ရန်ကုန်တွင် တန်ဖိုးငွေကျပ်သိန်း ၅၀၀ကျော်ရှိ ကာမစိတ်ကြွဆေးနှင့် စိတ်ငြိမ်ဆေးများဖမ်းမိ --------------------------------------

ရန်ကုန်တွင် တန်ဖိုးငွေကျပ်သိန်း ၅၀၀ကျော်ရှိ ကာမစိတ်ကြွဆေးနှင့် စိတ်ငြိမ်ဆေးများဖမ်းမိ -------------------------------------------------------------- ရန်ကုန်၊ ဖေဖော်ဝါရီ ၁၃ ကာမစိတ်ကြွဆေးများအသုံးပြုကာ ချစ်သူများနေ့တွင် အမျိုးသမီးများ အဓမ္မပြုကျင့်ခံရမှုမဖြစ်ပေါ်စေရန် ဇန်နဝါရီလ ၂၈ရက်နေ့မှစတင်ကာ ရန်ကုန်မြို့တော်တွင် တရားမဝင်ကာမစိတ်ကြွဆေးရောင်းချနေသူများကို အထူးစီမံချက်ဖြင့်ဖမ်းဆီးခဲ့ရာ ဖေဖော်ဝါရီလ ၁၂ရက်နေ့အထိ မြို့နယ် ၉ခုမှ ကျပ်သိန်း၅၀၀ကျော်ရှိ ကာမစိတ်ကြွဆေးနှင့် စိတ်ငြိမ်ဆေးများ ဖမ်းမိခဲ့ကြောင်း ရန်ကုန်တိုင်းဒေသကြီးရဲတပ်ဖွဲ့မှူးရုံးထံမှ သိရှိရသည်။ “မြို့နယ်အနှံ့က ဆေးဆိုင်၊ ဆေးသိုလှောင်ရုံနဲ့ လမ်းဘေးဈေးဆိုင်တွေကို စီမံချက်နဲ့ရှောင်တခင်စစ်ဆေးမှုတွေဆောင်ရွက်ခဲ့ရာက မှတ်ပုံတင် ထားခြင်းမရှိဘဲရောင်းချနေတဲ့ လိင်စိတ်ကြွဆေးနဲ့ စိတ်ငြိမ်ဆေးတွေ ဖမ်းမိခဲ့တယ်၊ ဖေဖော်ဝါရီလ(၁၄) ရက်နေ့မှာ တည်းခိုခန်းနဲ့ဟိုတယ်တွေ သတ်မှတ်ထားတဲ့စည်းကမ်းနဲ့ လာရောက်တည်းခိုသူတွေကို လက်ခံမခံ ဆိုတာပါ ရှောင်တခင်စစ်ဆေးမှုတွေ ထပ်မံဆောင်ရွက်သွားမယ်”ဟု ရန်ကုန်တိုင်းဒေသကြီးရဲတပ်ဖွဲ့မှ ဒုတိုင်းမှူးရဲမှူးကြီးဝင်းဗိုလ်က ပြောကြား သည်။ ယင်းဖမ်းဆီးရမိသည့် ကာမစိတ်ကြွဆေးနှင့်စိတ်ငြိမ်ဆေးများကို ဗိုလ်တထောင်၊ ကျောက်တံတား၊ လမ်းမတော်၊ မင်္ဂလာတောင်ညွန့်၊ ကြည့်မြင်တိုင်၊ မင်္ဂလာဒုံ၊ အင်းစိန်၊ မြောက်ဥက္ကလာပနှင့် ဒဂုံမြို့သစ် (တောင်ပိုင်း) မြို့နယ်တို့ရှိ ဆေးသိုလှောင်ရုံ၊ ဆေးဆိုင်နှင့်လမ်းဘေးကွမ်း ယာဆိုင်များမှဖမ်းမိခဲ့ကြောင်း ရန်ကုန်တိုင်းဒေသကြီးရဲတပ်ဖွဲ့မှူးရုံးထံမှ စုံစမ်းသိရှိရသည်။ “အရင်နှစ်တွေက ချစ်သူများနေ့ရောက်ပြီးနောက်ရက်တွေမှာ ကာမ စိတ်ကြွဆေးအသုံးပြုပြီး ဖျက်ဆီးခံရမှုနဲ့ပတ်သက်လို့ တိုင်ကြားလာတဲ့ အမှုတွေရှိခဲ့ပါတယ်။ ဒီနှစ်မှာ ကာမစိတ်ကြွဆေးရောင်းချသူတွေကို အထူးစီမံချက်နဲ့ ဖမ်းဆီးအရေးယူခဲ့တာ ” ဟု ရန်ကုန်အရှေ့ပိုင်းခရိုင်ရဲ တပ်ဖွဲ့မှ ရဲအရာရှိတစ်ဦးက ပြောကြားသည်။ ကာမစိတ်ကြွဆေးပြားများဖမ်းဆီးမှုကို ရန်ကုန်တိုင်းဒေသကြီးအစိုးရ အဖွဲ့နှင့် အစားအသောက်နှင့်ဆေးဝါးကြီးကြပ်ကွပ်ကဲမှုဦးစီးဌာနတို့ ပူးပေါင်းကာ မြို့နယ်ရဲတပ်ဖွဲ့ဝင်များနှင့်အတူ ဆေးကုမ္ပဏီများ၊ ဆေးဆိုင် များနှင့် ဆေးသိုလှောင်ရုံများကို လိုက်လံစစ်ဆေးခဲ့ပြီး တရားမဝင် ကာမ စိတ်ကြွဆေးနှင့် စိတ်ငြိမ်ဆေးများလက်ဝယ်ထားရှိသူများကို ၁၉၉၂ ခုနှစ် အမျိုးသားဆေးဝါးဥပဒေပုဒ်မ ၁၈တို့ဖြင့် သက်ဆိုင်ရာမြို့နယ် ရဲစခန်းများ တွင် အမှုဖွင့်ထားကြောင်း ရန်ကုန်တိုင်းဒေသကြီးရဲတပ်ဖွဲ့မှူးရုံးထံမှ စုံစမ်းသိရှိရသည်။