အုပ်ချုပ်ရေးမှူးရုံးမှပေးသည့်ဆန် စားလို့မရသည့်အတွက် ဒုက္ခသည်များ ၀က်စာသာကျွေးနေ
ပူတာအိုမြို့ လုံစွတ်ရပ်ကွက်ရှိ စစ်ဘေးဒုက္ခသည်များအား မြို့နယ်အုပ်ချုပ်ရေးမှူးရုံးမှ ၂၀၁၅ ဖေဖော်ဝါရီလဆန်းပိုင်းတွင်လှူဒါန်းခဲ့သည့် ဆန်အိတ် (၂၀)ကျော်အား စားလို့မရသည့်အတွက် ဒုက္ခသည်များမစားတော့ပဲ ၀က်စာသာကျွေးနေကြောင်းသတင်းရရှိသည်။ “ ဆန်တွေက အငွေ့တောင်ပျံတယ်။ စားလို့မရဘူး။ နံလည်းနံတယ်၊ ချဉ်လည်း ချဉ်တယ်။ကျွန်တော်တို့လည်း မစားလို့မဖြစ်ဘူးဆိုပြီး တခြားဆန်ကောင်းနဲ့ပေါင်းပြီးချက်စားတယ်။ အဲဒီချိန်မှာအကုန်လုံးဝမ်းလျှောကြတာပဲ။ အခုတော့အဲဒီဆန်တွေမစားတော့ဘူး။ ဒီဆန်တွေပြန်မစားတော့မှ လူနာလည်းမရှိတော့တာ။ သူတို့ပေးထားတဲ့ဆန်စားလို့ ၀မ်းလျှောသလိုဖြစ်နေတယ်။ ” ဟု ပူတာအိုစစ်ဘေးဒုက္ခသည်စခန်းမှ တာဝန်ရှိသူတစ်ဦးမှဆိုသည်။ အဆိုပါဆန်စားနေချိန်ဒုက္ခသည်များ အယောက် ၃၀ ကျော် ၀မ်းပျက်ဝမ်းလျှောဖြစ်ပွားခဲ့သေးကြောင်းလည်းဆိုသည်။ ဒုက္ခသည်စခန်းအား မြို့နယ်အုပ်ချုပ်ရေးရုံး၊ စရဖ၊ SB များမှ စားရင်းမကြာခဏလာရောက်ကောက်ခံမှုများရှိနေသော်လည်း မည်သည့် ကူညီမှုမှလည်း လုပ်ဆောင်ခြင်းမရှိကြောင်းဆိုသည်။ “ လူစာရင်းတော့ နေ့တိုင်းလာမေးတယ်။ လိုအပ်တာရှိရင်ပြောလို့လည်းပြောတယ်။ ပြီးတော့ ဟိုတစ်လောကဒီကဒုက္ခသည်ဖျားတုန်းက ဘယ်သူမှရောက်မလာဘူး။ အဖျားသက်သာမှပဲ ပြန်ရောက်လာတယ်။” ဟုဒုက္ခသည်စခန်းမှတာဝန်ရှိသူတစ်ဦးမှဆိုသည်။ အဆိုပါဒုက္ခသည်စခန်းတွင် အင်ခါဂါး၊ အင်ဖီဂါး၊ မပြုံးစသည့်ကျေးရွာများမှ ဒုက္ခသည်များ အယောက် ၂၅၁ ယောက်နေထိုင်သည့်စခန်းလည်းဖြစ်သည်။ ၂၀၁၃ ခုနှစ်တွင်လည်း ပူတာခရိုင်အုပ်ချုပ်ရေးရုံးမှ ဒုက္ခသည်များအား ကျောက်၊ ဘိလပ်မြေများပါသည့် ဆန် အိတ်များ လာရောက်လှူးဒါန်းခဲ့ဖူးသည်။ 
No comments:
Post a Comment