ဒဏ္ဍာရီထဲကမင်းသမီး

ဒဏ္ဍာရီထဲကမင်းသမီး အမျက်တော်ရှမှာကို ယနေ့တိုင် ကြောက်ရွံ့နေကြတဲ့ မှော်ဇာမြေမှာ နေထိုင်ကြသူတွေ
လက်သည်းရေကန် ဘုန်းတော်ကြီးကျောင်းဝင်းထဲက ချောမောလှပတဲ့ မိန်းမပျိုတစ်ဦးရဲ့ နတ်ကွန်း။
နန်းဝတ်နန်းစားတွေနဲ့ ရွှန်းရွှန်းပပ ပြုံးနေတယ်။ ဘုန်းကြီးကျောင်းနဲ့ နတ်ကွန်း မအပ်စပ်လှပေမဲ့
ဒဏ္ဍာရီတွေအရ မိန်းမပျိုရဲ့ စိတ်ဝိညာဉ် ခိုအောင်းနေတဲ့ နေရာ။ သုံးပန်လှမင်းသမီးရဲ့ နတ်ကွန်းပဲ
ဖြစ်ပါတယ်။

ပုဂံမြို့ဟောင်းထက် အေဒီ ၂ ရာစုလောက် ရှေးပိုကျပြီး ရာဇ၀င်တွေ၊ ဒဏ္ဍာရီပုံပြင်တွေနဲ့ နေရာတိုင်းမှာ
ပြောစမှတ်ရှိနေတဲ့ ပြည်မြို့။ မြို့ဟောင်းလို့ ဒေသခံတွေ ခေါ်ဝေါ်သုံးနှုန်းကြတဲ့ ပျူခေတ်သမိုင်း
ယဉ်ကျေးမှုတွေနဲ့ သရေခေတ္တရာမြို့တော်ဟောင်း။ ( ပြည်မြို့ ကနေ ၁၅ မိနစ်လောက်ကားမောင်းသွားယုံနဲ့ရောက်နိုင်ပါတယ် )

ကမ္ဘာ့ယဉ်ကျေးမှုအမွေအနှစ် စာရင်းထဲကို ၂၀၁၄ ခုနှစ်ကမှ ထည့်သွင်းခံရပေမဲ့ သမိုင်းဝင်အမှတ်တရ
တွေနဲ့အတူ ဘုန်းတန်ခိုးကြီးမားတဲ့ ရာဇ၀င်ထဲက ဒွတ္တဘောင်မင်း၊ ပန်ထွာဘုရင်မတို့ရဲ့
ဒဏ္ဍာရီပုံပြင်တွေ၊ ဒွတ္တဘောင်မင်းရဲ့အဘိုး နဂါးနိုင်ဘုရင် ပေါက်ကျိုင်းရဲ့ရာဇ၀င်က စလို့ မိခင်ဗေဒါရီရဲ့
လွမ်းမောဖွယ်ပုံပြင်၊ ဗိဿနိုးဘုရင်မရဲ့ ဩဇာကြီးမား ထက်မြက်မှုတွေ၊ ဒါတွေဟာ ဒီနေ့ဒီအချိန်ထိ
မြို့တော်ဟောင်းအတွင်း ရွာတွေမှာနေထိုင်ကြတဲ့ ကျေးလက်နေ ကလေးတိုင်းအတွက် အိပ်ရာဝင်
ပုံပြင်တွေအဖြစ် ကြားသိနေကြဆဲဖြစ်သလို ယုံကြည်ကိုးကွယ်ကြောက်ရွံ့ နေရဆဲ အယူစွဲတွေ
အဖြစ်လည်း ကျန်ရှိနေပါသေးတယ်။

ပျူခေတ်ရဲ့ ဒဏ္ဍာရီပုံပြင်တွေလို့ ဆိုလိုက်တာနဲ့ ဒွတ္တဘောင်ဘုရင်နဲ့ ဗိဿနိုးဘုရင်မတို့ရဲ့ ရာဇ၀င်က
ထင်ရှားလှပါတယ်။

ဒါပေမဲ့လည်း သရေခေတ္တရာ မြို့ဟောင်းအတွင်းမှာပဲ တည်ရှိတဲ့ မှော်ဇာရှေးဟောင်း နယ်မြေထဲက
သုံးပန်လှအလွမ်းမင်းသမီးရဲ့ အမျက်ဒေါသနဲ့ သုံးပန်လှရွာပျက်ကြီးအကြောင်းကတော့ ဒေသခံတွေ
အတွက် ယနေ့တိုင် ချောက်ချားမှုတွေ၊ ပူဇော်ပသမှုတွေနဲ့ ယုံကြည်စွဲလမ်းနေရဆဲ ဒဏ္ဍာရီတစ်ပုဒ်
ဖြစ်နေဆဲပဲ ဖြစ်ပါတယ်။

မင်းသမီးရဲ့ အလှဟာ နေထွက်စမှာ ကျက်သရေအပြည့်နဲ့ ရွှေစင်ရွှေမှုန်သဏ္ဌာန်ရှိသလို နေ့လယ်ခင်း
ရှုစားပြန်ရင်လည်း အစွမ်းကုန် ပွင့်လန်းနေတဲ့ ပန်းလေးနဲ့ တူပြန်သတဲ့။
ညနေခင်းမှာလည်း သူရှိတဲ့ အနီးအပါးဟာ လင်းလက်နေသယောင်တောင်
ထင်ယောင်မှားရပြန်တယ်လို့ ဒဏ္ဍာရီတွေက ဆိုပါတယ်။

တစ်နေ့တာရဲ့ အချိန်သုံးချိန်မှာ ပုံစံသုံးမျိုးနဲ့ လှပလွန်းတာကြောင့် 'သုံးပန်လှ'လို့ အမည်တွင်ပါတယ်။
မင်းသမီးဟာ တောင်ညိုမင်းရဲ့နှမတော်စပ်ပြီး တောင်ညိုဘုရင်ရဲ့ နယ်မြေက အခုနယ်မြေသတ်မှတ်ပုံ
အရတော့ ပဲခူးတိုင်းဒေသကြီး၊ နတ်တလင်းမြို့နယ် တကြောလို့ မှတ်သားရပါတယ်။
နှစ်ပြည်ထောင်ချစ်ကြည်ရေးအတွက် တောင်ညိုဘုရင်က ဒွတ္တဘောင်မင်းဆီ သုံးပန်လှမင်းသမီးကို
ဆက်သပါတယ်။

ဒွတ္တဘောင်မင်းကို တိတ်တခိုး မြတ်နိုးရင်းစွဲရှိနေတဲ့ သုံးပန်လှမင်းသမီးက သရေခေတ္တရာကို
သတို့သမီးတစ်ဦးရဲ့ အဆောင်အယောင်တွေနဲ့ ကြွလှမ်းလာခဲ့ပေမဲ့ ဒွတ္တဘောင်ဘုရင်ရဲ့ မိဖုရားတွေက
မင်းသမီးကိုခေါ်ဆောင်လာတဲ့ လမ်းတစ်လျှောက်မှာ ဘုရင်ထံသတင်းပို့ရတဲ့ ဘုရင့်လူယုံတော်တွေဆီ
ချဉ်းကပ်ပြီး မင်းသမီးရဲ့အကြောင်းကို မကောင်းသတင်းတွေသာ တင်လျှောက်စေခဲ့ပါတယ်။

ဘီလူး၊ သရဲသဖွယ် ပုံသဏ္ဌာန်အမှန်ရှိပြီး မကောင်းတဲ့ အတတ်တွေနဲ့ တင့်တယ်အောင်သာ
ဖန်ဆင်းထားတာဖြစ်ကြောင်း၊ ရုပ်သဏ္ဌာန်အမှန်ကတော့ တစ်နေ့သုံးကြိမ် ထိန်းမရအောင်
ပေါ်လာကြောင်း၊ အင်မတန်ကြောက်မက်ဖွယ်ကောင်းကြောင်း တန်စိုးလက်ဆောင်စားထားတဲ့
မင်းမှုထမ်းတွေက ဘုရင်ထံကို မမှန်မကန် လျှောက်တင်ကြပါတယ်။

ယုံကြည်သွားတဲ့ ဘုရင်က မင်းသမီးကို နန်းတော်ထဲ ၀င်ခွင့်မပြုတော့ဘဲ တံခါးဝကနေ
မောင်းထုတ်ခဲ့တဲ့အတွက် မင်းသမီးဟာ အရှက်ကြီးရှက်ခဲ့ရပါတယ်။

အပြန်လမ်းမှာ သူကိုယ်သူတကယ်ပဲ အလှပျက်နေသလားဆိုပြီး မသင်္ကာစိတ်နဲ့ မြေကြီးကို
လက်နဲ့ ယက်ကာ ရေထွက်အောင်ပြုလုပ်ပြီး သူ့ရုပ်သွင်ကို ပြန်ကြည့်ပါတယ်။
မင်းသမီးရဲ့ လက်သည်းနဲ့ တူးရာနေရာက ရေကန်ကြီးဖြစ်ပေါ်သွားပြီး ဒီနေ့တိုင် လက်သည်းရေကန်လို့
ခေါ်ဝေါ် နေဆဲပဲ ဖြစ်ပါတယ်။

တချို့ပြောစကားတွေမှာတော့ ဒွတ္တဘောင်မင်းက အဖြစ်မှန်ကို သိရှိသွားလို့ မင်းသမီးအနောက်ကို
လိုက်ရာမှာ ကျန်ခဲ့တဲ့ အမှတ်အသားတွေကိုတွေ့ရှိပြီး မင်းသမီးပြန်မြင်တွေ့ရင် စိတ်ပျော်ရွှင်အောင်
သူ့ရဲ့နောက်လိုက် နောက်ပါတွေကို ချက်ချင်းရေကန်တူး၊ ကြာတွေ ဖြည့်စိုက်ခိုင်းလို့
ကန်ဖြစ်ပေါ်လာတာလို့လည်း ဆိုကြပါတယ်။

သုံးပန်လှမင်းသမီးကတော့ ဒွတ္တဘောင်မင်းကြီးအပေါ် နာကျည်း စိတ်တွေ၊ ၀မ်းနည်းစိတ်၊
ရှက်စိတ်တွေနဲ့အတူ သူခရီးတစ်ထောက်နားရာ တောတွင်းတစ်နေရာမှာပဲ ဘုရင်နဲ့ မတွေ့ခင်
သေဆုံးသွားပါတယ်။

ဒွတ္တဘောင်မင်း ရောက်လာချိန်မှာတော့ သေဆုံးနေတဲ့ မင်းသမီးရဲ့ ရုပ်အလောင်းကို
ဂူဗိမာန်တည်ဆောက်ပေးပြီး မင်းသမီးရဲ့ အခြွေအရံတွေကို အဲသည်ဂူဗိမာန်အနီးအနားမှာ
ကျေးရွာတည်လို့ နေထိုင်စောင့်ရှောက်စေပါတယ်။

အဲဒီရာဇ၀င်နဲ့အတူ မင်းသမီးရုပ်အလောင်း မြှုပ်နှံထားတဲ့ရွာက ကိုယ်ကြီးမြှုပ်ရွာဆိုပြီး
မှော်ဇာရှေးဟောင်းနယ် မြေထဲမှာ ယနေ့တိုင် ရှိနေပါသေးတယ်။
မှော်ဇာ ဇာတိဖြစ်တဲ့ လက်သည်းရေကန်ကျောင်းတိုက်ဆရာတော် ဦးသီလာစာရက "နတ်တွေ၊ သရဲ၊
တစ္ဆေတွေအကြောင်းကတော့ ဘုန်းကြီးနဲ့ မအပ်စပ်တဲ့အရာပေါ့။ဒါပေမဲ့ ဘုရားအဟောမှာတော့
မြင်အပ်၊ မမြင်အပ် လောကသားတွေကတော့ ပါတာပဲ။ လူ့ကိစ္စယုံကြည်ကိုးကွယ်မှုတွေ
ဘုန်းကြီးအနေနဲ့ မစွက်လိုဘူး။ ငယ်ငယ်က အိပ်ရာဝင်ပုံပြင်အရ ဘုန်းကြီးတို့ မရိုးအောင်
ကြားခဲ့ရတယ်။ အဲဒီနယ်တကြော၊ အထူးသဖြင့် ကိုယ်ကြီးမြှုပ်ရွာက လူတွေဆို သုံးပန်လှ
မင်းသမီးအကြောင်း လက်လွတ်စပယ် မပြောရဲဘူး။ ဂူဟောင်းနေရာ အခု အုတ်ပုံကြီးပါပဲ။
မရိုမသေ မပြုရဲဘူး၊ အမှားမခံရဲဘူး၊ မင်းသမီးကို အမှားပြုရင် နူတယ်ဆိုပြီး အစွဲရှိကြတယ်။
ဘုန်းကြီးတို့ ငယ်ငယ်လောက်က အဲသည်တကြော ကိုယ်ရေပြားရောဂါတွေ ရကြတာရှိတယ်။
ဒါကို မင်းသမီးအပြစ်ပြုမိလို့ ဖြစ်ရတယ်လို့ ရွာသားတွေက အယူစွဲကြတယ်"လို့ မိန့်ပါတယ်။

ဆရာတော်ရဲ့ကျောင်းတိုက်ဝင်းထဲမှာ လက်သည်းရေကန်က တည်ရှိနေတာမို့ ကျောင်းတိုက်ကို
လက်သည်းရေကန်ကျောင်းတိုက်လို့ ခေါ်ဆိုတာဖြစ်ပါတယ်။
ရေကန်အနီးမှာ ယုံကြည်မှုနဲ့ လူတွေတည်ဆောက်ထားတဲ့ ရှေးဟောင်းသိမ်နဲ့ သုံးပန်လှမင်းသမီး
နတ်ကွန်းလည်း ရှိပါတယ်။

သုံးပန်လှရွာ ဖြစ်ပေါ်လာရတာကတော့ သေဆုံးပြီး နတ်စိမ်းဖြစ်သွားတဲ့ မင်းသမီးက
ဒွတ္တဘောင်မင်းထံကို နေထိုင်စရာ နေရာတောင်းရာက ဘုရင်က ရွာဖြစ်လာမယ့်နေရာကို
နေရာအပိုင်စား ပေးလိုက်တာဖြစ်ပါတယ်။
မင်းသမီးက သူ့ကို ပူဇော်သူတွေကို စိုက်ပျိုးသီးနှံတွေ အထွက်ကောင်းအောင်၊ အနာရောဂါကင်းအောင်
စောင့်ရှောက်တယ်လို့ လူတွေက ယုံကြည်ကြပါတယ်။

သူနဲ့ ဒွတ္တဘောင် မင်းနဲ့ ကွဲခဲ့ရတာ ကုန်းချော စကားတွေကြောင့်လို့ ယုံကြည်တဲ့အတွက်
အဲဒီလိုပြောဆိုတာတွေကို မင်းသမီးဟာ အင်မတန် မုန်းတီးတယ်လို့လည်း ဆိုကြပါတယ်။

ရွာအတွင်းက ကြေးရတတ်အမျိုးသမီးတစ်ဦး သူ့ယောက်ျား သူဌေးကြီးက နောက်ထပ်ထူထောင်မယ့်
အမျိုးသမီးကို ကုန်းချောချောက်တွန်း သတ်ဖြတ်ရာကနေ တစ်ရွာလုံး နေထိုင်မရအောင် ခန်းခြောက်
ပျက်စီးလာပြီး လွန်ခဲ့တဲ့နှစ်ပေါင်း တစ်ရာကျော်ကမှ ရွာကိုရွှေ့ပြောင်းသွားကြတယ်လို့ လက်သည်း
ရေကန်ကျောင်းတိုက်က ကျောင်းထိုင်အဆက်ဆက်ကို မျိုးရိုး စဉ်ဆက်ကိုးကွယ်လာတဲ့
အဘိုးဦးဝင်းရွှေက ပြောပြပါတယ်။

သုံးပန်လှရွာဟောင်းက လက်ရှိမှာတော့ ကုန်းမို့မို့တောအုပ်ကလေးအဖြစ် လက်သည်းရေကန်
ကျောင်းတိုက်နဲ့ တစ်မိုင်လောက်အကွာမှာ တည်ရှိပါတယ်။
နတ်ကွန်းနဲ့အတူ ပြိုပျက်နေတဲ့ စေတီတွေ၊ တချို့အိမ်ကုန်းအဟောင်းတွေကိုလည်း တွေ့နိုင်ပါတယ်။
နှစ်စဉ်နှစ်တိုင်း ၀ါဆိုလရောက်တဲ့အခါ သရေခေတ္တရာ မြို့ဟောင်းအတွင်းက မှော်ဇာကျေးရွာအုပ်စုနဲ့
မုဌောကျေးရွာ အုပ်စုက ရွာသူတွေစုပြီး ရွာစဉ်အလိုက် သုံးပန်လှမင်းသမီးအတွက် ပူဇော်ပွဲပြုလုပ်ဖို့
အလှူငွေ လိုက်လံကောက်ခံလေ့ ရှိပါတယ်။

ပူဇော်မယ့်နေ့ရက်ကို အတိအကျ သတ်မှတ်ထားတာမျိုးမရှိပေမဲ့ လပြည့်နေ့မတိုင်ခင်တော့
ပူဇော်ပွဲလုပ်လေ့ရှိကြောင်း မုဌောရွာသူ ဒေါ်လှကြိုင်က ရှင်းပြပါတယ်။
မင်းသမီးအတွက် ပုဝါသုံးမျိုး၊ အုန်းသီး၊ ငှက်ပျောသီး၊ မုန့်မျိုးစုံတို့နဲ့ ပူဇော်ကြပါတယ်။
နတ်ကိုးကွယ်ယုံကြည်မှုဓလေ့ ထွန်းကားနေဆဲ ရှေးဟောင်းဒေသမှာ ရိုးရာနတ်အယူအစွဲတွေလည်း
ရှိပြီး ရိုးရာနတ်တင်တိုင်းလည်း သုံးပန်လှမင်းသမီးအတွက် သခင်မပွဲဆိုပြီး ထည့်တင်လေ့ရှိပါတယ်။

"ပွဲမတင်မိတာတော့ ကျွန်မတစ်သက် မရှိသေးဘူး။ အမေတို့ခေတ်တုန်းကလည်း တင်ခဲ့တာပဲ။
အဲဒီတုန်းကဆို ပိုလို့တောင် ပူဇော်တဲ့အမည်တွေစုံပြီး စည်ကားသေးတယ်။ အခုကတော့
အုန်းပွဲတွေ ရွက်ပြီး ရွာသူတွေစုပြီး သွားဆုတောင်းလိုက်တာပဲ ရှိတော့တယ်။ မပူဇော်ရင် မိုးမမှန်တာ၊
ရာသီဥတု ဖောက်ပြန်တာတွေ ဖြစ်တယ်တော့ ကြားဖူးတယ်။ လယ်ယာခွင်တိုင်းမှာ စောင့်ရှောက်တဲ့
ယုံကြည်မှုတွေတော့ ဒေသအလိုက် အစွဲရှိကြတာပဲ"လို့ အသက် ၆၀ ကျော်ပြီဖြစ်တဲ့
အဘွားဒေါ်လှကြိုင်က ပြောပြပါတယ်။

လက်သည်းရေကန်ကျောင်းတိုက်ထဲက သုံးပန်လှမင်းသမီးရုပ်တုကို ထုလုပ်သူက ရန်ကုန်မြို့မှာ
နေထိုင်တဲ့ ပန်းတဉ်းပညာသည်တစ်ယောက်ဖြစ်ပြီး လွန်ခဲ့တဲ့ ၁၀ နှစ်က သူ့ရဲ့ အိပ်မက်အရ
လာရောက်ထုလုပ်ပူဇော်ဖို့ ဆရာတော်ထံ အပူကပ်တောင်းပန်လွန်းတာကြောင့် ယုံကြည်မှုတွေကို
မစွက်ဖက်လိုဘဲ ခွင့်ပြုပေးလိုက်တာလို့ ဆရာတော် ဦးသီလာစာရက မိန့်ပါတယ်။

photography by Wint Wah

by- KhinWinePhyuPhyu
-MyanmarTimes