နိုင်ငံတကာမီဒီယာများ၌ ဖော်ပြခဲ့သည့် ‘ရွေးကောက်ပွဲ တစ်နှစ်ကြာသော်’ အယ်ဒီတာ့ အာဘော်ကို The Daily Eleven တွင် ဘာသာပြန်ဆို ဖော်ပြခဲ့မှုနှင့် ပတ်သက်၍ ရန်ကုန်တိုင်းဒေသကြီး ၀န်ကြီးချုပ်က သတင်းမီဒီယာ အဖွဲ့အစည်းများအား တွေ့ဆုံ

အစိုးရအဖွဲ့ရုံးတွင် ပြုလုပ်သော သတင်းမီဒီယာ အဖွဲ့အစည်းများ တွေ့ဆုံပွဲတွင် သတင်းရယူခွင့် မရခဲ့သော ပုဂ္ဂလိက သတင်းမီဒီယာသမားများကို တွေ့ရစဉ်

နိုင်ငံတကာ မီဒီယာများတွင် ဖော်ပြခဲ့သည့် “ရွေးကောက်ပွဲ တစ်နှစ်ကြာသော်” အယ်ဒီတာ့အာဘော်ကို The Daily Eleven တွင် ဘာသာပြန်ဆို ဖော်ပြခဲ့မှုနှင့် ပတ်သက်၍ ရန်ကုန်တိုင်းဒေသကြီး ၀န်ကြီးချုပ်က သတင်းမီဒီယာ အဖွဲ့အစည်းများမှ တာဝန်ရှိသူများအား နိုဝင်ဘာ ၈ ရက် နံနက်ပိုင်းက ရန်ကုန်တိုင်းဒေသကြီး အစိုးရအဖွဲ့ရုံးတွင် တွေ့ဆုံခဲ့ကြောင်း မြန်မာနိုင်ငံ စာနယ်ဇင်းကောင်စီ အတွင်းရေးမှူး ဦးသီဟစောက ပြောကြားသည်။

အဆိုပါ တွေ့ဆုံပွဲတွင် သတင်းမီဒီယာ အဖွဲ့အစည်းအသီးသီးမှ တာဝန်ရှိသူ ခုနစ်ဦးနှင့် ရန်ကုန်တိုင်းဒေသကြီး အစိုးရအဖွဲ့ဘက်မှ ၀န်ကြီးချုပ်နှင့် ၀န်ကြီးများ ပါဝင်ကြောင်း ဦးသီဟစောက ပြောကြားသည်။

“တိုင်ပင်တာပေါ့။ ဘယ်လိုလုပ်ရင် ကောင်းမလဲ။ ဘယ်လိုလုပ်ရင် ကောင်းမလဲဆိုတော့ ငါတို့ကတော့ ရှင်းရှင်းလေးပဲ။ သတင်းမီဒီယာ ကောင်စီက အဲဒီလိုကိစ္စတွေမှာ အကျယ်အကျယ် မငြိမ်းဖွယ်မဖြစ်အောင်၊ ကြီးတဲ့အမှုငယ်အောင် ကွန်ပလိန့် ကော်မရှင်ဆိုတာ အဲဒီအတွက်ထားတာ။ ကွန်ပလိန့် ကော်မရှင်ရှိတယ်။ သတင်းမီဒီယာ ဥပဒေရှိတယ်။ နည်းဥပဒေရှိတယ်။ အဲဒီအတိုင်း တိုင်ပါ။ တိုင်လို့ရှိရင် အဲဒီအတွက် ရှင်းပေးမယ်။ ရှင်းလို့မရဘူးဆိုရင် တရားစွဲတဲ့အဆင့် သွားတာရှိတယ်။ ဒါပေမဲ့ အဲဒီလိုမျိုး သွားတာကတော့ ကျွန်တော်တို့က အဲဒါမျိုးတွေ မဖြစ်စေချင်ဘူး” ဟု ဦးသီဟစောက ပြောကြားသည်။

The Daily Eleven တွင် ဖော်ပြခဲ့သည့် ဘာသာပြန် ရေးသားဖော်ပြချက်၌ “လစာ ဒေါ်လာ ၂၅၀၀ ခန့်သာရှိသည့် ၀န်ကြီးချုပ်တစ်ဦး ဒေါ်လာ တစ်သိန်းခန့်တန်သည့် fh Patek Phillipe နာရီ ၀တ်ဆင်သည်ဆိုသည့် သတင်းက တစ်နေ့အနည်းဆုံး လုပ်ခ နှစ်ဒေါ်လာခွဲသာရသည့် နိုင်ငံသားတော်တော်များများကို မကျေမနပ် ဖြစ်ခဲ့ရသည်” ဟူသောအချက်တွင် “ယင်း လက်ဆောင်ကိုပေးသူမှာ မကြာသေးမီက မူးယစ်ဆေးဝါးအမှုဖြင့် ထောင်က လွတ်လာခဲ့သော သူဌေးကြီး တစ်ဦးဖြစ်ပြီး အစိုးရ အကူးအပြောင်းမှာ မြို့သစ်စီမံကိန်းကို တင်ဒါအောင်မြင်ခဲ့သူ တစ်ဦးဆိုသည်မှာ မည်သူ ဖြစ်ပါသလဲ” နှင့် “Patek Phillipe နာရီကို စွဲမြဲစွာဝတ်ဆင်သည့် စီးပွားရေးလုပ်ငန်းရှင် တစ်ဦးမှာ မည်သူဖြစ်ပါသလဲ အချက်နှစ်ချက်အား သိရှိလိုကြောင်း” ရန်ကုန်တိုင်းဒေသကြီး ၀န်ကြီးချုပ် ကိုယ်စား ရန်ကုန်တိုင်းဒေသကြီး အစိုးရအဖွဲ့ ညွှန်ကြားရေးမှူး ဦးမိုးဟိန်းက The Daily Eleven သို့ နိုဝင်ဘာ ၇ ရက်တွင် စာပေးပို့ မေးမြန်းခဲ့သည်။

ထိုသို့ စာဖြင့်မေးမြန်းခြင်းသည် စာနယ်ဇင်း လွတ်လပ်ခွင့်ကို ထိပါးရာ ရောက်နေသည့်အတွက် ကန့်ကွက်ကြောင်းနှင့် ယခုကဲ့သို့ ဖိအားပေး မေးမြန်းမှုအပေါ် ပြန်လည် ဖြေကြားရန် အကြောင်းမရှိပါကြောင်း၊ အများပြည်သူအကြား ပွင့်လင်းမြင်သာစွာ စုံစမ်းစစ်ဆေး ဖော်ထုတ်ခြင်းများ ပြုလုပ်မည်ဟူသော ခိုင်မာသည့် ကတိက၀တ်ပြုမှုရှိပါက အမှန်တရား ပေါ်ပေါက်ရန် အပြည့်အ၀ ပူးပေါင်းဆောင်ရွက်မည် ဖြစ်ပါကြောင်း စသည်ဖြင့် The Daily Eleven က နိုဝင်ဘာ ၈ ရက်တွင် ရန်ကုန်တိုင်းဒေသကြီး အစိုးရအဖွဲ့ ၀န်ကြီးချုပ် ဦးဖြိုးမင်းသိန်းထံ အကြောင်းပြန်ထားပြီး နိုဝင်ဘာ ၈ ရက်တွင် ရန်ကုန်တိုင်းဒေသကြီး ၀န်ကြီးချုပ်က သတင်းမီဒီယာ အဖွဲ့အစည်းများအား တွေ့ဆုံခဲ့ခြင်းလည်း ဖြစ်သည်။

“ဒီနေ့က ဆွေးနွေးတာ မဟုတ်ဘူး။ သူ့ဘက်က သူချည်းပဲ ပြောတာ။ ပြီးတော့မှ ငါတို့ပြောတာ။ သူပြောတာတော့ ဒီဟာပါတယ်၊ ဟိုဟာပါတယ် ဘာညာပေါ့ကွာ။ ငါတို့ သိပြီးသားဟာတွေပါ။ အဲဒါတွေနဲ့ ပတ်သက်လို့ ပြောတယ်။ နောက် သူတို့က မီဒီယာနဲ့ ပတ်သက်လို့ ပြေလည်ချင်တယ်။ မီဒီယာတွေက အရေးကြီးမှန်းလည်း သိတယ်။ သူ့ရဲ့ အမြင်တွေ၊ ခံစားချက်တွေ စသဖြင့် ပြောတယ်။ ပြောပြီးတော့မှ ငါတို့က ရှင်းရှင်းလေးပဲ။ ကျွန်တော်တို့ဘက်က ဆိုရင်တော့ ဒါတွေ၊ ဒါတွေ လုပ်ပေးလို့ရတယ်။ ဒီလိုဆောင်ရွက်ပါပေါ့။ အဲဒီလိုပြောလိုက်တယ်။ အဲဒီကိစ္စ ဖြစ်ပေါ်နေတယ်။ ဘာတွေလုပ်ရင် ကောင်းမလဲလို့ မေးတဲ့သဘော။ သူတို့ကတော့ Press Council ကို တိုင်မယ်လို့ပြောတယ်။ Press Conference လည်းလုပ်လိမ့်မယ်။ Press Council ကိုလည်း တရားဝင် စာတင်လိမ့်မယ်” ဟု မြန်မာနိုင်ငံစာနယ်ဇင်း ကောင်စီ အတွင်းရေးမှူး ဦးသီဟစောက ပြောကြားသည်။

မြန်မာသတင်းပညာ သိပ္ပံ Training ဒါရိုက်တာ ဦးစိန်ဝင်းက “နောက်တစ်မျိုးကကျတော့ ကျွန်တော့်အမြင်အရ ဒါက Over Sensitive ဖြစ်တာဗျ။ ကိုယ်က လက်ဆောင် ယူထားတာ။ အကယ်၍ လက်ဆောင်ရတယ်ဆိုရင် ဘာဖြစ်လဲ။ လက်ဆောင် ရထားတာပဲပေါ့။ အဲဒါနဲ့ Corruption နဲ့ တိုက်ရိုက်ပတ်သက်မှု ရှိတယ်လို့ ပြောလို့မရဘူးလေ။ သွားပြီးတော့ စွပ်စွဲလို့မရဘူး။ ကျွန်တော်သာဆိုရင်တော့ အဲဒီအပေါ်မှာ ဘာမှတုံ့ပြန်နေတော့မှာ မဟုတ်ဘူး။ အစိုးရဖြစ်လာရင် ဘယ်နိုင်ငံရေး ခေါင်းဆောင်မဆို သူက ဘားက မြင့်သွားပြီ။ သူ့ကို Public က ဝေဖန်မှုတွေရှိမှာပဲ။ အဲဒီဟာကို အရေထူဖို့ လိုအပ်တယ်။ နိုင်ငံရေးမှာ အကဲဆတ်လွန်းတာ မကောင်းဘူး။ အထူးသဖြင့် မီဒီယာတွေနဲ့ ပတ်သက်ပြီးတော့ ကိုယ်က နားလည်တတ်ရမယ်။ မီဒီယာရဲ့ သဘောသဘာဝကို သိဖို့လိုတယ်။ မီဒီယာကို အကဲဆတ်လွန်း အားကြီးရင် Negative Image တွေပေါ်တတ်တယ်။ ဒါကအလိုလို ဆင့်ကဲဖြစ်ပွားမှုတွေ ဖြစ်တာပေါ့နော်” ဟုပြောကြားသည်။

Writer: 

သတင်းအဖွဲ့
ELEVEN