ဖေ့စ်ဘွတ်ခ်ပေါ်တွင် ချစ်ရေးဆိုကာ တရားဝင် ဇနီးသုံးဦး ပေါင်းသင်းခဲ့ သူကို အမှုဖွင့်

ဖေ့စ်ဘွတ်ခ်ပေါ်တွင် ချစ်ရေးဆိုကာ တရားဝင် ဇနီးသုံးဦး ပေါင်းသင်းခဲ့ သူကို အမှုဖွင့် Thursday, February 25, 2016 ကျောက်တန်းမြို့နယ်နှင့် ခရမ်းမြို့နယ်တို့တွင် နေထိုင်သော အသက် ၂ဝကျော်အရွယ် မိန်းကလေး သုံးဦးကို ဖေ့စ်ဘွတ်ခ် လူမှုကွန်ရက် စာမျက်နှာပေါ်တွင် လူပျိုလူလွတ်ဖြစ်ကြောင်းပြောဆိုပြီး ချစ်ရေးဆိုကာ တရားဝင်ဇနီးများအဖြစ် လက်ထပ်ခဲ့သော အသက် ၂၄ နှစ်အရွယ် လူငယ်ကို ဖေဖော်ဝါရီလ ၂၃ ရက်နေ့က တစ်လင်တစ်မယားစနစ် ကျင့်သုံးခြင်းဆိုင်ရာ ဥပဒေဖြင့် အမှုဖွင့်ထားကြောင်း ကျောက်တန်းမြို့နယ် တံတားနယ်မြေ ရဲစခန်းထံမှသိရှိရသည်။ အမှုဖွင့်ခံထားရသူမှာ ခရမ်းမြို့နယ်၊ အမှတ်(၇)ရပ်ကွက်တွင် နေထိုင်ပြီး ယခုနှစ် ဇန်နဝါရီလ ၂၂ ရက်နေ့က ကျောက်တန်းမြို့နယ်၊ တမံကြီးကျေးရွာ တွင် နေထိုင်သော အသက် ၂၃ နှစ်အရွယ် မိန်းကလေးနှင့် ဖေ့စ်ဘွတ်ခ်တွင် တွေ့ဆုံချစ်ကြိုက်ခဲ့ပြီး ဖေဖော်ဝါရီလ ၃ ရက်နေ့တွင် ရပ်ကွက် အုပ်ချုပ်ရေးမှူးရုံး၌ နှစ်ဦးသဘောတူ လက်ထပ်စာချုပ် ချုပ်ဆိုခဲ့ကြောင်း၊ ယင်းလူငယ်က အခြားအမျိုးသမီးနှစ်ဦးနှင့် တရားဝင် လက်ထပ်ပေါင်းသင်း နေသူဖြစ်ကြောင်း မိန်းကလေး၏ မိသားစုဘက်မှ စုံစမ်းသိရှိခဲ့သဖြင့် အမှုဖွင့် တိုင်ကြားခဲ့ကြောင်း တံတားနယ်မြေ ရဲစခန်းမှူး ရဲအုပ်ထွန်းထွန်းဝေက ပြောကြားသည်။ “ဖေ့စ်ဘွတ်ခ်မှာ လူပျိုဆိုပြီး မိန်းကလေးတွေကို ချစ်ရေးဆိုတယ်။ လက်ရှိ သုံးယောက်မြောက် မိန်းကလေးကို စစ်ကိုင်းတိုင်း၊ ရွှေဘိုမြို့ကို ခိုးပြေး သွားတယ်။ ရပ်ကွက်ရုံးမှာ လက်ထပ်ခဲ့ပြီး အတူပေါင်းသင်းခဲ့ရာကနေ မိန်းကလေးက မသင်္ကာလို့ သူ့နောက်ကြောင်းတွေ လိုက်လံစုံစမ်းရင်း သိခဲ့ရတာ။ အတိုင်ခံရသူကို မမိသေးပါဘူး” ၄င်းက ပြောကြားသည်။ အဆိုပါ အမျိုးသားမှာ ၂ဝ၁၅ခုနှစ်က ဖေ့ဘွတ်ခ်စာမျက်နှာတွင် ချစ်သူဖြစ် ခဲ့သော ခရမ်းမြို့နယ်နေသူ အသက် ၂၂နှစ် အရွယ် မိန်းကလေးနှင့် ကျောက်တန်းမြို့နယ်တွင် နေထိုင်သော အသက် ၂၅နှစ်အရွယ် မိန်းကလေးတို့ကို တရားဝင် လက်ထပ်ထားသူဖြစ်ကြောင်း၊ ယင်းအမျိုးသားကို တစ်လင်တစ်မယားစနစ် ကျင့်သုံးခြင်းဆိုင်ရာ ဥပဒေ ပုဒ်မ ၁၇ဖြင့် အမှုဖွင့်ကာ ဖမ်းဆီးအရေးယူထားကြောင်း ကျောက်တန်းမြို့နယ် တံတားနယ်မြေ ရဲစခန်းထံမှ သိရှိရသည်။ The Voice Weekly