ပြည်သူကို ပေးသည့်ကတိ ပျက်ပြားခြင်း မရှိဟု ဒေါ်အောင်ဆန်းစုကြည် ပြောကြား

နေပြည်တော်၊ ဇန်နဝါရီ  ၁

NLD အစိုးရ ဖွဲ့စည်းခဲ့ပြီးနောက် ကိုးလအတွင်း ပြည်သူကို ပေးခဲ့သည့် ကတိများ ပျက်ပြားခဲ့ခြင်း မရှိကြောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောကြားသည်။

နေပြည်တော်ရှိ MICC2 ၌ ဇန်နဝါရီ ၁ ရက်က ပြုလုပ်သည့် လူငယ်များနှင့်   ငြိမ်းချမ်းရေး စကားဝိုင်း အစီအစဉ်တွင် ၎င်းက ယင်းသို့ ပြောကြားခဲ့ခြင်း ဖြစ်သည်။ 

“ပြည်သူလူထုကို မတည်နိုင်တဲ့ ကတိတွေ ဘယ်တုံးကမှလည်း မပေးခဲ့ပါဘူး။ ပေးခဲ့တဲ့ ကတိလေးတွေဟာလည်း ခပ်ရိုးရိုးသားသား ကတိတွေပါပဲ၊ အဲဒါလည်း တည်ခဲ့ပါတယ်။ ဆက်ပြီးတော့လည်း တည်အောင် လုပ်သွားမှာပါ” ဟု ၎င်းက ဆိုသည်။

နိုင်ငံတော် ပြန်လည်တည်ဆောက်နေချိန်တွင် အရေးကြီးသောအချက် အနေနှင့်  တစ်ယောက်နဲ့ တစ်ယောက် ယုံကြည်မှုရှိရန် လိုအပ်ပြီး အစိုးရ စတင်ထူထောင်စဉ်က တင်ပြထားသော ပြည်တွင်းငြိမ်းချမ်းရေး၊ ပြည်သူလူထုဘဝ တိုးတက်ရေးကို ဆက်လက်လုပ်ဆောင်သွားရမည် ဖြစ်ကြောင်း ၎င်းက ပြောသည်။ 

“မဖြစ်နိုင်တဲ့ ကိစ္စကို ပြည်သူကို ဘယ်တော့မှ ကတိမပေးပါဘူး။ အခုထိလည်း ကိုးလအတွင်းမှာ ပြည်သူကို ပေးခဲ့တဲ့ ကတိတွေ ပျက်ပြားခဲ့တာ မရှိပါဘူး။ ကျွန်မတို့ ဖြစ်စေချင်သလောက် ကိုးလအတွင်းမှာ ဖြစ်ခဲ့သလားဆိုတော့ တချို့ဟာတွေက မျှော်မှန်းသလောက် မဖြစ်ပေမယ့် တချို့ကိစ္စတွေကျတော့ မမျှော်မှန်းဘဲ တိုးတက်မှုတွေ ရှိခဲ့ပါတယ်” ဟု နိုင်ငံတော်၏ အတိုင်ပင်ခံပုဂ္ဂိုလ်က ဆိုသည်။

အစိုးရအနေနှင့် ရှေ့ဆက်လုပ်ဆောင်ရမည့် ကိစ္စများတွင် ပွင့်လင်းမြင်သာမှုနှင့် တာဝန်ယူမှုကို ဆက်ဆုပ်ကိုင်၍ လုပ်ဆောင်သွားမည် ဖြစ်ကြောင်း ၎င်းက ကတိပြု ပြောကြားသည်။

လူငယ်များနှင့် ဆွေးနွေးပွဲတွင် လူငယ် ၁၈ ဦး တက်ရောက်ခဲ့သော်လည်း အများစုကို ကိုယ်စားပြုသည်ဟု မပြောနိုင်ကြောင်း၊ နောင်တွင် ကလေးငယ်များ၊ စီးပွားရေးသမားများနှင့် လူမှုအဖွဲ့အစည်းများနှင့်ပါ ငြိမ်းချမ်းရေး စကားဝိုင်းများ ပြုလုပ်လိုကြောင်း ဒေါ်အောင်ဆန်းစုကြည်က ထပ်လောင်းပြောသည်။

ယင်းအပြင် ယနေ့ နံနက်ပိုင်းက ငြိမ်းချမ်းရေး ဗဟိုဌာန (NRPC) ကို နေပြည်တော်တွင် ဖွင့်လှစ်ခဲ့ပြီး ငြိမ်းချမ်းရေး လုပ်ငန်းစဉ်များ အောင်မြင်စေချင်သော စိတ်ထားဖြင့် ဖွင့်လှစ်ရခြင်းဖြစ်ကြောင်း နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြောသည်။

နေပြည်တော်ရှိ အားကစားကျေးရွာ အနီးတွင် NRPC နေပြည်တော် ဖွင့်လှစ်ခဲ့ခြင်း ဖြစ်ပြီး ၎င်းက အဖွင့်အမှာစကား ပြောကြားခဲ့သည်။

“ကျွန်မတို့နိုင်ငံက လွတ်လပ်ရေး ရကတည်းက အမျိုးသားပြန်လည်သင့်မြတ်ရေး မရရှိခဲ့တာ နှစ် ၇၀ ပြည့်တော့မယ်၊ ငြိမ်းချမ်းရေး မရသေးဘူး၊ အချိန်တွေ လွန်လာပြီ၊ ငြိမ်းချမ်းရေး ရရှိဖို့ အမြန်ဆုံး လိုတယ်” ဟု ၎င်းက ဆိုသည်။

ထပ်လောင်း၍ နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က “ကျွန်မတို့ရဲ့ ငြိမ်းချမ်းရေး သံလွင်ပင်လေးကို ရှင်သန်စေချင်လို့ရှိရင် ပထမဆုံး အရေးကြီးတာကတော့ ကျွန်မတို့ အချင်းချင်းကြားမှာ မှန်မှန်ကန်ကန် ဖြောင့်ဖြောင့်မတ်မတ် ပွင့်ပွင့်လင်းလင်း ဖြူဖြူစင်စင်လေး ဆက်ဆံနိုင်ဖို့ပါပဲ။ အဲဒီတော့ ကျွန်မတို့ဟာ ၂၀၁၇ နှစ်အတွက် ပထမဦးဆုံးနေ့ကနေ စပြီးတော့ အမျိုးသားပြန်လည်သင့်မြတ်ရေးနဲ့ ငြိမ်းချမ်းရေးအတွက် ဖြူစင်တဲ့ စိတ်ဓာတ်တွေနဲ့ ဆက်ပြီးတော့ သွားကြစို့လို့ ကျွန်မအနေနဲ့ တိုက်တွန်းချင်ပါတယ်” ဟု ၎င်းက ထည့်သွင်းပြောကြားခဲ့သည်။

ယင်း NRPC ရုံးဖွင့်ပွဲတွင် နိုင်ငံတော်၏ အတိုင်ပင်ခံပုဂ္ဂိုလ်က အဆောက်အအုံရှေ့တွင် ငြိမ်းချမ်းရေး အထိမ်းအမှတ် ဖြစ်သည့် သံလွင်ပင်ငယ် တစ်ပင်ကို စိုက်ပျိုးခြင်း၊ ရေလောင်းခြင်း လုပ်ဆောင်ခဲ့သည်။

The voice