Posted: October 7, 2016
ကာလအတန်ကြာ တရားဝင် ကုန်သွယ်ခွင့် မရှိခဲ့သည့် ကဏ္ဍဖြစ်သော ကျောက်မျက်ကဏ္ဍတွင် ကုန်သွယ်မှု ပြုလုပ်ရန် အမေရိကန် ကျောက်မျက် ကုန်သည်များက စိတ်ဝင်စားနေကြောင်း သိရသည်။
အမေရိကန်နိုင်ငံသို့ ကျောက်မျက်တင်ပို့မှုမှာ ပိတ်ဆို့ အရေးယူမှုဆိုင်ရာ ကျောက်မျက်ဥပဒေအရ သီးသန့် ပြဋ္ဌာန်း ပိတ်ဆို့ထားခြင်း ဖြစ်သော်လည်း မကြာမှီတွင် ပိတ်ဆို့မှုများ ဖယ်ရှားရာတွင် ကျောက်မျက်ကဏ္ဍမှာ ပါဝင်လာဖွယ်ရှိနေခြင်းကြောင့် ဖြစ်ကြောင်းလည်း သိရသည်။
အဆိုပါကိစ္စနှင့် ပတ်သက်ပြီး အောက်တိုဘာ ၄ ရက် ရန်ကုန်မြို့ရှိ မြန်မာနိုင်ငံ စက်မှုလက်မှုလုပ်ငန်းရှင်များ အသင်းချူပ်ရုံးတွင် ပြုလုပ်သည့် အမေရိကန် ရတနာကုန်သည်(AGTA)နှင့် မြန်မာနိုင်ငံ ရတနာလုပ်ငန်းရှင်များ အသင်း(MGJEA)တို့ ပထမဆုံးအကြိမ် တွေ့ဆုံပွဲတွင် ပြောခဲ့ခြင်းဖြစ်သည်။
အမေရိကန် ရတနာကုန်သည် အသင်းဥက္ကဋ္ဌ မစ္စတာဂျက်ဖာရီ ဘယ်ဂေါ်ရီက "ကျနော်တို့ ဒီကိုလာရတဲ့ အဓိကရည်ရွယ်ချက်က ရတနာလုပ်ငန်း နယ်ပယ်ထဲမှာ မြန်မာနိုင်ငံရဲ့ အခန်းကဏ္ဍကို ကမ္ဘာ့လှစ်ဟပြချင်လို့ ဖြစ်တယ်။ ဒီစီးပွားရေးလုပ်ငန်းက ဒီမိုကရေစီလမ်းကြောင်း တိုးတက်မှု ခိုင်မာမှုတွေအတွက် အထောက်အကူပေးမှာ ဖြစ်ပါတယ်”ဟု ပြောသည်။
အမေရိကန် ရတနာကုန်သည်များ အသင်းသည် ရတနာဈေးကွက်တွင် ပွင့်လင်းမြင်သာမှုရှိစွာနှင့် ရပ်တည်နေသည့် အဖွဲ့အစည်းတခု ဖြစ်သည်။ မြန်မာနိုင်ငံ ရတနာဈေးကွက်သည် ကမ္ဘာနှင့် ရင်ပေါင်တန်းနိုင်တဲ့ အခြေအနေတွင်ရှိကြောင်း ထုတ်ပြန်ချက်တွင် ဆိုထားသည်။
ဘယ်ဂေါ်ရီက မြန်မာနိုင်ငံ စီးပွားရေးတိုးတက်ဖို့အတွက် အကူအညီပေးနိုင်ဖို့အတွက် ရောက်ရှိလာခြင်းဖြစ်ကြောင်း ဆိုထားသည်။ UMFCCI အသင်း ဒုတိယဥက္ကဋ္ဌ ဒေါက်တာမောင်မောင်လေးက အမေရိကန်နိုင်ငံ အနေဖြင့် မြန်မာ့ပတ္တမြား ဈေးကွက်ကို ကုန်သွယ်ရန် သဘောကျကြောင်း၊ ပတ္တမြားထုတ်လုပ်မှုက အနည်းငယ် သေးသော်လည်း မြန်မာနိုင်ငံအနေဖြင့် အားထုတ် လုပ်ဆောင်နိုင်လျှင် ကြီးမားသည့် ဈေးကွက်ကြီးတစ်ခုကို ရရှိနိုင်ကြောင်း ဆိုသည်။
ဒေါက်တာမောင်မောင်လေးက "ရတနာကုန်သွယ်လုပ်ငန်းက တကယ်တော့ ဈေးကွက်ကြီးတစ်ခုပါ။ အစိုးရအနေနဲ့ ရတနာကုန်သွယ် လုပ်ငန်းအတွက် နည်းစနစ်တကျ အခွန်ကောက်ယူခြင်း လုပ်ဆောင်မယ်ဆို ကျွန်တော်တို့ နိုင်ငံအတွက် နိုင်ငံခြားဝင်ငွေ ရနိုင်ပါတယ်။ ပတ္တမြားဆိုတာ ဈေးကွက်သေးပါတယ်။ ဒါပေမယ့် အရည်အသွေးမြင့်အောင် လုပ်ဆောင်မယ်ဆိုရင် ဈေးကွက်အကြီးကြီး ရမှာဖြစ်တယ်”ဟု ပြောသည်။
မြန်မာနိုင်ငံအနေဖြင့် အရည်အသွေးမြင့် ရတနာထုတ်ကုန် နှစ်စဉ် ဒေါ်လာ သန်း ၂၀ ထက် ပိုမရချိန်တွင် အိမ်နီးချင်း ထိုင်းနိုင်ငံအနေဖြင့် နှစ်စဉ်ဒေါ်လာ ၁ ဘီလီယံ ရရှိလျက်ရှိကြောင်း ဒေါက်တာ မောင်မောင်လေးက ပြောသည်။
The Ladies News
No comments:
Post a Comment