုင်းဒေသကြီး ဝန်ကြီးချုပ် ဒေါက်တာဇော်မြင့်မောင်က ထပ်လောင်းပြောကြားသည်။
No comments:
Post a Comment